ജനീവയില്‍നിന്ന് പുതിയ കംപ്യുട്ടറുമായി നൈജീരിയക്ക് പോയി അവിടെ വൈദ്യുതി സോക്കറ്റ് ഉപയോഗിക്കാന്‍ പറ്റാതായ കാര്യം കഴിഞ്ഞ ദിവസം പറഞ്ഞതാണ്. യാത്രചെയ്യുമ്പോള്‍ നമ്മുടെ കൈയിലുള്ള ഇലക്ട്രോണിക് സാധനങ്ങളുടെ കാര്യത്തില്‍ പല കാര്യങ്ങളും ശ്രദ്ധിക്കേണ്ടതുണ്ട്.
പ്‌ളഗ്ഗും സോക്കറ്റും: ലോകത്ത് അനവധി തരം പ്‌ളഗ്ഗും സോക്കറ്റുകളുമുണ്ട്. ഇത് ശ്രദ്ധിക്കാതെ പോയാല്‍ ഇലക്ട്രോണിക് സാധനങ്ങള്‍ ഉപയോഗിക്കാന്‍ പറ്റാതെ പണികിട്ടും. ഇന്ത്യയിലെ പോലെയല്ല, ഇംഗ്ലണ്ടില്‍, ഇംഗ്ലണ്ടിലെ പോലെയല്ല ഫ്രാന്‍സില്‍, സ്വിറ്റ്സര്‍ലാന്‍ഡിലെ പോലെ ലോകത്തൊരിടത്തും ഇല്ല. കാര്യം യൂണിവേഴ്സല് അഡാപ്റ്റര്‍ എന്നൊക്കെ പറഞ്ഞ് പല സാധനങ്ങളും വാങ്ങാന്‍ കിട്ടുമെങ്കിലും യുണിവേഴ്‌സലായി ഒന്നുമില്ലെന്ന് കഴിഞ്ഞ നൈജീരിയന്‍ യാത്രയില്‍ എനിക്ക് ശരിക്കു മനസ്സിലായി. ഒന്നിന്റെ മുകളില്‍ ഒന്നായി അഡാപ്റ്ററുകള്‍ വെച്ച് അഡാപ്റ്റ് ചെയ്യേണ്ടിവരും.
Related Read - യാത്രയും പണവും: നാടനും മറുനാടനും
ഉദാഹരണത്തിന്, ഇന്ത്യയിലെ ചില ഉപകരണങ്ങള്‍ക്ക് സാമാന്യത്തിലും വലുതായ ഒരു പിന്നാണ് ഏറ്റവും മുകളിലുള്ളത് (earthing pin). ഇതൊരു യൂണിവേഴ്സല് മാരണമാണ്. അതിനു പറ്റിയ അഡാപ്റ്റര്‍ ഇനിയും ശാസ്ത്രലോകം കണ്ടുപിടിക്കാനിരിക്കുന്നതേയുള്ളു. നാട്ടില്‍നിന്നുതന്നെ അതിനുള്ള അഡാപ്റ്റര്‍ വാങ്ങി പോകുന്നതാണ് ബുദ്ധി.
ഏതെങ്കിലും രാജ്യത്ത് ചെല്ലുമ്പോള്‍ അവിടെ നമുക്ക് പറ്റിയ അഡാപ്റ്റര്‍ കിട്ടിയില്ലെങ്കില്‍ വയറിന്റെ ഇന്‍സുലേഷന്‍ എടുത്തുകളഞ്ഞ് തരികിട കാണിക്കരുത്. അപകടമാണ്, ജയിലിലുമായേക്കാം.
വോള്‍ട്ടേജ് വ്യതിയാനം: വിവിധ ലോകരാജ്യങ്ങളില്‍ ഭിന്ന വോള്‍ട്ടേജിലാണ് പവര്‍. ഇന്ത്യയില്‍ 240 വോള്‍ട്ട് , യൂറോപ്പ് 220 V അമേരിക്കയില്‍ 120 V എന്നിങ്ങനെ. നിങ്ങളുടെ കയ്യിലുള്ള ഉപകരണങ്ങള്‍ ഇവയില്‍ ഉപയോഗിക്കാമോ എന്ന് പരിശോധിക്കണം.
Related Read - വയസ്സാംകാലത്ത് പശ്ചാത്തപിക്കാതിരിക്കാന്‍ നല്ല കാലത്ത് സഞ്ചരിക്കാം
മൊബൈല്‍ ഫോണും ലാപ്‌ടോപ്പും : സെല്‍ഫോണ്‍ ഇപ്പോള്‍ എല്ലാവരുടെയും കൈയിലുണ്ട്. പക്ഷെ യാത്ര പോകുമ്പോള്‍ സ്ഥിരമായി ഉപയോഗിക്കുന്ന മൊബൈല്‍ ഫോണ്‍ കൊണ്ട് പോകണോ എന്ന് ആലോചിക്കുക. യാത്രയില്‍ നമ്മുടെ ഫോണ്‍ നഷ്ടപ്പെടാനുള്ള സാധ്യത ഉണ്ട്. ഫോണിന്റെ വില മാത്രമല്ല, നമ്മുടെ കോണ്ടാക്ടുകള്‍ മുഴുവന്‍ അതില്‍ ആണ്, അത് പോയാല്‍ പിന്നെ വലിയ പണിയാണ്. അതുകൊണ്ട് യാത്രക്ക് വേണ്ടി പഴയ ഫോണ്‍ കയ്യില്‍ ഉണ്ടെങ്കില്‍ കൊണ്ട് പോവുകയാണ് ബുദ്ധി. ചില രാജ്യങ്ങളില്‍ വിലപിടിപ്പുള്ള ഫോണ്‍ നിങ്ങളുടെ കയ്യില്‍ കാണുന്നത് 'ഇവന്‍ കാശുകാരന്‍' ആണെന്നതിന്റെ ലക്ഷണം ആണ്. സ്വര്‍ണ്ണമാല ഇട്ടു നടക്കുന്നത് പോലത്തെ റിസ്‌ക് ആണ്. എന്റെ സുഹൃത്തിന്റെ വീട്ടില്‍ കടന്നു കയറി കാവല്‍ക്കാരനെ വെടി വച്ച് കൊന്ന പയ്യന്മാര്‍ എടുത്തു കൊണ്ട് പോയത് മൊബൈല്‍ ഫോണ്‍ മാത്രമാണ്. (സുഹൃത്തിന്റെ തുടയില്‍ വെടിയേറ്റു, പക്ഷെ വേദന സഹിച്ചും മരിച്ചപോലെ കിടന്നതുകൊണ്ടു ജീവന്‍ പോയില്ല).
Related Read - എന്തുകൊണ്ടാണ് ആളുകള്‍ യാത്ര ചെയ്യാത്തത്
ലാപ്പ് ടോപ്പിന്റെ കാര്യവും ഏതാണ്ട് അങ്ങനെയൊക്കെത്തന്നെ. ഇത് മുന്നേ കണ്ട് മൊബൈലിലെ അഡ്രസ് ബുക്കും ലാപ്ടോപ്പിലെ ഡേറ്റയും ബാക്ക് അപ്പ് ചെയ്യണം. കോണ്‍ഫിഡന്‍ഷ്യല്‍ സ്വഭാവമുള്ള ഡേറ്റ നമ്മുടെ കമ്പ്യൂട്ടറിലുണ്ടെങ്കില്‍ പ്രത്യേകം ശ്രദ്ധിക്കണം. സാധിക്കുമെങ്കില്‍ യാത്രക്ക് മാത്രമായി ഒരു കമ്പ്യൂട്ടറും ഉപയോഗിക്കണം. (ഞാന്‍ അതാണ് ചെയ്യുന്നത്). നമ്മുടെ കമ്പ്യൂട്ടറിലോ ഫോണിലോ ഉള്ള ഏത് വിവരവും ഒറ്റയടിക്ക് ചോര്‍ത്താന്‍ ശക്തിയുള്ള സെക്യൂരിറ്റി സംവിധാനങ്ങള്‍ ഇപ്പോള്‍ നിലവിലുണ്ട്. നമ്മള്‍ ഒക്കെ അതിര്‍ത്തികള്‍ കടന്നു പോകുമ്പോള്‍ ചില രാജ്യങ്ങളിലെ സര്‍ക്കാര്‍ സംവിധാനങ്ങള്‍ ഇതൊക്കെ ചെയ്യുന്നും ഉണ്ട്, നിങ്ങള്‍ അറിയുന്നില്ല എന്നേ ഉള്ളൂ. നമ്മുടെയൊന്നും കമ്പ്യൂട്ടറില്‍ അത്രമാത്രം രഹസ്യങ്ങളൊന്നുമില്ലെങ്കിലും സൗദി അറേബ്യക്ക് പോകുന്നവരുടെ കമ്പ്യൂട്ടറില്‍ നമ്മള്‍ പണ്ട് സന്ദര്‍ശിച്ച X വിഡീയോ സൈറ്റിന്റെ ഹിസ്റ്ററിയോ നമ്മുടെ വാട്ട്‌സ് ആപ്പില്‍ അടുത്തിടെ കിട്ടിയ തുണ്ടോ ഒക്കെയുണ്ടെങ്കില്‍ പണികിട്ടാന്‍ അതുമതി. നമ്മുടെ കമ്പ്യൂട്ടര്‍ അരിച്ചുപെറുക്കുന്ന ഒരു രാജ്യമാണ് ഇസ്രായേല്‍. നമ്മുടെ കമ്പ്യൂട്ടര്‍ എടുത്ത് അവര്‍ ഒരു മണിക്കൂര്‍ നേരത്തേക്ക് അവര്‍ കൊണ്ടുപോകും. ഈ സമയത്ത് നമ്മുടെ കംപ്യൂട്ടറാണോ സോഷ്യല്‍ മീഡിയയാണോ അതോ രണ്ടുമാണോ അവര്‍ പരിശോധിക്കുന്നത്, അതില്‍ എന്താണവര്‍ ചെയ്യുന്നത് എന്നൊന്നും ഒരു പിടിയുമില്ല.
ഗ്ലോബല്‍ സിംകാര്‍ഡ്: യൂണിവേഴ്സല് അഡാപ്റ്റര്‍ എന്ന് പറയുന്നത് പോലെയാണ് എയര്‍പോര്‍ട്ടില്‍ വില്‍ക്കുന്ന ഗ്ലോബല്‍ സിംകാര്‍ഡുകളുടെയും സ്ഥിതി . നാട്ടില്‍ നിന്നും എന്റെയടുത്ത് വന്നിട്ടുള്ള എല്ലാവരും കൊച്ചിയില്‍നിന്നും ഗ്‌ളോബല്‍ സിംകാര്‍ഡ് വാങ്ങിവന്നവരാണ്. ഒരാളുടെ പോലും പറഞ്ഞവിധത്തില്‍ പ്രവര്‍ത്തിച്ചു കണ്ടിട്ടില്ല, ചിലരുടെ നമ്പര്‍ വര്‍ക്ക് ചെയ്യാതിരിക്കുമ്പോള്‍ ചിലരുടെ ഡേറ്റ വര്‍ക്ക് ചെയ്യില്ല, ചിലരുടെ പണം ഒറ്റയടിക്ക് പോകും, നാട്ടിലേക്ക് വിളിച്ചു കാര്യങ്ങള്‍ ശരിയാക്കാന്‍ പിന്നെയും സമയവും പണവും പോകും, ശെരിയായാല്‍ തന്നെ ശരിയായി വരുമ്പോഴേക്കും യാത്ര തീര്‍ന്നിട്ടുണ്ടാകും.
മിക്കവാറും രാജ്യങ്ങളില്‍ വിമാനമിറങ്ങുമ്പോള്‍ തന്നെ ഇപ്പോള്‍ അവിടുത്തെ സിംകാര്‍ഡ് ലഭ്യമാണ്, പലതും ഫ്രീയായിട്ട്. പത്ത് ഡോളര്‍ കൊടുത്താല്‍ ആവശ്യത്തില്‍ കൂടുതല്‍ ഡേറ്റയും കോളിംഗ് ടൈമും കിട്ടും. ചിലയിടത്ത് പാസ്സ്‌പോര്‍ട്ടിന്റെ കോപ്പി കൊടുക്കേണ്ടിവരും, മിക്കയിടത്തും അതുപോലും വേണ്ട. ആഫ്രിക്കയില്‍ ഒക്കെ ആണ് ഏറ്റവും വേഗത്തിലും വില കുറഞ്ഞും കാര്യം സാധിക്കുന്നത്, ഒരു മിനുട്ട് പോലും വേണ്ട ഫോണ്‍ ശരിയാക്കാന്‍, അഞ്ചു ഡോളറിന്റെ ചിലവേ ഉള്ളൂ. മൊബൈല്‍ ഫോണിനെ എങ്ങനെ സാധാരണ ജനങ്ങളെ ശാക്തീകരിക്കുന്ന ഒന്നാക്കാം എന്നതില്‍ ഇന്ത്യ അവിടെ നിന്നൊക്കെ ഏറെ പഠിക്കാനുണ്ട്. വിദേശത്ത് പോകുമ്പോള്‍ നാട്ടിലെ ഗ്ലോബല്‍ സിം കാര്‍ഡ് എടുക്കരുതെന്ന് പറഞ്ഞല്ലോ. ഒരു കാര്യം കൂടി ഉണ്ട്, നാട്ടിലെ സാധാരണ നമ്പര്‍ ഒരു കാരണവശാലും റോമിങ് ആക്കുകയും ചെയ്യരുത്, ഒടുവില്‍ കളസം കീറും.
Related Read - എവിടേക്കാണ് നാം യാത്ര പോകേണ്ടത്?
ഇതിന് അപവാദമായി എനിക്ക് അനുഭവമുണ്ടായത് മൂന്നു രാജ്യങ്ങളിലാണ്. ഒന്ന് ജപ്പാന്‍. ജപ്പാനല്ലേ, അവിടെ ഫോണും സിമ്മും ഒക്കെ എളുപ്പത്തില്‍ കിട്ടും എന്ന് കരുതി. എയര്‍പോര്‍ട്ടില്‍ അന്വേഷിച്ചപ്പോള്‍ അവിടെ സിംകാര്‍ഡ് വാടകക്ക് കിട്ടും, വാങ്ങാന്‍ പറ്റില്ല, ക്രെഡിറ്റ് കാര്‍ഡ് ഗ്യാരന്റി കൊടുക്കണം. ഒരു കാരണവശാലും ക്രെഡിറ്റ് കാര്‍ഡ് ഓപ്പണ്‍ എന്‍ഡഡ് ആയി ഞാന്‍ ആര്‍ക്കും കൊടുക്കാറില്ല. നമ്മുടെ ഫോണ്‍ ആരെങ്കിലും അടിച്ചു മാറ്റി ഉപയോഗിച്ചാല്‍ നമ്മളുടെ ബാങ്ക് കാലിയാകും. നഗരത്തില്‍ എത്തി അന്വേഷിച്ചു, ഒരാഴ്ച എടുക്കും ഒരു സിം കിട്ടാന്‍, പക്ഷെ ഒരു കണ്ടീഷന്‍ ഉണ്ട്, ആ നാട്ടിലെ ഒരു ഫോണ്‍ എടുക്കണം !. അത്യാവശ്യക്കാരന്‍ ആയതിനാല്‍ അത് ചെയ്തു. രണ്ടാമത്തേത് ഇറാന്‍. അവിടെ നാട്ടുകാര്‍ക്ക് സിം കിട്ടണമെങ്കില്‍ തന്നെ ആറുമാസം മുതല്‍ ഒന്‍പത് മാസം വരെ കാലതാമസമുണ്ട്. അവിടെ സിം ബുക്ക് ചെയ്ത് മറിച്ചുവിറ്റാല്‍ ആയിരം ഡോളര്‍ വരെ കിട്ടുമായിരുന്നു. (ഒരുകാലത്ത് നമ്മുടെ നാട്ടില്‍ മാരുതി കാറും ബജാജ് ഓട്ടോയും ഇതുപോലായിരുന്നു). മൂന്ന്, മ്യാന്‍മാര്‍. അവിടെ വിദേശികള്‍ക്ക് സിം വാങ്ങാന്‍ അനുമതിയില്ല. അതിനാല്‍ അവിടുത്തെ ടാക്‌സി ഡ്രൈവര്‍മാര്‍ അഞ്ച് ഡോളറിനൊക്കെ സിം ദിവസവാടകക്ക് കൊടുക്കും. ഇതൊക്കെ രണ്ടും മൂന്നും വര്‍ഷം മുമ്പത്തെ കാര്യമാണ്. മാറ്റമുണ്ടെങ്കില്‍ പറയണം. പക്ഷെ ഈ രാജ്യങ്ങളിലും നമ്മുടെ ഗ്ലോബല്‍ സിം എടുത്തിട്ട് കാര്യമില്ല. ചുരുക്കത്തില്‍ ഗ്ലോബല്‍ സിമ്മും ആയി ഗ്ലോബ് ചുറ്റാന്‍ പോകാതിരിക്കുന്നതാണ് ബുദ്ധി.
വിദേശത്തുനിന്നും ഇലക്ട്രോണിക് സാധനങ്ങള്‍ വാങ്ങുമ്പോള്‍: വിദേശയാത്രയില്‍ ഷോപ്പിങ്ങിന്റെ ഭാഗമായി ഇലക്ട്രോണിക് സാധനങ്ങള്‍ വാങ്ങുന്നവര്‍ പല കാര്യങ്ങളും ശ്രദ്ധിക്കണം. പ്‌ളഗ്ഗിന്റെയും സോക്കറ്റിന്റെയും കാര്യം ഇപ്പോള്‍ മനസിലായില്ലേ. അതുപോലെതന്നെ യൂറോപ്യന്‍ രാജ്യങ്ങളില്‍ കിട്ടുന്ന കമ്പ്യൂട്ടറുകളുടെ കീബോര്‍ഡുകള്‍ പലതും നമ്മുടേതു പോലെയല്ല. ഇംഗിഷ് കീബോര്‍ഡ് എന്ന് പറഞ്ഞാല്‍ ചിലപ്പോള്‍ കിട്ടും. ഇലക്ട്രോണിക്‌സിന്റെ മെക്കയായ ജപ്പാനില്‍ പോലും നമുക്ക് പരിചയമുള്ള കീബോര്‍ഡ് കിട്ടണമെങ്കില്‍ ചിലപ്പോള്‍ ഒരാഴ്ച മുന്നേ ഓര്‍ഡര്‍ ചെയ്യേണ്ടിവരും. ഇന്റര്‍നെറ്റിന്റെ കാലത്ത് ഇന്‍സ്ട്രക്ഷന്‍ മനുവലിന് വലിയ പ്രസക്തിയില്ല. എന്നാലും ഇതിലൊക്കെ താല്പര്യമുള്ളവര്‍ ജനീവയില്‍ കിട്ടുന്ന കംപ്യൂട്ടറിനോ കാമറക്കോ ഒന്നും ഇംഗ്ലീഷില്‍ യാതൊരു നിര്‍ദ്ദേശവും ഉണ്ടാകില്ലെന്ന് ഓര്‍മ്മ വെക്കണം.
ഗ്ലോബല്‍ വാറണ്ടി: ഇലക്ട്രോണിക് ഐറ്റം വാങ്ങുമ്പോള്‍ അത് കൊച്ചിയില്‍ നിന്നാണെകിലും ദുബായില്‍ നിന്നാണെങ്കിലും 'സാറേ ഒരു കുഴപ്പവും ഇല്ല, ഗ്ലോബല്‍ വാറണ്ടിയാണെന്ന്' അവര്‍ ഉറപ്പായും പറയും, കാര്യമാക്കണ്ട. മലയാളികളുടെ കച്ചവടത്തിന്റെ രീതി എന്നാല്‍ കച്ചവടം നടത്താനായി എന്തു നുണയും പറയും എന്നതാണ്. ''സാറെ, ഇന്നുതന്നെ ഡെലിവര്‍ ചെയ്യാം'' എന്നുപറയുന്ന സാധനം വീട്ടിലെത്തുന്നത് ഒരാഴ്ച കഴിഞ്ഞാകും. 'ഈ ഫിലിം ജനലിന്റെ പുറത്തു ഒട്ടിച്ചാല്‍ വീടിനകത്ത് 90 ശതമാനം ചൂടുകുറയും', എന്നൊക്കെ പറഞ്ഞ് കൂളായി പണവും വാങ്ങി ഫിലിമൊട്ടിച്ച് പണിക്കാരന്‍ പോകും. ഒരാഴ്ച കഴിയുമ്പോഴാണ് നമുക്ക് മനസ്സിലാകുന്നത് അയാള്‍ ഒട്ടിച്ചത് ഫിലിം മാത്രമല്ല, നമ്മളേം കൂടിയാണെന്ന്. ഇതൊക്കെ നാട്ടുനടപ്പായതിനാല്‍ നാട്ടിലൊരു കമ്പ്യൂട്ടര്‍ വാങ്ങിയാല്‍ ഗ്ലോബല്‍ വാറണ്ടി ആണെന്ന് പറയുന്നതൊന്നും കാര്യമാക്കേണ്ട. കംപ്യൂട്ടറുകള്‍ക്കൊന്നും സാധാരണ ഗതിയില്‍ വലിയ കുഴപ്പം വരാറില്ല എന്നത് മാത്രമാണ് ഒരു ആശ്വാസം.
യാത്രക്കിടക്ക് പരിപ്പ് വേവിക്കരുത്: ഇന്ത്യയില്‍ തന്നെയും വിദേശത്തും യാത്ര പോകുന്ന ചിലര്‍ നാട്ടിലെ ചൂട് വെള്ളത്തിലെ കുളിയുടെ പതിവ് മുടക്കാതിരിക്കാന്‍ വേണ്ടി ഇമ്മെര്‍ഷന്‍ ഹീറ്ററും പരിപ്പുകറി ഉണ്ടാക്കാന്‍ വേണ്ടി ഇന്‍ഡക്ഷന്‍ കുക്കറും ഒക്കെയായി യാത്ര ചെയ്യുന്നത് കണ്ടിട്ടുണ്ട്. കുഴപ്പത്തിലാകാന്‍ മറ്റൊന്നും വേണ്ട. ഇത്തരം പല ഉപകരണങ്ങളും മറ്റുനാടുകളില്‍ അംഗീകരിക്കപ്പെട്ടിട്ടുള്ളതല്ല, ഹോട്ടല്‍ റൂമുകളില്‍ നമ്മള്‍ കൊണ്ട് ചെല്ലുന്ന ഉപകരണങ്ങള്‍ ഉപയോഗിക്കാന്‍ നിയമപരമായ വിലക്കുകള്‍ ഉണ്ട്. അത് പോലെ തന്നെ അവിടെ ഇരിക്കുന്ന കെറ്റില്‍ എടുത്ത് നൂഡില്‍സ് ഉണ്ടാക്കി കഴിക്കാന്‍ 'വിദഗ്ദ്ധ ഉപദേശം' ഒക്കെ കിട്ടും. പക്ഷെ തെറ്റായ എന്തെങ്കിലും പണി കാണിച്ചിട്ട് അപകടം ഉണ്ടായാല്‍ 'അയ്യോ സാറേ അബദ്ധം പറ്റിയതാണെന്ന്' എന്നൊന്നും പറഞ്ഞിട്ട് കാര്യമില്ല. പെട്ടാല്‍ പെട്ടു. എല്ലാ രാജ്യങ്ങളിലെയും ഷേക്കുമാര്‍ കേരളത്തില്‍ വരാറില്ല എന്ന കാര്യം യാത്ര ചെയ്യുമ്പോള്‍ നാം എപ്പോഴും ഓര്‍ക്കണം.
