മോസ്‌കോ: ഷൂട്ടൗട്ടിൽ സ്പെയിനിന്റെ കഥ കഴിഞ്ഞു. മൂന്നിനെതിരേ നാലു ഗോളിന് സ്പെയിനിനെ മറികടന്ന ആതിഥേയരായ റഷ്യ ലോകകപ്പ് ഫുട്ബോളിന്റെ ക്വാർട്ടർ ഫൈനലിൽ പ്രവേശിച്ചു. സോവിയറ്റ് യൂണിയൻ റഷ്യയായതിനുശേഷം ഇതാദ്യമായാണ് ക്വാർട്ടറിലെത്തുന്നത്.

ഷൂട്ടൗട്ടിൽ രണ്ട് സ്പാനിഷ് കിക്കുകളണ് റഷ്യൻ ഗോളി അക്കിൻഫീവ് തടഞ്ഞത്. മൂന്നാമത്തെ കിക്കെടുത്ത കോക്കോയുടേയും അവസാന കിക്കെടുത്ത അസ്പാസിന്റേയും.. അഞ്ചു കിക്കുകളില്‍ മൂന്നെണ്ണം മാത്രമാണ് സ്‌പെയിന്‍ വലയിലെത്തിച്ചത്. റഷ്യ നാലെണ്ണവും വലയിലെത്തിച്ചു.

സ്പെയിനിന്റെ ഇനിയേസ്റ്റയാണ് ആദ്യം കിക്കെടുത്തത്. വല കുലുങ്ങി (1-0). റഷ്യയുടെ സ്മോളോവിന്റോവിന്റേതായിരുന്നു അടുത്ത ഊഴം. ഗോൾ. (1-1). സ്പെയിനിന്റെ രണ്ടാം കിക്കെടുത്ത പിക്ക്വെയ്ക്കും പിഴച്ചില്ല. (2-1) നിശ്ചിത സമയത്ത് സെൽഫ് ഗോളടിച്ച ഇഗ്നാസേവിച്ചിന്റേതായിരുന്നു അടുത്ത ഊഴം. അതും വലയിൽ (2-2). സ്‌പെയിനിന്റെ മൂന്നാം കിക്കെടുത്ത കോക്കോയ്ക്ക് പിഴച്ചു.വലത്തോട്ട് ചാടിയ ഗോളിയുടെ കൈയിലേയ്ക്കാണ് കോക്കെ പന്തടിച്ചത്. (2-2). ഗോളോവിൻ എടുത്ത കിക്കും വലയിൽ (2-3). സ്പാനിഷ് ക്യാപ്റ്റൻ സെർജിയോ റാമോസിന്റേതായിരുന്നു അടുത്ത ഊഴം. ക്യാപ്റ്റന് പിഴച്ചില്ല (3-3). ചെറിഷേവ് അ​ടുത്ത കിക്കിൽ റഷ്യയെ മുന്നിലെത്തിച്ചു. (3-4).  സ്പെയിനിന്റെ അഞ്ചാം കിക്കെടുത്ത ആസ്പാസിന് മുന്നിൽ ഗോളി വീണ്ടും വില്ലനായി. ഇതോടെ റഷ്യ വിജയിക്കുകയും ചെയ്തു.

നിശ്ചിത സമയത്തും എക്‌സ്ട്രാ ടൈമിലും ഇരുടീമുകളും ഓരോ ഗോള്‍ വീതമടിച്ച് സമനില പാലിച്ചതിനെ തുടർന്നാണ് മത്സരം ഷൂട്ടൗട്ടിലേയ്ക്ക് നീങ്ങിയത്.

സെല്‍ഫ് ഗോളിലാണ് സ്പെയിൻ നിശ്ചിത സമയത്ത് മുന്നിലെത്തിയത്. ഇസ്‌കോയുടെ ഫ്രീ കിക്കില്‍ നിന്ന്‌ വല ചലിപ്പിക്കാന്‍ സെര്‍ജിയോ റാമോസ് ശ്രമിക്കുന്നതിനിടെ റഷ്യയുടെ ഇഗ്നാസേവെച്ചിന്റെ കാലില്‍ തട്ടി പന്ത് വലയിലെത്തുകയായിരുന്നു. 12-ാം മിനിറ്റില്‍ സ്‌പെയിന്‍ മുന്നില്‍. 1-0. ഈ ലോകകപ്പിലെ പത്താമത്തെ സെല്‍ഫ് ഗോളാണിത്.

നാൽപത്തിയൊന്നാം മിനിറ്റിൽ പെനാൽറ്റി ലക്ഷ്യത്തിലെത്തിച്ച് സ്യൂബയാണ് റഷ്യയെ ഒപ്പമെത്തിച്ചത്.  റഷ്യയെടുത്ത കോര്‍ണര്‍ കിക്കിനിടെ ബോക്‌സിലേക്കുള്ള പന്ത് പീക്വെയുടെ കൈയില്‍ തട്ടിയതോടെ റഫറി ഹാന്‍ഡ് ബോളിന് പെനാല്‍റ്റി വിധിച്ചു. റഫറിയോട് തര്‍ക്കിക്കാന്‍ പോയ പീക്വേയ്ക്ക് മഞ്ഞക്കാര്‍ഡും.

പെനാല്‍റ്റിയെടുക്കാന്‍ വന്ന സ്യൂബയ്ക്ക് പിഴച്ചില്ല. 42-ാം മിനിറ്റില്‍ റഷ്യ ഒപ്പം പിടിച്ചു. 1-1. ഈ ലോകകപ്പില്‍ സ്യൂബയുടെ മൂന്നാം ഗോള്‍.

തത്സമയ വിവരണങ്ങൾ വായിക്കാം

LIVE BLOG STATISTICS LINE-UPS