മുംബൈ: മുംബൈ ഇന്ത്യന്‍സിന്റെ ഓസ്‌ട്രേലിയന്‍ പേസര്‍ ജേസണ്‍ ബെഹരെന്‍ഡോര്‍ഫ് ഇനി ഈ സീസണില്‍ ഐ.പി.എല്ലില്‍ കളിക്കില്ല. ലോകകപ്പിനായി ഓസ്‌ട്രേലിയന്‍ ടീമില്‍ ചേരാനാണ് ജേസണ്‍ നാട്ടിലേയ്ക്ക് മടങ്ങിയത്. മെയ് രണ്ടിനാണ് ഓസ്‌ട്രേലിയന്‍ ടീമിന്റെ ലോകകപ്പ് ക്യാമ്പ് ആരംഭിക്കുന്നത്.
ജേസണ്‍ തന്നെയാണ് താന്‍ നാട്ടിലേയ്ക്ക് മടങ്ങുന്ന കാര്യം ട്വിറ്ററിലൂടെ അറിയിച്ചത്. ആദ്യ ഐ.പി.എല്‍ സീസണ്‍ തന്നെ മനോഹരമായ ഒരു അനുഭവമായിരുന്നു. തുടര്‍ന്നു നന്നായി കളിക്കൂ. നിങ്ങളെ ഫൈനലില്‍ കാണാനായി കാത്തിരിക്കുകയാണ് ഞാന്‍-ജേസണ്‍ ട്വീറ്റ് ചെയ്തു.
ഓസ്‌ട്രേലിയക്കുവേണ്ടി ആറ് ഏകദിനങ്ങളില്‍ നിന്ന് ഏഴ് വിക്കറ്റെടുത്ത ഇരുപത്തിയൊന്‍പതുകാരനായ ജേസണ്‍ പാകിസ്താനെതിരായ പരമ്പരയ്ക്കുശേഷമാണ് മുംബൈ ഇന്ത്യന്‍സില്‍ ചേര്‍ന്നത്. മുംബൈയ്ക്കുവേണ്ടി അഞ്ച് മത്സരങ്ങള്‍ കളിച്ച ജേസണ്‍ 165 റണ്‍സ് വിട്ടുകൊടുത്ത് അഞ്ച് വിക്കറ്റ് വീഴ്ത്തിയിട്ടുണ്ട്.
Content Highlights: Jason Behrendorff leaves Mumbai Indians to join national camp for World Cup 2019 Australian Team IPL 2019
