മൈസൂരിലെ യാദവഗിരിയിലാണ് സാധാരണക്കാരന്റെ ആത്മകഥ എന്ന് വിശേഷിപ്പിക്കാന്‍ കഴിയുന്ന 'മാല്‍ഗുഡി ഡേയ്‌സ്' (Malgudi Days) എന്ന പുസ്തകം എഴുതിയ ആര്‍ കെ നാരായണ്‍ മൂന്നു നാല് പതിറ്റാണ്ടുകള്‍ താമസിച്ച വീട്. 1948 ല്‍ തുടങ്ങി 1952 ല്‍ പണിതീര്‍ന്ന വീട്  തൊണ്ണൂറുകളില്‍ അദ്ദേഹം മദ്രാസിലേക്ക് താമസം മാറ്റിയതിനു ശേഷം ഏറെക്കാലം ഉപേക്ഷിക്കപ്പെട്ട അവസ്ഥയിലായിരുന്നു. 2016 ല്‍ മൈസൂര്‍ നഗര സഭ ഏറ്റെടുത്ത് ഒരു ചെറു സ്മാരകമാക്കി മാറ്റിയിരിക്കുന്നു. മൈസൂരില്‍ ഈ വീട്ടില്‍ മാത്രമായിരുന്നില്ല നാരായണ്‍ തന്റെ സര്‍ഗാത്മക കാലങ്ങള്‍ ചെലവഴിച്ചത്. ഇതിനു മുമ്പ് ലക്ഷ്മിപുരത്തും മറ്റുമായി രണ്ടോ മൂന്നോ വീടുകളിലായാണ് സ്‌കൂള്‍ കാലഘട്ടം മുതല്‍  അദ്ദേഹം താമസിച്ചിരുന്നത്. വിവിധ ദേശങ്ങളില്‍ നിന്നുള്ള ആളുകള്‍ വെളുത്ത ചായം പൂശിയ ഈ ഇരുനിലക്കെട്ടിടത്തിന്റെ അകത്തും പുറത്തും ആ എഴുത്തുകാരന്റെ കാല്‍പാടുകളും, കൈപ്പാടുകളും തേടി നിരന്തരം എത്തിച്ചേരുന്നു.

RK Narayan 2

എണ്‍പതുകളില്‍ ദൂരദര്‍ശന്റെ പുഷ്‌കല കാലങ്ങളില്‍ നിറഞ്ഞു നിന്ന 'മാല്‍ഗുഡി ഡേയ്‌സ്' എന്ന ടി വി സീരിയല്‍ കണ്ടപ്പോഴാണ് ഞാന്‍ ആദ്യമായി ആര്‍ കെ നാരായണന്റെ പുസ്തകങ്ങളിലേക്ക് RK Narayanആകര്ഷിക്കപ്പെടുന്നത്. മുപ്പത്തിയാറാം വയസ്സില്‍ ഒരപകടത്തില്‍ അന്തരിച്ച ഉഡുപ്പി സ്വദേശി ശങ്കര്‍ നാഗ് (Shankar Nag) എന്ന അതുല്യ പ്രതിഭയുടെ കാഴ്ചയിലൂടെ മാല്‍ഗുഡി പുനര്‍ജനിച്ചപ്പോള്‍ അത് സാഹിത്യത്തിന്റെ അനുരൂപീകരണത്തിന് ഏറ്റവും ഉത്തമമായ ഉദാഹരണമായി. ലളിത സാധാരണമായ പരിസരങ്ങളും, മനുഷ്യരും നിറഞ്ഞു നില്‍ക്കുന്ന നാരായണന്റെ സാഹിത്യലോകത്തെ അതിന്റെ തനത് സൗന്ദര്യവും, ആഴവും നഷ്ടപ്പെടാതെ ദൃശ്യ ഭാഷ്യം നല്‍കാന്‍ ശങ്കര്‍ നാഗിന് കഴിഞ്ഞു. കാന്തി മടിയ എന്ന ഗുജറാത്തി നടനും, ശങ്കര്‍ നാഗിന്റെ ഭാര്യ അരുന്ധതി നാഗും അഭിനയിച്ച 'ഒരു കുതിരയും രണ്ട് ആടുകളും' (A Horse and two Goats)  'മാല്‍ഗുഡി ഡേയ്‌സ്' (Malgudi Days) എന്ന കഥാ സമാഹാരത്തിലെ എന്നെ ഏറെ ആകര്‍ഷിച്ച കഥയാണ്. മുനി എന്ന ദരിദ്ര കര്‍ഷകനും, ഒരു വിദേശിയും തമ്മില്‍ നടത്തുന്ന സംസാരം നര്‍മത്തോടൊപ്പം, അധിനിവേശാനന്തര സാഹിത്യ പ്രത്യയശാസ്ത്രങ്ങളും, സിദ്ധാന്തങ്ങളും പ്രതിഫലിപ്പിക്കുകയും, സാഹിത്യലോകത്ത് നാരായണന്റെ സ്ഥാനം വ്യക്തമായി അടയാളപ്പെടുത്തുകയും ചെയ്യുന്നു. മാല്‍ഗുഡി എന്ന സാങ്കല്പിക ഭൂപ്രദേശം കോളനിവല്‍ക്കരണത്തിന്റെ ക്ലിപ്തമായ പരിധികളെ വെല്ലുവിളിക്കുന്നു. 

'ദ മിസ്‌ഗൈഡഡ് ഗൈഡ്' (The Misguided Guide) എന്ന ലേഖനത്തില്‍ മൈസൂരിലെ യാദവഗിരിയിലെ ഈ വീട്ടില്‍ വെച്ച് നടന്‍ ദേവാനന്ദുമായി നടത്തിയ കൂടിക്കാഴ്ച അദ്ദേഹം അനുസ്മരിക്കുന്നുണ്ട്. ഈ വീട്ടിലെ ഡൈനിങ്ങ് റൂമില്‍ അദ്ദേഹത്തെ സൗത്ത് ഇന്ത്യന്‍ പ്രാതല്‍ കൊണ്ട് സല്‍കരിച്ചതിന്റെ വിവരണം ഞാനോര്‍ത്തു. അത് 'ദ ഗൈഡ്' (The Guide) എന്ന നോവല്‍ സിനിമയാക്കാനുള്ള പദ്ധതിയുടെ പ്രാരംഭഘട്ട ചര്‍ച്ചകളായിരുന്നു. അറുപതുകളുടെ മധ്യത്തില്‍ പുറത്തിറങ്ങിയ 'ദ ഗൈഡ്' എന്ന സിനിമ ആ നോവല്‍ പ്രത്യക്ഷമായും, പരോക്ഷമായും മുന്നോട്ടുവെയ്ക്കുന്ന കാഴ്ചപ്പാടുകളും, രാഷ്ട്രീയവുമൊക്കെ ഫില്‍മി ഫോര്‍മുലകള്‍ കൊണ്ട് വിഴുങ്ങിക്കളയുന്നു എന്നാണെന്റെ അഭിപ്രായം. അഡാപ്‌റ്റേഷന്റെ നിരാശപ്പെടുത്തുന്ന ദൃശ്യഭാഷ്യമാണത്. ആര്‍ കെ നാരായണ്‍ ആ കാലങ്ങളെ വേദനയോടെ അനുസ്മരിക്കുന്നുണ്ട്.  സാഹിത്യത്തെയും, ചരിത്രത്തെയും സിനിമയുടെ വികലമായ രസതന്ത്രങ്ങള്‍ പുനഃസ്ഥാപിക്കുന്ന ശോചനീയമായ പ്രവണതകളുടെ കാലത്ത് ശങ്കര്‍ നാഗിനെപ്പോലെയുള്ള പ്രതിഭകള്‍ ചെറുത്തുനില്‍പ്പിന്റെ പ്രബലമായ ശബ്ദമാകുന്നു.
RK Narayan 3

Santhosh Kanaരാശിപുരം കൃഷ്ണസ്വാമി നാരായണന്‍ എന്ന ആര്‍ കെ നാരായണന്റെ വീടന്വേഷിച്ച് ഇറങ്ങിയ എനിക്ക് വേണ്ടി സിദ്ധാര്‍ത്ഥ ലേ ഔട്ടില്‍ കാത്തുനിന്നത് കൃഷ്ണസ്വാമി എന്ന ഓട്ടോ ഡ്രൈവര്‍ ആണെന്നത് ആശ്ചര്യകരമായ യാദൃശ്ചികതയായത് എന്നിലെ ഉന്മേഷം വര്‍ധിപ്പിച്ചു. രാവിലെ കൃത്യം പത്തു മണിക്ക് തന്നെ ഡ്യൂട്ടിയിലുണ്ടായിരുന്ന കെയര്‍ ടേക്കര്‍ നേത്രാവതി 'അമ്മ ഗേറ്റ് തുറന്ന് എന്നെ നാരായണന്റെ ലോകത്തേക്ക് സ്വാഗതം ചെയ്തു.

കൂറ്റന്‍ വേപ്പുമരം തണല്‍ പരത്തിയ, പിങ്കും ഓറഞ്ചും നിറത്തിലുള്ള ബോഗണ്‍വില്ല പൂക്കള്‍ പൂത്തുനിന്ന ആ വീടിന്റെ മുന്നിലും ചുറ്റിലുമായി ധാരാളം പച്ചപ്പുണ്ട്. ചെറു വരാന്ത കടന്ന് അകത്തേക്ക് കയറിയാല്‍ ആദ്യം കാണുന്നത് ഒരു ഒഴിഞ്ഞ കസേര വെച്ച വലിയ ഹാള്‍ ആണ്. ചുമരുകളും, തട്ടുകളും നാരായണന്റെ ജീവിതത്തിലെ വിവിധ ഘട്ടങ്ങള്‍ പകര്‍ത്തിയ ചിത്രങ്ങള്‍, അദ്ദേഹത്തിന് ലഭിച്ച ബഹുമതികള്‍ എന്നിവ കൊണ്ട് അലങ്കരിക്കപ്പെട്ടിരിക്കുന്നു. ബുക്ക് ഷെല്ഫുകളില്‍ 'മൈ ഡേയ്‌സ്' (My Days) എന്ന അദ്ദേഹത്തിന്റെ ആത്മകഥ മുതല്‍ വിവിധ സാഹിത്യ കൃതികള്‍ അടുക്കി വെച്ചിരിക്കുന്നു. നാരായണനും, ഭാര്യയുമൊത്തുള്ള ബ്ലാക്ക് ആന്‍ഡ് വൈറ്റ് ഫോട്ടോ ഒരു നിമിഷം 'ദി ഇംഗ്ലീഷ് ടീച്ചര്‍' (The English Teacher) എന്ന നോവലിലൂടെ അദ്ദേഹം ഏറെ വിഷാദത്തോടെ അവതരിപ്പിച്ച ജീവിതത്തിലെ ദുരന്തത്തെ ഓര്‍മിപ്പിച്ചു. വെറും ആറു വര്‍ഷത്തെ ദാമ്പത്യ ജീവിതത്തിനു ശേഷം 1939 ല്‍ അദ്ദേഹത്തിന്റെ ഭാര്യ രാജം മരിക്കുന്നതും (അത് ഈ വീട്ടില്‍ വെച്ചായിരുന്നില്ല) അതിനു ശേഷം അദ്ദേഹം അനുഭവിക്കുന്ന ഏകാന്തതയും ആ നോവല്‍  തീവ്രമായി വായനക്കാരിലേക്ക് പകരുന്നു. 'A profound and unmitigated loneliness is the only truth of life, all else is false' എന്നദ്ദേഹം കുറിക്കുന്നു. വര്‍ഷങ്ങള്‍ക്ക് ശേഷം മകളുടെ മരണത്തിലൂടെ ദുരന്തങ്ങളും ദുഃഖങ്ങളും വീണ്ടും നാരായണനെ പരീക്ഷിച്ചു. എങ്കിലും അദ്ദേഹത്തിന്റെ സാഹിത്യലോകത്ത് മുഖ്യമായും നില കൊണ്ടത് മിട്ടായി വില്പനക്കാരുടെയും, ചില്ലറ കച്ചവടക്കാരുടെയും, കര്‍ഷകരുടെയും പോലെ മുഖ്യധാരാ ഭൂപ്രദേശങ്ങളില്‍ നിന്ന് മാറി അരികില്‍ ജീവിക്കുന്ന മനുഷ്യരുടെ നിത്യജീവിത സംഘര്‍ഷങ്ങളും, നര്‍മങ്ങളും, ചെറുത്തു നില്പുകളുമാണ്. ഈ ഇരുനില വീടിന്റെ താഴത്തെ ബാക്കി രണ്ടു മുറികളില്‍ നാരായണ്‍ ഉപയോഗിച്ച വസ്ത്രങ്ങളും, അദ്ദേഹത്തെക്കുറിച്ച് ഖുശ്വന്ത് സിംഗ്, ഗ്രഹാം ഗ്രീന്‍, എന്‍ റാം തുടങ്ങി വിവിധ മേഖലകളിലെ വ്യക്തികള്‍  നടത്തിയ അനുസ്മരണങ്ങളും കാണാം.

RK Narayan 4

മുകളിലത്തെ നിലയില്‍ മൂന്നു മുറികളിലായി വിവിധതരം സ്മരണികകള്‍ സൂക്ഷിച്ചു വെച്ചിരിക്കുന്നു. 'മാല്‍ഗുഡി ഡേയ്‌സ്' എന്ന സീരിയല്‍ ചിത്രീകരണ സമയത്തെ ലൊക്കേഷന്‍ ചിത്രങ്ങളും, അലമാരകളിലെ അല്പം പുസ്തകങ്ങളില്‍ 'സ്വാമി ആന്‍ഡ് ഫ്രണ്ട്‌സ്' (Swami and Friends) എന്ന നോവലിന്റെ മലയാളം തര്‍ജ്ജമയും കണ്ടു. നാഷണല്‍ ബുക്ക് ട്രസ്റ്റ് പുറത്തിറക്കിയ 'സ്വാമിയും കൂട്ടുകാരും' എന്ന പുസ്തകം  പ്രൊഫസര്‍ കെ എം തരകനാണ് തര്‍ജമ ചെയ്തിരിക്കുന്നത്. ഹര്‍ഭജന്‍ സിംഗ് ചെയ്ത പഞ്ചാബി തര്‍ജ്ജമയുമുണ്ട് കൂട്ടത്തില്‍. ഫ്രഞ്ചിലും ഇംഗ്ലീഷിലുമായി നാരായണന്റെ സാഹിത്യത്തെ കുറിച്ചുള്ള ഒരു പ്രബന്ധവും കണ്ടു. മുകളിലത്തെ വരാന്തയില്‍ നിന്ന് നോക്കിയാല്‍ ചെമ്പകപ്പൂക്കള്‍ നിറഞ്ഞ അങ്കണവും ഉന്നത മധ്യവര്‍ഗ കോളനിയായ യാദവഗിരിയിലെ വിസ്തൃതമായ വീഥിയും കാണാം. 

RK Narayan 5

സാഹിത്യ വിദ്യാര്‍ത്ഥികള്‍ക്കും, സാഹിത്യ പ്രേമികള്‍ക്കും ഒരു കാല്പനിക കൗതുകമെന്ന രീതിയില്‍ സന്ദര്‍ശിക്കാന്‍ പറ്റിയ ഇടമാണ് ഈ വീട്. അതില്‍ കവിഞ്ഞ് നാരായണന്റെ സാഹിത്യലോകത്തെക്കുറിച്ച് പഠനം നടത്തുന്നവര്‍ക്ക് ഒരുപാടൊന്നും സഹായകരമാകില്ല ഇവിടം. അതെന്നെ ചിന്തിപ്പിച്ചു, എഴുത്തുകാര്‍ക്കും, കലാകാരന്മാര്‍ക്കും സ്മാരകങ്ങള്‍ ഉണ്ടാകുന്നതെന്തുകൊണ്ടാണ്? അവരുടെ ഭൗതിക ജീവിത പരിസരങ്ങള്‍ സംരക്ഷിക്കപ്പെടുന്നത് തികച്ചും ശ്‌ളാഘനീയം തന്നെ. അത്തരം ഇടങ്ങളിലേക്ക് നടത്തുന്ന കാല്പനികവും , പ്രബോധകരവുമായ സാംസ്‌കാരിക തീര്ഥയാത്രകളും. പക്ഷെ, ഒരെഴുത്തുകാരന്റെ മേല്‍വിലാസം അന്വേഷിക്കേണ്ടത് അയാളുടെ പുസ്തകങ്ങളിലാണ്. അയാളുടെ വിരല്‍പാടുകളും, കാല്‍പാടുകളും പതിഞ്ഞിരിക്കുന്നത് വാക്കുകളുടെ മഷികൊണ്ടുണ്ടാക്കിയ പുസ്തകങ്ങളുടെ ഭാവനാസമ്പന്നമായ വിശാല ലോകത്താണ്. അവിടെ മനുഷ്യര്‍ക്കും, ഭൂപ്രദേശങ്ങള്‍ക്കും ഒറ്റമുഖമല്ല. വായനക്കാരന്റെ ഭാവനയുടെ ഫലഭൂയിഷ്ഠമായ ലോകത്ത് ആ മനുഷ്യര്‍ സ്വതന്ത്രമായി, ഓരോ വ്യാഖ്യാനത്തിലൂടെ ജീവിച്ചും അതിജീവിച്ചും വിഹരിക്കുന്നു. സ്മാരക നിര്‍മിതികളും, സംരക്ഷണവുമൊക്കെ എഴുത്തിലേക്കും, എഴുത്തുകാരന്റെ ദര്‍ശനങ്ങളിലേക്കും, മനുഷ്യരിലേക്കും, അവരുടെ ജീവിത  പരിസരങ്ങളിലേക്കും, സാമൂഹിക യാഥാര്‍ഥ്യങ്ങളിലേക്കുമുള്ള യാത്രകളുടെ പ്രാഥമിക ചുവടുവെപ്പുകള്‍ മാത്രമാകട്ടെ എന്നും, വരും കാലങ്ങളില്‍ ഇതൊരു ശ്രേഷ്ഠമായ പഠന കേന്ദ്രം കൂടിയായി മാറട്ടെ എന്നും പ്രത്യാശിക്കാം.

RK Narayan 6

നാരായണന്റെ വീട്ടില്‍ നിന്നും തിരിക്കുമ്പോള്‍ കൂടെ താല്പര്യത്തോടെ മണിക്കൂറുകള്‍ ചെലവഴിച്ച കൃഷ്ണസ്വാമി എന്ന ഡ്രൈവറിലും, ജഗ്മോഹന്‍ പാലസ് ആര്‍ട് ഗാലറിയുടെ മുന്നിലുള്ള നടപ്പാതയില്‍ പഴയ ടൈപ്പ് റൈറ്റിംഗ് മെഷീനില്‍ നിത്യജീവിത വ്യവഹാര പ്രമാണങ്ങള്‍ തയ്യാറാക്കി ഉപജീവനം നടത്തുന്ന പാണ്ഡുരംഗനിലുമൊക്കെ മാല്‍ഗുഡി തെളിഞ്ഞു നിന്നു. എഴുത്തുകാരന്‍ ആ വീടിനകത്തല്ല എന്നും, അകത്തിരുന്ന് സൃഷ്ടിച്ച പുറം ലോകത്താണെന്നും അവര്‍ ആവര്‍ത്തിച്ച് ഓര്‍മിപ്പിക്കുന്നു. 

Content Highlights: Malgudi Days, RK Narayan, House of RK Narayan