ദുബായ്: തകര്‍ത്തടിച്ച എ.ബി.ഡിവില്ലിയേഴ്‌സിന്റെ ബാറ്റിങ് മികവില്‍ രാജസ്ഥാന് റോയല്‍സിനെ ഏഴ് വിക്കറ്റിന് തകര്‍ത്ത് ബാംഗ്ലൂര്‍ റോയല്‍ ചലഞ്ചേഴ്‌സ്. 178 റണ്‍സ് വിജയലക്ഷ്യത്തിലേക്ക് ബാറ്റ് ചെയ്ത ബാംഗ്ലൂര്‍ 22 പന്തുകളില്‍ നിന്നും പുറത്താകാതെ 55 റണ്‍സെടുത്ത ഡിവില്ലിയേഴ്‌സിന്റെയും 43 റണ്‍സെടുത്ത ക്യാപ്റ്റന് വിരാട് കോലിയുടെയും മികവിലാണ് വിജയം സ്വന്തമാക്കിയത്. ഒരുഘട്ടത്തില്‍ തോല്‍വി നേരിട്ട ബാംഗ്ലൂരിനെ ഒറ്റയ്ക്ക് തോളിലേറ്റി വിജയതീരത്തിലെത്തിക്കുകയായിരുന്നു ഡിവില്ലിയേഴ്സ്.
ടോസ് നേടി ബാറ്റിങ് തെരെഞ്ഞെടുത്ത രാജസ്ഥാന് ആറ് വിക്കറ്റ് നഷ്ടത്തില്‍ 177 റണ്‍സാണ് എടുത്തത്. 57 റണ്‍സെടുത്ത ക്യാപ്റ്റന് സ്റ്റീവ് സ്മിത്തിന്റെയും 41 റണ്‍സ് നേടിയ റോബിന്‍ ഉത്തപ്പയുടെയും കരുത്തിലാണ് രാജസ്ഥാന് മികച്ച ടോട്ടല്‍ പടുത്തുയര്‍ത്തിയത്.
ഓപ്പണിങ്ങില്‍ മാറ്റവുമായാണ് രാജസ്ഥാന് ബാറ്റിങ്ങിന് ഇറങ്ങിയത്. ഓപ്പണറായ ജോസ് ബട്‌ലര്‍ക്ക് പകരം ബെന്‍ സ്റ്റോക്‌സിനൊപ്പം റോബിന്‍ ഉത്തപ്പയാണ് ക്രീസിലെത്തിയത്. കിട്ടിയ അവസരം അദ്ദേഹം നന്നായി ഉപയോഗിച്ചു. ഈ മത്സരത്തിലൂടെ ഐ.പി.എല്ലില്‍ 4500 റണ്‍സ് തികയ്ക്കാന്‍ ഉത്തപ്പയ്ക്ക് സാധിച്ചു.
സ്റ്റോക്സിനെ സാക്ഷിയാക്കി ഉത്തപ്പ സീസണിലാദ്യമായി ഫോമിലേക്കുയര്‍ന്നു. ഇരുവരും അര്‍ധസെഞ്ചുറി കൂട്ടുകെട്ട് പടുത്തുയര്‍ത്തി. എന്നാല്‍ തൊട്ടുപിന്നാലെ സ്റ്റോക്സിനെ പുറത്താക്കി ബാംഗ്ലൂര്‍ മത്സരത്തിലേക്ക് തിരിച്ചുവന്നു. 19 പന്തുകളില്‍ നിന്നും 15 റണ്‍സെടുത്ത സ്റ്റോക്സിനെ ക്രിസ് മോറിസാണ് പുറത്താക്കിയത്.
പിന്നാലെയെത്തിയ സഞ്ജുവും മികച്ച രീതിയില്‍ ബാറ്റ് ചെയ്തതോടെ സ്‌കോര്‍ബോര്‍ഡ് കുതിച്ചു. എന്നാല്‍ 22 പന്തുകളില്‍ നിന്നും 41 റണ്‍സെടുത്ത ഉത്തപ്പയെ മടക്കി ചാഹല്‍ വീണ്ടും കളി ബാംഗ്ലൂരിന് അനുകൂലമാക്കി. തൊട്ടടുത്ത പന്തില്‍ സഞ്ജു സാംസണെയും പുറത്താക്കി ചാഹല്‍ രാജസ്ഥാന് ഇരട്ടപ്രഹരമേകി. ആറുപന്തുകളില്‍ നിന്നും ഒന്‍പത് റണ്‍സ് മാത്രമാണ് താരം നേടിയത്.
ഇരുവരും പുറത്തായതിനുശേഷം ഒത്തുചേര്‍ന്ന ക്യാപ്റ്റന് സ്റ്റീവ് സ്മിത്തും ജോസ് ബട്‌ലറും ചേര്‍ന്ന് പതിയെ തകര്‍ച്ചയില്‍ നിന്നും ടീമിനെ കരകയറ്റി. ഇരുവരും ചേര്‍ന്ന് സ്‌കോര്‍ബോര്‍ഡ് 100 കടത്തി. പിന്നാലെ സ്‌കോറിങ്ങിന്റെ വേഗവും കൂട്ടി. എന്നാല്‍ ബട്‌ലറെ മടക്കി മോറിസ് വീണ്ടും ബാംഗ്ലൂരിന് പ്രതീക്ഷ നല്‍കി. 25 ബോളില്‍ നിന്നും 24 റണ്‍സാണ് താരമെടുത്തത്. ബട്‌ലറും സ്മിത്തും ചേര്‍ന്ന് അഞ്ചാം വിക്കറ്റില്‍ 58 റണ്‍സിന്റെ കൂട്ടുകെട്ടുണ്ടാക്കി.
ബട്‌ലര്‍ പുറത്തായതിനുശേഷവും സ്മിത്ത് മികച്ച ഷോട്ടുകളുമായി കളം നിറഞ്ഞു. അദ്ദേഹം 30 പന്തുകളില്‍ നിന്നും അര്‍ധസെഞ്ചുറിയും നേടി. അദ്ദേഹത്തിന്റെ 11-ാം ഐ.പി.എല്‍ അര്‍ധസെഞ്ചുറിയാണ് ഇന്ന് പിറന്നത്. തെവാട്ടിയയും മികച്ച കളിയാണ് പുറത്തെടുത്തത്. ഇരുവരും ചേര്‍ന്ന് അവസാന ഓവറുകളില്‍ അടിച്ചുതകര്‍ത്തു. 35 പന്തില്‍ നിന്നും 57 റണ്‍സെടുത്ത സ്മിത്തിനെ അവസാന ഓവറില്‍ ക്രിസ് മോറിസ് പുറത്താക്കി. 19 റണ്‍സെടുത്ത തെവാട്ടിയ പുറത്താവാതെ നിന്നു.
ബാംഗ്ലൂരിന് വേണ്ടി നാല് വിക്കറ്റുകള്‍ വീഴ്ത്തി ക്രിസ് മോറിസ് മികച്ച പ്രകടനം പുറത്തെടുത്തപ്പോള്‍ ചാഹല്‍ രണ്ട് വിക്കറ്റുകള്‍ നേടി.
പതിവുപോലെ ആരോണ്‍ ഫിഞ്ചും മലയാളി താരം ദേവ്ദത്ത് പടിക്കലും ചേര്‍ന്നാണ് ഇന്നിങ്‌സ് ആരംഭിച്ചത്. മികച്ച ഷോട്ടുകളുമായി ഫിഞ്ച് നല്ല തുടക്കം നല്‍കുകയും ചെയ്തു. എന്നാല്‍ നാലാം ഓവറില്‍ 14 റണ്‍സെടുത്ത ഫിഞ്ചിനെ ശ്രേയസ് ഗോപാല്‍ പുറത്താക്കി.
പിന്നാലെയെത്തിയത് ക്യാപ്റ്റന് വിരാട് കോലിയാണ്. കോലിയും ദേവ്ദത്തും ചേര്‍ന്ന് സ്‌കോര്‍ബോര്‍ഡ് 50 കടത്തി. പിന്നാലെ ഇരുവരും അര്‍ധസെഞ്ചുറി കൂട്ടുകെട്ടും പടുത്തുയര്‍ത്തി.
ദേവ്ദത്ത് സിംഗിളുകള്‍ നേടി ക്യാപ്റ്റന് സ്‌ട്രൈക്ക് കൈമാറി. കോലി ആക്രമിച്ച് കളിച്ച് സ്‌കോര്‍ ഉയര്‍ത്തുകയും ചെയ്തു. എന്നാല്‍ കണിശതയോടെ പന്തെറിഞ്ഞ രാജസ്ഥാന് ബൗളര്‍മാര്‍ ഇരുവര്‍ക്കും വെല്ലുവിളിയുയര്‍ത്തി. എന്നാലും ഇരുവരും ചേര്‍ന്ന് സ്‌കോര്‍ 100 കടത്തി.
പിന്നീട് ആക്രമിച്ച് കളിക്കാന്‍ ശ്രമിച്ച ദേവ്ദത്ത് പടിക്കലിനെ പുറത്താക്കി രാജസ്ഥാന് വീണ്ടും കളിയിലേക്ക് തിരിച്ചുവന്നു. രാഹുല്‍ തെവാത്തിയയാണ് 35 റണ്‍സെടുത്ത ദേവ്ദത്തിനെ പുറത്താക്കിയത്. തൊട്ടടുത്ത ഓവറില്‍ മനോഹരമായ ഒരു ബൗണ്ടറി ലൈന്‍ ക്യാച്ചിലൂടെ കോലിയെയും തെവാട്ടിയ പുറത്താക്കി. 32 പന്തുകളില്‍ നിന്നും 43 റണ്‍സെടുത്ത് ക്യാപ്റ്റന് പുറത്തായതോടെ ബാംഗ്ലൂര്‍ പരുങ്ങലിലായി.
പിന്നീട് ക്രീസിലെത്തിയത് ഡിവില്ലിയേഴ്‌സും ഇന്ന് ആദ്യമായി കളിക്കാന്‍ അവസരം ലഭിച്ച ഗുര്‍കീരതുമായിരുന്നു. എന്നാല്‍ രാജസ്ഥാന് ബൗളര്‍മാര്‍ മികച്ച രീതിയില്‍ പന്തെറിഞ്ഞതോടെ വേണ്ട വിധത്തില്‍ സ്‌കോര്‍ മുന്നോട്ട് കൊണ്ടുപോകാന്‍ ഇരുവര്‍ക്കും സാധിച്ചില്ല. അവസാന മൂന്നോവറില്‍ ബാംഗ്ലൂരിന് ജയിക്കാന്‍ 45 റണ്‍സായിരുന്നു വേണ്ടിയിരുന്നത്.
ഉനദ്കട്ട് എറിഞ്ഞ 19-ാം ഓവറിലെ ആദ്യമൂന്നു പന്തുകളിലും സിക്‌സറുകള്‍ പറത്തി ഡിവില്ലിയേഴ്സ് കളിയുടെ ഗതിമാറ്റി. ആ ഓവറില്‍ 25 റണ്‍സാണ് പിറന്നത്. അവസാന ഓവറില്‍ ബാംഗ്ലൂരിന് ജയിക്കാന്‍ 10 റണ്‍സായിരുന്നു വേണ്ടത്. ആര്‍ച്ചര്‍ എറിഞ്ഞ ഓവറില്‍ ടീമിനെ വിജയത്തിലെത്തിച്ച് ഡിവില്ലിയേഴ്സ് മത്സരത്തിലെ നിര്‍ണായക സാന്നിധ്യമായി മാറി.
രാജസ്ഥാന് വേണ്ടി ശ്രേയസ് ഗോപാല്‍, കാര്‍ത്തിക്ക് ത്യാഗി, തെവാട്ടിയ എന്നിവര്‍ ഓരോ വിക്കറ്റുകള്‍ വീഴ്ത്തി.
മത്സരത്തിന്റെ തത്സമയ വിവരണം വായിക്കാം..
Content Highlights: Match 33 between Rajasthan Royals and Royal Challengers Bangalore at Dubai International Stadium
