സിഡ്നി: ഇന്ത്യൻ പ്രീമിയർ ലീഗിൽ പങ്കെടുത്ത ഓസീസ് താരങ്ങളെല്ലാം ക്വാറന്റെയ്ൻ കഴിഞ്ഞ് കുടുംബത്തോടൊപ്പം ചേർന്നു. ഓസ്ട്രേലിയയിലെ വിവിധ ഹോട്ടലുകളിൽ 14 ദിവസം ക്വാറന്റെയ്നിൽ ആയിരുന്നു താരങ്ങൾ.

കോവിഡ് വ്യാപനത്തെ തുടർന്ന് ഐപിഎൽ നിർത്തിവെച്ചതോടെ ഓാസീസ് താരങ്ങൾ നാട്ടിലേക്ക് തിരിച്ചിരുന്നു. ഇന്ത്യയിൽ നിന്ന് മാലിദ്വീപിൽ പോയശേഷം അവിടെ നിന്നാണ് ഓസ്ട്രേലിയയിലേക്ക് വിമാനം കയറിയത്. താരങ്ങളും സപ്പോർട്ട് സ്റ്റാഫും ഒഫീഷ്യലുകളും അടക്കം 36 പേരാണ് ക്വാറന്റെയ്നിൽ ഉണ്ടായിരുന്നത്.

വീട്ടിലെത്തിയ സന്തോഷം താരങ്ങൾ സോഷ്യൽ മീഡിയയിലൂടെ ആരാധകരുമായി പങ്കുവെച്ചു. ഓസീസ് താരം പാറ്റ് കമ്മിൻസ് ഭാര്യ ബെക്കി ബോസ്റ്റണെ കണ്ടപ്പോഴുള്ള വീഡിയോ നിരവധി പേരാണ് സോഷ്യൽ മീഡിയയിൽ പങ്കുവെച്ചത്. കമ്മിൻസിനെ കണ്ടയുടനെ ഗർഭിണിയായ ബെക്കി ഓടിച്ചെന്ന് കെട്ടിപ്പിടിക്കുകയായിരുന്നു.

ഐപിഎല്ലിൽ കൊൽക്കത്ത നൈറ്റ് റൈഡേഴ്സ് താരമാണ് കമ്മിൻസ്. താരങ്ങൾക്ക് കോവിഡ് സ്ഥിരീകരിച്ചതിനെ തുടർന്ന് മെയ് നാലിനാണ് ഐപിഎൽ നിർത്തിവെച്ചത്.

Content Highlights: Pat Cummins reunites with pregnant wife