പാരിസ്: റോളണ്ട് ഗാരോസില്‍ ഇന്ത്യന്‍ പ്രതീക്ഷകള്‍ സജീവമാക്കി രോഹന്‍ ബൊപ്പണ്ണ. കനേഡിയന്‍ പങ്കാളി ഗബ്രിയേല ഡബ്രോവ്‌സ്‌ക്കിയുമായി ചേര്‍ന്ന് ബൊപ്പണ്ണ ഫ്രഞ്ച് ഓപ്പണ്‍ മിക്‌സഡ് ഡബിള്‍സ് ഫൈനലിലെത്തി.
ഫ്രഞ്ച് താരം എഡ്വേര്‍ഡ് റോജര്‍ വാസ്‌ലിന്‍-ചേക്ക് താരം ആന്‍ഡ്രിയ വാക്കോവ സഖ്യത്തെ പരാജയപ്പെടുത്തിയാണ് ബൊപ്പണ്ണയും ഗബ്രിയേലയും അവസാന പോരാട്ടത്തിന് യോഗ്യത നേടിയത്. ആദ്യ സെറ്റില്‍ അല്‍പം പ്രയാസപ്പെട്ടെങ്കിലും രണ്ടാം സെറ്റ് ബൊപ്പണ്ണ സഖ്യം അനായാസം നേടി. സ്‌കോര്‍: 7-5,6-3.
ഏഴാം സീഡായ ബൊപ്പണ്ണ സഖ്യത്തിന്റെ ഫൈനല്‍ എതിരാളി അന്ന ഗ്രോനെഫെല്‍ഡ്-റോബര്‍ട്ട് ഫറ ജോഡിയാണ്. രാജീവ് റാമിനെയും കാസിയെയും പരാജയപ്പെടുത്തിയാണ് ഇരുവരും ഫൈനലിലെത്തിയത്. ഫൈനലില്‍ വിജയിച്ചാല്‍ ഗ്രാന്‍ഡ്സ്ലാം നേടുന്ന നാലാമത്തെ ഇന്ത്യക്കാരന്‍ എന്ന ബഹുമതി ബൊപ്പണ്ണക്ക് സ്വന്തമാക്കാം. ഏഴു വര്‍ഷത്തിന് ശേഷമാണ് ബൊപ്പണ്ണ ഒരു ഗ്രാന്‍ഡ്സ്ലാം ഫൈനലിലെത്തുന്നത്. ഇതിന് മുമ്പ് 2010ല്‍ പാക് താരം ഐസാമുല്‍ ഹഖ് ഖുറൈഷിയുമൊത്ത് യു.എസ് ഓപ്പണിന്റെ ഫൈനലിലെത്തിയിരുന്നു.
പുരുഷ സിംഗിള്‍സ് സെമിഫൈനലില്‍ റാഫേല്‍ നഡാല്‍ ഓസ്ട്രിയയുടെ ഡൊമിനിക് തീമിനെ നേരിടുമ്പോള്‍ വാവ്‌റിങ്കയും ആന്‍ഡി മറേയും തമ്മിലാണ് മറ്റൊരു സെമി പോരാട്ടം. ദ്യോകോവിച്ചിനെ അട്ടിമറിച്ചാണ് തീം സെമിഫൈനലിലെത്തിയത്.
വനിതാ സിംഗിള്‍സില്‍ മൂന്നാം സീഡ് സിമോണ ഹാലെപ്പും രണ്ടാം സീഡ് പ്ലിസ്‌കോവയും തമ്മിലാണ് ഒരു സെമി പോരാട്ടം. മറ്റൊരു സെമിയില്‍ പത്തൊമ്പതുകാരി ഒസ്റ്റാപെങ്കോ സ്വിസ് താരം ബാസിന്‍സ്‌ക്കിയെ നേരിടും. വോസ്‌നിയാക്കിയെ തോല്‍പ്പിച്ചാണ് ഒസ്റ്റാപെങ്കോ സെമിയിലെത്തിയത്.
