ന്യൂഡൽഹി: രാജ്യവ്യാപകമായി പബ്ലിക് വൈഫൈ നെറ്റ് വര്‍ക്കുകള്‍ സ്ഥാപിക്കാന്‍ കേന്ദ്ര മന്ത്രിസഭ തീരുമാനം. രാജ്യത്തെ പൊതു വൈഫൈ ശൃംഖല ശക്തിപ്പെടുത്തുന്നതിനായാണ് ഈ നീക്കം. രാജ്യത്തുടനീളം പബ്ലിക് ഡാറ്റാ ഓഫീസുകള്‍ (പിഡിഒ) വഴിയായിരിക്കും വൈഫൈ സേവനം എത്തിക്കുക.
ചെറിയ കടകള്‍ക്കും പൊതു സേവന കേന്ദ്രങ്ങള്‍ക്കും പിഡിഓ ആവാന്‍ സാധിക്കും. പബ്ലിക് ഡാറ്റാ ഓഫീസ് അഗ്രഗേറ്റര്‍മാരുടെ നേതൃത്വത്തിലായിരിക്കും അത്. ഈ പബ്ലിക് വൈഫൈ നെറ്റ് വര്‍ക്കുകള്‍ വഴിയുള്ള ബ്രോഡ്ബാന്റ് ഇന്റര്‍നെറ്റിന് ലൈസന്‍സ് ഫീ ഉണ്ടായിരിക്കില്ലെന്നും സര്‍ക്കാര്‍ അറിയിച്ചു.
പിഎം- വൈഫൈ ആക്‌സസ് നെറ്റ് വര്‍ക്ക് ഇന്റര്‍ഫെയ്‌സ് അഥവാ 'പിഎം-വാണി' എന്ന പേരിലായിരിക്കും ഈ പദ്ധതി അറിയപ്പെടുകയെന്ന് ഐടി മന്ത്രി രവിശങ്കര്‍ പ്രസാദ് പറഞ്ഞു.
കൊച്ചിയിൽ നിന്ന് ലക്ഷ ദ്വീപിലേക്ക് അതിവേഗ ബ്രോഡ്ബാന്റ് എത്തിക്കുന്നതിനുള്ള ആഴക്കടല്‍ ഒപ്റ്റിക്കല്‍ ഫൈബര്‍ കേബിള്‍ സ്ഥാപിക്കുന്നതിനും മന്ത്രിസഭ അനുമതി നല്‍കി.
Content Highlights: PM- Wi-fi Access Network Interface announced
