തൃശ്ശൂർ: ഒരു സിദ്ധാന്തത്തിന്റെ ഭാഗമായി മാത്രം നിൽക്കുമ്പോൾ ലോകത്തെ അറിയാതെ പോകുന്നതായി ശ്രീശ്രീ രവിശങ്കർ പറഞ്ഞു. ആർട് ഓഫ് ലിവിങ് സംഘടിപ്പിച്ച ശിവസൂത്രജ്ഞാനയജ്ഞത്തിന്റെ സമാപനദിനത്തിൽ പ്രഭാഷണം നടത്തുകയായിരുന്നു അദ്ദേഹം.
ചൈനയിൽ കമ്യൂണിസവും മാവോയിസവും ഇല്ലാതായി. റഷ്യയിൽ ലെനിന്റെ പ്രതിമപോലും നീക്കംചെയ്തു. അവിടെ പലയിടത്തും ഇന്ന് ലെനിൻ ആരാണെന്നുപോലും അറിയില്ല. പക്ഷേ, റഷ്യയ്ക്ക് പുറത്തുനിന്ന് ലെനിനെ തേടി കമ്യൂണിസ്റ്റുകൾ എത്തുന്നു. ഒരു സിദ്ധാന്തത്തിന്റെ മാത്രം ഭാഗമാകുന്നതുകൊണ്ടാണിത്. കേരളത്തിൽ കമ്യൂണിസ്റ്റുകാരും വർഗീയവാദികളും കൊലനടത്തുന്നതും ഇതുകൊണ്ടുതന്നെയാണ്.
ഒന്നിൽമാത്രം നിൽക്കുമ്പോൾ ലോകത്തിന്റെ വിശാലത അറിയുന്നില്ല. മനസ്സിനെ പറയുന്നത് അന്തരംഗം എന്നാണ്. രംഗമെന്നാൽ വേദിയാണ്. അവിടെ നമ്മുടെ ആഗ്രഹങ്ങൾ നൃത്തം ചെയ്യുന്നു. ആഗ്രഹങ്ങളെ അടിച്ചമർത്തരുത്. അത് അകത്തെ ഊർജത്തിൽനിന്നു വരുന്നതാണ്. മനസ്സിനകത്തേക്കു നോക്കിയാൽ നമ്മുടെ ആത്മാവ്‌ സന്തോഷത്തോടെ നൃത്തം ചെയ്യുന്നതു തിരിച്ചറിയാനാകും -അദ്ദേഹം പറഞ്ഞു. 10,000 പേരാണ് ശിവസൂത്രപരിശീലനത്തിനായി എത്തിയത്.
