തിരുവനന്തപുരം : റിപ്പബ്ലിക് ദിനാഘോഷത്തിന്റെ ഭാഗമായി സെൻട്രൽ സ്റ്റേഡിയത്തിൽ നടക്കുന്ന പരേഡിനോടനുബന്ധിച്ച് വിപുലമായ സുരക്ഷാ ക്രമീകരണങ്ങൾ ഏർപ്പെടുത്തിയതായി തിരുവനന്തപുരം സിറ്റി പോലീസ് കമ്മിഷണർ ബൽറാംകുമാർ ഉപാദ്ധ്യായ അറിയിച്ചു.
നാല് മേഖലകളായി തിരിച്ചാണ് സുരക്ഷയൊരുക്കുന്നത്. ഓരോ മേഖലയുടെയും മേൽനോട്ട ചുമതല അസിസ്റ്റന്റ് കമ്മിഷണർമാർക്കായിരിക്കും. ഇൻസ്‌പെക്ടർമാരുടെ നേതൃത്വത്തിൽ സ്റ്റേഡിയത്തിനകത്തും പുറത്തുമായി 200 പോലീസുകാരെ വിന്യസിക്കും.
കൂടാതെ നഗരത്തിലെ പ്രധാന സ്ഥലങ്ങൾ കേന്ദ്രീകരിച്ച് ഏഴ് സ്‌പെഷ്യൽ സ്‌ട്രൈക്കിങ്‌ ഫോഴ്‌സുകളും ഏർപ്പെടുത്തിയിട്ടുണ്ട്. ഗവൺമെന്റ് ക്ഷണിക്കപ്പെട്ടിട്ടുള്ള നൂറ് അതിഥികൾ ഒഴികെ, മറ്റു പൊതുജനങ്ങൾക്ക് സ്റ്റേഡിയത്തിൽ പ്രവേശനം അനുവദിക്കില്ല. ഡെപ്യൂട്ടി കമ്മിഷണർ ഡോ. ദിവ്യ വി. ഗോപിനാഥിനായിരിക്കും റിപ്പബ്ലിക് ദിന സുരക്ഷാ ക്രമീകരണങ്ങളുടെ പൂർണ ചുമതലയെന്നും കമ്മിഷണർ അറിയിച്ചു.
