03 March 2022, 05:04 PM IST

1 min read

Read later

Tiktok | Photo: AFP

ടിക് ടോക്ക് കുട്ടികളുടെ മാനസിക ശാരീരിക ആരോഗ്യത്തെ പ്രതികൂലമായി ബാധിക്കുന്നുണ്ടോ എന്ന് പരിശോധിക്കുന്നതിന് അന്വേഷണം പ്രഖ്യാപിച്ച് അമേരിക്കന്‍ സംസ്ഥാനങ്ങള്‍. കാലിഫോര്‍ണിയ, മസാച്യുസെറ്റ്‌സ് ഉള്‍പ്പടെ എട്ട് സംസ്ഥാനങ്ങളാണ് അന്വേഷണം പ്രഖ്യാപിച്ചിരിക്കുന്നത്.

കുട്ടികളെ ദോഷമായി ബാധിക്കുന്നതുമായി ബന്ധപ്പെട്ട് കമ്പനിയ്ക്ക് എന്തെല്ലാം അറിയാം എന്നും പരിശോധിക്കും. ടിക്ടോക്കില്‍ ചെറുപ്രായക്കാരായ ഉപഭോക്താക്കളുടെ ഇടപെടല്‍ വര്‍ധിപ്പിക്കുന്നതിന് ടിക് ടോക്ക് സ്വീകരിച്ചുവരുന്ന രീതികളും വിദ്യകളും അവര്‍ എത്രനേരം ടിക് ടോക്ക് ഉപയോഗിക്കുന്നുണ്ട് എന്നത് സംബന്ധിച്ചും പരിശോധിക്കുമെന്ന് മസാച്യുസെറ്റ്‌സ് അറ്റോര്‍ണി ജനറല്‍ മൗര ഹീലിയുടെ ഓഫീസ് പ്രസ്താവനയില്‍ പറഞ്ഞു.

ചൈനീസ് കമ്പനിയായ ബൈറ്റ്ഡാന്‍സിന്റെ ഉടമസ്ഥതയിലുള്ള സേവനമാണ് ടിക് ടോക്ക്. കുട്ടികളുടെ സുരക്ഷയ്ക്ക് പ്രാധാന്യംനല്‍കുന്നുണ്ടെന്നും പ്രായാടിസ്ഥാനത്തില്‍ സൗകര്യങ്ങള്‍ നിയന്ത്രിക്കുന്നുണ്ടെന്നും ടിക് ടോക്ക് പറയുന്നു.

പ്രായപൂര്‍ത്തിയായവര്‍ക്ക് വേണ്ടിയുള്ള ഉള്ളടക്കങ്ങള്‍ കുട്ടികളിലേക്ക് ചെന്നെത്തുന്നത് തടയാന്‍ ഉള്ളടക്കങ്ങള്‍ റേറ്റ് ചെയ്യാനും നിയന്ത്രിക്കാനുമുള്ള സൗകര്യങ്ങള്‍ക്ക് വേണ്ടിയുള്ള ശ്രമത്തിലാണെന്ന് ഫെബ്രുവരിയില്‍ ടിക് ടോക്ക് വ്യക്തമാക്കിയിരുന്നു.

സമാനമായ അന്വേഷണങ്ങള്‍ മെറ്റായുടെ ഇന്‍സ്റ്റാഗ്രാമിന് നേരെയും ഫേസ്ബുക്കിന് നേരെയും നടക്കുന്നുണ്ട്.

ചൊവ്വാഴ്ച രാത്രി കോണ്‍ഗ്രസിനെ അഭിസംബോധന ചെയ്ത് സംസാരിക്കവെ പ്രസിഡന്റ് ജോ ബൈഡന്‍ സോഷ്യല്‍ മീഡിയ ആഘാതങ്ങളെ കുറിച്ച് പരാമര്‍ശിച്ചിരുന്നു. പകര്‍ച്ചാവ്യാധിയുടെ സമയത്ത് ജനപ്രിയ ഓണ്‍ലൈന്‍ ആപ്പുകള്‍ മൂലം കുട്ടികള്‍ ഏറെ പ്രയാസപ്പെടുന്നുണ്ടെന്ന് അദ്ദേഹം പറഞ്ഞു.

ലാഭത്തിന് വേണ്ടി സോഷ്യല്‍ മീഡിയാ പ്ലാറ്റ്‌ഫോമുകള്‍ നമ്മുടെ കുട്ടികള്‍ക്ക് മേല്‍ നടത്തുന്ന ദേശീയ പരീക്ഷണം അവസാനിപ്പിക്കണമെന്ന് അദ്ദേഹം പറഞ്ഞു. കുട്ടികളുടെ സംരക്ഷണത്തിനായി ശക്തമായ സ്വകാര്യത നിയമങ്ങള്‍വേണെമെന്നും അവരെ ലക്ഷ്യമിട്ടുള്ള പരസ്യങ്ങള്‍ നിരോധിക്കണെമെന്നും അദ്ദേഹം പറഞ്ഞു.