photo: Getty Images
പാരീസ്: കായികപ്രേമികളെ ഞെട്ടിച്ചുകൊണ്ട് ടെന്നീസില്‍ നിന്ന് അടുത്തവര്‍ഷം വിരമിക്കുമെന്ന പ്രഖ്യാപനവുമായി ടെന്നീസ് ഇതിഹാസം റാഫേല്‍ നദാല്‍. അടുത്ത വര്‍ഷം പ്രൊഫഷണല്‍ ടെന്നീസിലെ തന്റെ അവസാനവര്‍ഷമായിരിക്കുമെന്നാണ് കരുതുന്നതെന്ന് നദാല്‍ പറഞ്ഞു. കൂടാതെ 2023 ഫ്രഞ്ച് ഓപ്പണില്‍ നിന്ന് പിന്മാറുന്നതായും നദാല്‍ വ്യക്തമാക്കി. ഇടുപ്പിനേറ്റ പരിക്കില്‍ നിന്ന് മുക്തമാവാന്‍ സാധിക്കാത്തതിനാലാണ് നദാല്‍ ഫ്രഞ്ച് ഓപ്പണില്‍ നിന്ന് പിന്മാറുന്നത്. വാര്‍ത്താ സമ്മേളനത്തില്‍ നദാല്‍ തന്നെയാണ് ഇക്കാര്യം അറിയിച്ചത്.
'കഴിഞ്ഞ നാല് മാസങ്ങള്‍ വളരെ കഠിനമായിരുന്നു. റോളണ്ട് ഗാരോസില്‍ എനിക്ക് കളിക്കാന്‍ സാധിക്കില്ല. മഹാമാരിക്ക് ശേഷം പരിശീലനങ്ങളില്‍ ഏര്‍പ്പെടാന്‍ ശരീരം അനുവദിക്കുന്നില്ല. കുറേ പ്രശ്‌നങ്ങളുണ്ട്. ഇപ്പോള്‍ നിര്‍ത്താനാണ് എന്റെ തീരുമാനം. തത്കാലം നിര്‍ത്തുകയാണ്. ചിലപ്പോള്‍ ഒന്നരമാസം അല്ലെങ്കില്‍ നാല് മാസം.'- നദാല്‍ പറഞ്ഞു.
പ്രൊഫഷണല്‍ ടെന്നീസില്‍ നിന്ന് വിരമിക്കാനൊരുങ്ങുന്നതായും നദാല്‍ വ്യക്തമാക്കി. 'അടുത്ത വര്‍ഷം എന്റെ പ്രൊഫഷണല്‍ കരിയറിലെ അവസാന വര്‍ഷമായിരിക്കും. അങ്ങനെയാണ് എന്റെ ആലോചന' നദാല്‍ പറഞ്ഞു.
പ്രൊഫഷണല്‍ ടെന്നീസില്‍ ഏറ്റവും കൂടുതല്‍ ഗ്രാന്‍ഡ്സ്ലാം നേടിയ പുരുഷ താരങ്ങളിലൊരാളാണ് നദാല്‍. 22 ഗ്രാന്‍ഡ്സ്ലാം കിരീടങ്ങളാണ് നദാലിനുള്ളത്. 14 തവണ ഫ്രഞ്ച് ഓപ്പണ്‍ കിരീടത്തില്‍ മുത്തമിട്ടിട്ടുണ്ട്. നാല് തവണ യുഎസ് ഓപ്പണ്‍ നേടിയ നദാല്‍ രണ്ട് വീതം തവണ വിംബിള്‍ഡണും ഓസ്ട്രേലിയന് ഓപ്പണും നേടിയിട്ടുണ്ട്.
കളിമണ്‍കോര്‍ട്ടിലെ അസാമാന്യപ്രകടനമാണ് റാഫേല്‍ നദാലിനെ എന്നും വേറിട്ടുനിര്‍ത്തിയിട്ടുള്ളത്. 2005-മുതല്‍ കളിമണ്‍കോര്‍ട്ടിലെ നദാലിന്റെ പ്രകടനം ഏവരേയും അത്ഭുതപ്പെടുത്തുന്നതായിരുന്നു. 2005-മുതല്‍ 2008 വരെ തുടര്‍ച്ചയായി ഫ്രഞ്ച് ഓപ്പണ്‍ വിജയിച്ച നദാല്‍ പിന്നീട് പത്ത് കിരീടങ്ങള്‍ കൂടി നേടി. കളിമണ്‍കോര്‍ട്ടിലെ രാജാവായി നദാല്‍ മാറുന്ന പതിറ്റാണ്ടുകളായിരുന്നു പിന്നീട്.
2008, 2010 വര്‍ഷങ്ങളിലാണ് നദാല്‍ വിംബിള്‍ഡണില്‍ മുത്തമിട്ടത്. 2009, 2022 വര്‍ഷങ്ങളില്‍ ഓസ്ട്രേലിയന് ഓപ്പണും സ്വന്തമാക്കി. 2008-ലെ വിംബിള്‍ഡണ്‍ ഫൈനല്‍ ടെന്നീസ് ചരിത്രത്തിലെ തന്നെ ഏറ്റവും മികച്ച മത്സരങ്ങളിലൊന്നായിരുന്നു. അന്ന് അഞ്ച് സെറ്റ് നീണ്ട പോരാട്ടത്തിനൊടുവിലാണ് നദാല്‍ ഫെഡററെ കീഴടക്കിയത്.
നദാലിനൊപ്പം റോജര്‍ ഫെഡററും നൊവാക് ജോക്കോവിച്ചും ടെന്നീസ് ലോകത്ത് തിളങ്ങിനിന്ന പതിറ്റാണ്ടുകള്‍ക്കൊടുക്കം കായികപ്രേമികളെ നിരാശയിലാഴ്ത്തിയാണ് നദാലും വിരമിക്കാനൊരുങ്ങുന്നത്. റോജര്‍ ഫെഡറര്‍ നേരത്തേ ടെന്നീസില്‍ നിന്ന് വിരമിച്ചിരുന്നു.
Content Highlights: Rafael Nadal To Skip French Open For First Time, May Retire Next Year
Also Watch
RELATED STORIES
.jpg?$p=1a21421&f=1x1&w=100&q=0.8)
IN CASE YOU MISSED IT
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..