സാന്‍ഫ്രാന്‍സിസ്‌കോ: സ്‌പെയ്‌സ് എക്‌സിന്റെ സ്റ്റാര്‍ഷിപ്പ് പദ്ധതിയ്ക്ക് വേണ്ടിയുള്ള ബഹിരാകാശ വാഹനത്തിന്റെ ചിത്രം പുറത്തുവിട്ട് കമ്പനി മേധാവി ഇലോണ്‍ മസ്‌ക് .  'ഹോപ്പര്‍' എന്ന് വിളിപ്പേരുള്ള സ്റ്റാര്‍ഷിപ്പ് പദ്ധതിയുടെ ആദ്യ പരീക്ഷണ റോക്കറ്റിന്റെ ചിത്രമാണ് മസ്‌ക് പുറത്തുവിട്ടത്. 

ടെക്‌സാസിലെ വിക്ഷേപണസ്ഥലത്ത് സ്റ്റാര്‍ഷിപ്പ് പരീക്ഷണ റോക്കറ്റിന്റെ കൂട്ടിച്ചേര്‍ക്കലുകള്‍ പൂര്‍ത്തിയായി. വിക്ഷേപണ സ്ഥലത്ത് ഹോപ്പറിന്റെ ഭാഗങ്ങൾ സംയോജിപ്പിക്കുന്നതിന്റെ ചിത്രങ്ങൾ പലരും സോഷ്യൽ മീഡിയയിൽ പങ്കുവെച്ചിരുന്നു. വ്യാഴാഴ്ച ട്വിറ്ററിലാണ് പൂര്‍ത്തിയായ റോക്കറ്റിന്റെ ചിത്രം മസ്‌ക് പങ്കുവെച്ചത്. ഇത് യഥാര്‍ത്ഥ ചിത്രമാണെന്നും വരച്ചെടുത്തതല്ലെന്നും അദ്ദേഹം പറഞ്ഞു. 

നേരത്തെ ബിഗ് ഫാല്‍ക്കണ്‍ റോക്കറ്റ് അഥവാ ബിഎഫ്ആര്‍ എന്ന് അറിയപ്പെട്ടിരുന്ന ഈ സ്റ്റാര്‍ഷിപ്പ് വാഹനം ചൊവ്വയിലേക്ക് സാധന സാമഗ്രികളും മനുഷ്യരേയും എത്തിക്കാനും ഭൂമിയില്‍ ബഹിരാകാശം വഴി അതിവേഗ ഗതാഗത സൗകര്യമൊരുക്കാനും ലക്ഷ്യമിട്ട് രൂപകല്‍പന ചെയ്തിട്ടുള്ളതാണ്. പുനരുപയോഗിക്കാന്‍ സാധിക്കുന്ന ഫാല്‍ക്കണ്‍ 9 റോക്കറ്റുകളുടെ ചുവടുപിടിച്ചാണ് ഇലോണ്‍ മസ്‌ക് സ്റ്റാര്‍ഷിപ്പ് എന്നൊരു പദ്ധതി ആവിഷ്‌കരിച്ചത്. 

ഭൂഖണ്ഡങ്ങളില്‍ നിന്ന് ഭൂഖണ്ഡങ്ങളിലേക്കും ചന്ദ്രന്‍, ചൊവ്വ ഗ്രഹങ്ങളിലേക്കുമുള്ള യാത്ര സ്‌പേയ്‌സ് എക്‌സ് പദ്ധതിയിടുന്നു.

കുത്തനെയുള്ള പറക്കല്‍ പരീക്ഷണങ്ങളാണ് സ്റ്റാര്‍ഷിപ്പ് ഹോപ്പര്‍ നടത്തുക. ബഹിരാകാശത്തേക്ക് ഉയര്‍ത്തിയുള്ള പരീക്ഷണം ജൂണില്‍ നടത്താനാണ് പദ്ധതി. ബഹിരാകാശത്തേക്കുള്ള സ്റ്റാര്‍ഷിപ്പ് വാഹനത്തിന്റെ നിര്‍മാണത്തില്‍ വ്യത്യാസമുണ്ടാവും. ഹോപ്പറിനേക്കാള്‍ വലുതും കനമുള്ള കവചങ്ങള്‍ ഉള്ളതാവും അതെന്നും മസ്‌ക് പറഞ്ഞു.

Content Highlights: Elon Musk showcases SpaceX's Starship test rocket