ഇരിങ്ങാലക്കുട: കേരള കോണ്‍ഗ്രസ് (എം.) ഇരിങ്ങാലക്കുട നിയോജകമണ്ഡലം കമ്മിറ്റി പിളര്‍പ്പിലേക്ക്. നിയോജകമണ്ഡലം പ്രസിഡന്റ് റോക്കി ആളൂക്കാരന്റെ അധ്യക്ഷതയില്‍ റെസ്റ്റ് ഹൗസില്‍ ചേര്‍ന്ന ജനറല്‍ ബോഡി യോഗം ജോസഫ് വിഭാഗത്തിന് പിന്തുണ പ്രഖ്യാപിച്ചപ്പോള്‍ ജില്ലാ സെക്രട്ടറി ടി.കെ. വര്‍ഗ്ഗീസിന്റെ അധ്യക്ഷതയില്‍ പ്രിയാ ഹാളില്‍ നടന്ന യോഗം ജോസ് കെ. മാണിക്ക് പിന്തുണ പ്രഖ്യാപിച്ചു.
റോക്കി ആളൂക്കാരനെ പുറത്താക്കി നിയോജകമണ്ഡലം പ്രസിഡന്റായി ഇ.വി. ആന്റോയെ തിരഞ്ഞെടുത്തു.
റെസ്റ്റ് ഹൗസില്‍ ചേര്‍ന്ന യോഗം മുന്‍ എം.എല്‍.എ.യും കേരള കോണ്‍ഗ്രസ് ഹൈപവര്‍ കമ്മിറ്റിയംഗവുമായ തോമസ് ഉണ്ണിയാടന്‍ ഉദ്ഘാടനം ചെയ്തു.
സി.എഫ്. തോമസ് ചെയര്‍മാനും പി.ജെ. ജോസഫ് വര്‍ക്കിങ്ങ് ചെയര്‍മാനുമായ ഔദ്യോഗിക കേരള കോണ്‍ഗ്രസ് എമ്മിന് പിന്തുണ പ്രഖ്യാപിച്ച് യോഗം പ്രമേയം പാസ്സാക്കി. നിയോജകമണ്ഡലം കമ്മിറ്റിയിലെ 56 പേരില്‍ 50 പേരും ഒമ്പതു മണ്ഡലം പ്രസിഡന്റുമാരില്‍ ഏഴുപേരും തങ്ങളോടൊപ്പമാണെന്ന് ഇവര്‍ അവകാശപ്പെട്ടു.
ആറുനിയോജകമണ്ഡലം ഭാരവാഹികളില്‍ അഞ്ചുപേരും അഞ്ചു സംസ്ഥാന കമ്മിറ്റിയംഗങ്ങളില്‍ നാലുപേരും യോഗത്തില്‍ പങ്കെടുത്തതായി നേതാക്കള്‍ പറഞ്ഞു.
ജില്ലാ പ്രസിഡന്റ് സി.വി. കുര്യാക്കോസ് മുഖ്യപ്രഭാഷണം നടത്തി.
ജോണ്‍സണ്‍ കാഞ്ഞിരത്തിങ്കല്‍, മിനി മോഹന്‍ദാസ്, സിജോയ് തോമസ്, ഷൈനി ജോജോ, ശിവരാമന്‍ കൊല്ലംപറമ്പില്‍, ജോസ് ചെമ്പകശ്ശേരി, വര്‍ഗ്ഗീസ് മാവേലി, കെ. സതീശന്‍ തുടങ്ങിയവര്‍ പങ്കെടുത്തു.
പ്രിയാ ഹാളില്‍ ചേര്‍ന്ന യോഗം കേരള കോണ്‍ഗ്രസ് സ്റ്റിയറിങ് കമ്മിറ്റി അംഗം ബേബി മാത്യൂ കാവുങ്കല്‍ ഉദ്ഘാടനം ചെയ്തു.
പാര്‍ട്ടിയില്‍ കാര്യമായ മേല്‍വിലാസമില്ലാതിരുന്ന തോമസ് ഉണ്ണിയാടനെ ഇരിങ്ങാലക്കുടയിലേക്കു കൊണ്ടുവന്ന് ജനപ്രതിനിധിയാക്കി ഉയര്‍ത്തിയത് തങ്ങളാണെന്നും ഉണ്ണിയാടനും സി.വി. കുര്യാക്കോസുമടക്കമുള്ളവര്‍ പാര്‍ട്ടിയെ വഞ്ചിച്ചിരിക്കുകയാണെന്നും അദ്ദേഹം കുറ്റപ്പെടുത്തി.
ബിജു ആന്റണി, ജൂലിയസ് ആന്റണി, കാറളം പഞ്ചായത്തംഗം കെ.ബി. ഷെമീര്‍, പി.ആര്‍. സുശീലന്‍, എം.കെ. ജോളി, ഡേവിസ് ചക്കാലയ്ക്കല്‍, അഡ്വ. ജിജോ, വിജി സി.എസ്. തുടങ്ങിയവര്‍ പങ്കെടുത്തു. നിയോജകമണ്ഡലം എക്സിക്യുട്ടീവ് അംഗങ്ങളിലെ 35 പേരില്‍ 22 പേരും തങ്ങളോടൊപ്പമാണെന്നും അഞ്ച് മണ്ഡലം പ്രസിഡന്റുമാരും യോഗത്തില്‍ പങ്കെടുത്തതായും ഇവര്‍ അവകാശപ്പെട്ടു.
