കോട്ടയം: കേരള രഞ്ജി ട്രോഫി മുന്‍ ക്യാപ്റ്റനും കേരളത്തിന്റെ ഹോക്കി ടീമംഗവുമായിരുന്ന ഡോ: മദന്‍ മോഹന്‍ (72) അന്തരിച്ചു. ശാരീരിക അസ്വസ്ഥതകളെത്തുടര്‍ന്ന് കോട്ടയത്തെ വീട്ടില്‍ വെച്ചായിരുന്നു അന്ത്യം. രഞ്ജി ട്രോഫിയില്‍ കേരളം ആദ്യമായി ഹൈദരാബാദിനെ തോല്‍പ്പിച്ചത് മദന്‍ മോഹന്റെ ക്യാപ്റ്റന്‍സിക്ക് കീഴിലാണ്.
മധ്യനിര ബാറ്റ്‌സ്മാനായിരുന്ന മദന്‍മോഹന്‍ മികച്ച ഫീല്‍ഡറുമായിരുന്നു. കേരളത്തിനായി 32 മത്സരങ്ങളില്‍ നിന്ന് 828 റണ്‍സും അഞ്ചു വിക്കറ്റും നേടിയിട്ടുണ്ട്. 1961 മുതല്‍ 1971 വരെ കേരളത്തിനായി കളിച്ചു. ക്രിക്കറ്റില്‍ നിന്ന് വിരമിച്ച ശേഷം കേരളത്തിന്റെ സെലക്ഷന്‍ കമ്മിറ്റി ചെയര്‍മാനായും മദന്‍ മോഹന്‍ പ്രവര്‍ത്തിച്ചിട്ടുണ്ട്. കേരള ക്രിക്കറ്റ് അസോസിയേഷന്റെ ലൈഫ് ടൈം അച്ചീവ്‌മെന്റ് പുരസ്‌കാരവും നേടി.
തിരുവനന്തപുരം മെഡിക്കല്‍ കോളേജില്‍ നിന്ന് സ്വര്‍ണമെഡലോടെ മെഡിസിന്‍ പൂര്‍ത്തിയാക്കിയ മദന്‍ മോഹന്‍ കോട്ടയം മെഡിക്കല്‍ കോളേജിലെ പീഡിയാട്രിക് സര്‍ജനായും സേവനമനുഷ്ഠിച്ചിട്ടുണ്ട്. ഭാര്യയും രണ്ട് ആണ്‍കുട്ടികളുമാണുള്ളത്.
Content Highlights: Madan Mohan Former Kerala Ranji Trophy Captian Died
