കൈവീശിയാല്‍ കാര്‍ താനെ സ്റ്റാര്‍ട്ട് ആവുന്നത് ജാലവിദ്യയാണെന്ന് ധരിച്ചേക്കാം. എന്നാല്‍ ടെക്സാസില്‍ അതിന് സാധിക്കുന്നൊരാളുണ്ട് ടെക്‌സാസ് സ്വദേശിയായ അമി ഡിഡി.
സോഫ്റ്റ് വെയര്‍ എഞ്ചിനീയറും ഒരു ബയോ ഹാക്കറുമായ അമി തന്റെ ടെസ്‌ല മോഡല്‍ 3 കാറിന്റെ കീകാര്‍ഡില്‍ നിന്നുള്ള ചിപ്പ് സ്വന്തം കൈക്കുള്ളില്‍ ഘടിപ്പിച്ചാണ് ഇത് സാധ്യമാക്കിയത്.
നേരത്തെ തന്നെ മറ്റൊരു ചിപ്പ് അമി തന്റെ കൈക്കുള്ളില്‍ ഘടിപ്പിച്ചിരുന്നു. വീടിന്റെ മുന്‍വാതില്‍ തുറക്കാനും സ്മാര്‍ട്‌ഫോണിലെ തന്റെ വെബ്‌സൈറ്റ് എളുപ്പം തുറക്കാനുമാണ് അമി ഈ ചിപ്പ് ഉപയോഗിച്ചത്.
എടിഎം കാര്‍ഡിന്റെ വലിപ്പമുള്ള ആര്‍എഫ്‌ഐഡി കാര്‍ഡ് ആണ് ടെസ്‌ല കാറുകളുടെ ചാവി ആയി ഉപയോഗിക്കുന്നത്. ഇതിനകത്തുള്ള ചിപ്പിലെ ഡാറ്റ തന്റെ കൈക്കുള്ളിലെ ചിപ്പിലേക്ക് മാറ്റാന്‍ ശ്രമിച്ചുവെങ്കിലും അമിയ്ക്ക് അതിന് സാധിച്ചില്ല.
തുടര്‍ന്ന് തന്റെ ടെസ്‌ല കീ കാര്‍ഡ് അസറ്റോണ്‍ ലായനിയില്‍ മുക്കിവെച്ച് കാര്‍ഡിന്റെ പ്ലാസ്റ്റിക് കവചം നീക്കം ചെയ്ത് അതിനുള്ളിലെ ആര്‍എഫ്‌ഐഡി ടാഗ് പുറത്തെടുത്തു. ഈ ചിപ്പ് ഒരു ബയോപോളിമറിനുള്ളിലാക്കി സ്വന്തം കൈക്കുള്ളില്‍ ഘടിപ്പിക്കുകയായിരുന്നു. ഒരു സുഹൃത്തിന്റെ സഹായത്തോടെയാണ് അമി ചിപ്പ് ശരീരത്തിനുള്ളില്‍ ഘടിപ്പിച്ചത്.
ഇതിന്റെ മുഴുവന്‍ ദൃശ്യങ്ങളും അമി വീഡിയോയില്‍ പകര്‍ത്തുകയും തന്റെ യൂട്യൂബ് ചാനലില്‍ പങ്കുവെക്കുകയും ചെയ്തു.
Content Highlights: Tesla car key implanted in arm now ami dd can start her car automatically
