കാലിഫോര്‍ണിയ: ആഗോള സാങ്കേതിക വ്യവസായരംഗം നേരിടുന്ന സെമി കണ്ടക്ടര്‍ ചിപ്പ് ക്ഷാമം ഇനിയുമേറെ നാള്‍ നീണ്ടുനില്‍ക്കുമെന്ന് കംപ്യൂട്ടര്‍ പ്രൊസസര്‍ ചിപ്പ് നിര്‍മാതാക്കളായ ഇന്റലിന്റെ സി.ഇ.ഒ. പാറ്റ് ഗെല്‍സിങര്‍. 2023 വരെയെങ്കിലും അസംസ്‌കൃത വസ്തുക്കളുടെ ദൗര്‍ലഭ്യം തുടരുമെന്നും അദ്ദേഹം പറയുന്നു. 

'ചിപ്പ് ക്ഷാമത്തിന്റെ ഏറ്റവും രൂക്ഷഘട്ടത്തിലാണ് നാമിപ്പോള്‍. വരുന്ന ഓരോ മൂന്ന് വര്‍ഷവും ഇത് ക്രമേണ കുറഞ്ഞു വന്നേക്കും. പക്ഷെ 2023 വരെയെങ്കിലും വിതരണവും ആവശ്യവും തമ്മിലുള്ള അസന്തുലിതാവസ്ഥ നിലനില്‍ക്കും.' അദ്ദേഹം പറഞ്ഞു. 

അതേസമയം , മറ്റൊരു പ്രൊസസര്‍ ചിപ്പ് നിര്‍മാതാക്കളായ എ.എം.ഡിയുടെ മേധാവി ഡോ. ലിസ സു ഈ വിഷയത്തില്‍ കുറച്ചുകൂടി ശുഭാപ്തിവിശ്വാസത്തിലാണ്. കുറച്ച് കാലം കൂടി വിതരണത്തില്‍ പ്രശ്‌നം നേരിടുമെങ്കിലും അടുത്ത വർഷത്തോടെ അത് മെച്ചപ്പെടുമെന്നാണ് അവര്‍ പറയുന്നത്. അത് പെട്ടെന്നുള്ള മാറ്റമാവില്ല. കൂടുതല്‍ പ്ലാന്റുകള്‍ വരുന്നതോടെ അത് ക്രമേണ മെച്ചപ്പെടും. ഗ്രാഫിക്‌സ് കാര്‍ഡ് നിര്‍മാതാക്കളായ എന്‍വിഡിയയും ഇതേ പ്രതീക്ഷയിലാണ്. 

അതേസമയം, ചിപ്പ് ക്ഷാമം എന്നതിലുപരി ആവശ്യമുള്ള അനുബന്ധ ഭാഗങ്ങള്‍ ഒരേ സമയം ലഭ്യമാവാത്തതാണ് കമ്പനികള്‍ നേരിടുന്ന പ്രശ്‌നം. ഒരു കമ്പനിയുടെ പക്കല്‍ സി.പി.യു. ഉണ്ടെങ്കില്‍, ചിലപ്പോള്‍ എല്‍.സി.ഡി. ഉണ്ടാവില്ല, അല്ലെങ്കില്‍ വൈഫൈ ഉണ്ടാവില്ല. ഡാറ്റാ സെന്ററുകളും പവര്‍ ചിപ്പുകള്‍, നെറ്റ്വര്‍ക്കിങ് ചിപ്പുകള്‍, എതര്‍നെറ്റ് ചിപ്പുകള്‍ പോലുള്ളവയുടെ ലഭ്യതക്കുറവ് നേരിടുന്നുണ്ട്. 

Content Highlights: Intel CEO, Global Chip Shortage, laptop sales