കുട്ടികളോടുള്ള ലൈംഗികതയടക്കം അശ്ലീലം നിറച്ച് വാട്സ്ആപ്പ്, ടെലിഗ്രാം ഗ്രൂപ്പുകള്‍ സജീവം.  ഇന്ത്യക്കാരും വിദേശികളും ഇത്തരം ഗ്രൂപ്പുകളില്‍ സജീവമാണ്. 

കുട്ടികളോടുള്ള ലൈംഗികത കാണിക്കുന്ന വീഡിയോ ദൃശ്യങ്ങള്‍, ചിത്രങ്ങള്‍, സോഷ്യല്‍ മീഡിയയില്‍ നിന്നും മറ്റും ഡൗണ്‍ലോഡ് ചെയ്യുന്ന സാധാരണക്കാരായ പെണ്‍കുട്ടികളുടെ ചിത്രങ്ങള്‍, വീഡിയോകള്‍, നടിമാരുടെയും മറ്റും മോര്‍ഫ് ചെയ്ത ചിത്രങ്ങള്‍ ഒപ്പം അശ്ലീലം വിളമ്പുന്ന സംഭാഷണങ്ങള്‍ എന്നിവയെല്ലാം ഇത്തരം ഗ്രൂപ്പുകളില്‍ വ്യാപകമായി പങ്കുവയ്ക്കപ്പെടുന്നുണ്ട്.

സന്ദേശങ്ങളുടെ സ്വകാര്യതയ്ക്ക് വാട്സാപ്പും ഇന്‍സ്റ്റാഗ്രാമും സമ്പൂര്‍ണ എന്‍ക്രിപ്ഷന്‍ വാഗ്ദാനം ചെയ്യുന്നുണ്ട്. ഇതിന്റെ മറ പറ്റിയാണ് ഇത്തരം ഗ്രൂപ്പുകള്‍ സധൈര്യം വിരാജിക്കുന്നത്.

കുട്ടികളോട് ലൈംഗിക വൈകൃതങ്ങള്‍ കാണിക്കുന്നത് കൂടാതെ അതിന്റെ ദൃശ്യങ്ങള്‍ കൈവശം വെക്കുന്നതും പങ്കുവെക്കുന്നതും ഇന്ത്യ ഉള്‍പ്പടെയുള്ള രാജ്യങ്ങളില്‍ കനത്ത ശിക്ഷ ലഭിക്കുന്ന കുറ്റകൃത്യമാണ്. 

വധശിക്ഷ ലഭിക്കുന്ന കുറ്റമായിട്ടും ഇങ്ങനെ

18 വയസില്‍ താഴെ വയസുള്ളവര്‍ക്കെതിരായ ലൈംഗിക കുറ്റകൃത്യങ്ങള്‍ തടയുന്നതിനായി പ്രൊട്ടക്ഷന്‍ ഓഫ് ചില്‍ഡ്രന്‍ ഫ്രം സെക്ഷ്വല്‍ ഒഫന്‍സസ് അഥവാ പോക്സോ എന്നറിയപ്പെടുന്ന നിയമം ഇന്ത്യയിലുണ്ട്. കുറ്റകൃത്യത്തിന്റെ അടിസ്ഥാനത്തില്‍ ജീവപര്യന്തം വരെ തടവ് ശിക്ഷയും ഇര കൊല്ലപ്പെട്ടാല്‍ വധശിക്ഷയും ലഭിക്കുന്ന കുറ്റകൃത്യമാണ് കുട്ടികളോടുള്ള ലൈംഗികത. എന്നിട്ടും ലൈംഗിക വൈകൃതങ്ങള്‍ക്കിരയായ പിഞ്ചുകുഞ്ഞുങ്ങളുടെ ചിത്രങ്ങള്‍ പോലും ഇത്തരം വാട്സാപ്പ് ഗ്രൂപ്പുകളില്‍ പ്രചരിപ്പിക്കപ്പെടുന്നുണ്ടെന്നുള്ളതാണ് ദൗര്‍ഭാഗ്യകരമായ വസ്തുത. 

CP
ചൈൽഡ് പോൺ വാട്സ്ആപ്പ് ഗ്രൂപ്പ് ലിങ്കുകൾ പരസ്യം ചെയ്തിരിക്കുന്ന വെബ് സൈറ്റുകളിലൊന്ന് 

ഗ്രൂപ്പ് ലിങ്കുകളും അതിനായുള്ള വെബ്സൈറ്റുകളും

അശ്ലീല വാട്സ്ആപ്പ്, ടെലിഗ്രാം ഗ്രൂപ്പുകളുടെ ലിങ്കുകള്‍ ലഭിക്കുന്ന വെബ്സൈറ്റുകള്‍ ഓണ്‍ലൈനില്‍ നിരവധിയുണ്ട്. വാട്സ്ആപ്പ് ഗ്രൂപ്പുകള്‍ പരസ്യം ചെയ്യാനുള്ള വെബ്സൈറ്റുകളാണിവ. ഗ്രൂപ്പുകളുടെ പേരും സ്വഭാവവും വിശദീകരിച്ചുള്ള ഇത്തരം പരസ്യങ്ങളിലൂടെയാണ് ഇവര്‍ ആളുകളെ കൂട്ടുന്നത്. ചൈല്‍ഡ് പോണോഗ്രാഫിയ്ക്ക് വേണ്ടിത്തന്നെയുള്ള നിരവധി ഗ്രൂപ്പുകളുണ്ട്. ചൈല്‍ഡ് പോണ്‍, എന്നും സിപി എന്ന ചുരുക്കപ്പേരുകളിലും ഇത്തരം വാട്‌സ്ആപ്പ് ഗ്രൂപ്പുകളുണ്ട്. ഗ്രൂപ്പുകളിൽ പലതും വിദേശ രാജ്യങ്ങളിൽ നിന്നുള്ളതാണ്. ഇന്ത്യയിൽ നിന്നുള്ളവയും ഉണ്ട്. ഏതായാലും എല്ലാ ഗ്രൂപ്പുകളിലും ഇന്ത്യക്കാരുടെ സാന്നിധ്യമുണ്ട്.  ഇതല്ലാതെ മറ്റ് പേരുകളിലുള്ള പ്രായപൂര്‍ത്തിയായവര്‍ക്ക് വേണ്ടിയുള്ള അസംഖ്യം ഗ്രൂപ്പുകളിലും ചൈല്‍ഡ് പോണ്‍ ഉള്ളടക്കങ്ങള്‍ പങ്കുവയ്ക്കപ്പെടുന്നുണ്ട്. 

ഗ്രൂപ്പുകളെല്ലാം ഹൗസ് ഫുള്‍

വാട്സ്ആപ്പ് ഗ്രൂപ്പുകളുടെ പരമാവധി അംഗങ്ങളുടെ എണ്ണം 257 ആണ്. ചൈല്‍ഡ് പോണ്‍ ഗ്രൂപ്പുകള്‍ ഉള്‍പ്പടെയുള്ള ഭൂരിഭാഗം അശ്ലീല വാട്സ്ആപ്പ് ഗ്രൂപ്പുകളിലും മുഴുവന്‍ ആളുകളുമുണ്ട്. എന്നാല്‍ ടെലഗ്രാം ഗ്രൂപ്പുകളില്‍ 5000 വരെയാണ് അംഗങ്ങളുടെ എണ്ണം. ടെലിഗ്രാം ചാനലുകളിലാകട്ടെ 10000  പേര്‍ക്ക് വരെ അംഗങ്ങളാവാം. അശ്ലീല വീഡിയോകള്‍ക്കൊപ്പം ആളുകളുടെ സ്വകാര്യ ദൃശ്യങ്ങളും വീഡിയോകളും ഇത്തരം ഗ്രൂപ്പുകള്‍ വഴി പങ്കുവയ്ക്കപ്പെടുന്നുണ്ട്. 

ഇന്ത്യക്കാര്‍ പോലും വിദേശ നമ്പറുകളില്‍

ഇന്ത്യയില്‍ തന്നെ നിന്നുകൊണ്ട് വിദേശ നമ്പറുകള്‍ ഉപയോഗിക്കാന്‍ സാധിക്കുന്നത് എങ്ങനെയാണെന്നത് നിസാരമായൊരു ചോദ്യമാണ്. വിദേശ നമ്പറുകള്‍ ഫോണുകളില്‍ ഉപയോഗിക്കാനും അതേ നമ്പര്‍ ഉപയോഗിച്ച് ഫോണ്‍ വിളിക്കാനുമെല്ലാം സഹായിക്കുന്ന ആപ്പുകള്‍ ഗൂഗിള്‍ പ്ലേസ്റ്റോറില്‍ പോലുമുണ്ട്. വാട്‌സ്ആപ്പ് അക്കൗണ്ട് ഉണ്ടാക്കാനും ടെലിഗ്രാം അക്കൗണ്ട് ഉണ്ടാക്കാനും ഇത്തരം നമ്പറുകള്‍ ഉപയോഗിച്ച് സാധിക്കൂ. ടെലിഗ്രാമില്‍ ഉപയോക്താവിന്റെ യൂസര്‍നെയിം മാത്രമേ കാണിക്കുകയുള്ളൂ. ഫോണ്‍ നമ്പര്‍ പരസ്യമാക്കുന്നില്ല. എന്നാല്‍ വാട്സ്ആപ്പ് ഗ്രൂപ്പുകളില്‍ നമ്പറുകള്‍ പരസ്യമാണെന്നത് സ്വന്തം നമ്പറുകള്‍ക്ക് പകരം വ്യാജ നമ്പറുകള്‍ ഉപയോഗിക്കാന്‍ ആളുകള്‍ക്ക് പ്രേരണ നല്‍കുന്നു. 

പോലീസിന് സന്നാഹങ്ങളുണ്ട് പക്ഷേ...

സോഷ്യല്‍ മീഡിയാ സേവനങ്ങളെ നിയന്ത്രിക്കാന്‍ സൈബര്‍ സുരക്ഷാ ഏജന്‍സികള്‍ക്ക് സംവിധാനങ്ങളെല്ലാം ഉണ്ടായിട്ടും ഒരു ഗുരുതര കുറ്റകൃത്യം തടയാന്‍ ആത്മാര്‍ത്ഥമായ ഇടപെടല്‍ അവരുടെ ഭാഗത്ത് നിന്നും ഉണ്ടായിട്ടില്ല. വാട്‌സ്ആപ്പ് ഗ്രൂപ്പുകളില്‍ പോലീസ് നിരന്തര പരിശോധനകള്‍ നടത്തിവരുന്നുണ്ട്. എന്‍ക്രിപ്റ്റഡ് സംവിധാനമുള്ള വാട്‌സ്ആപ്പിലേയും ടെലിഗ്രാമിലേയും പല ഗ്രൂപ്പുകളിലും നുഴഞ്ഞു കയറിയാണ് പോലീസിന്റെ നീക്കങ്ങള്‍. അത്തരം ഗ്രൂപ്പുകളില്‍ സൈബര്‍ നിരീക്ഷകരുടെ സാന്നിധ്യം എപ്പോള്‍ വേണമെങ്കിലും ഉണ്ടാവാം. അത് അംഗങ്ങള്‍ തിരിച്ചറിഞ്ഞെന്നു വരില്ല. നിയമവിരുദ്ധമായ എന്തെങ്കിലും ഗ്രൂപ്പുകളില്‍ നടക്കുന്നുണ്ടെങ്കില്‍ അധികം വൈകാതെ തന്നെ പിന്‍മാറുന്നതാണ് ഉചിതം.