11 June 2020, 06:35 PM IST

1 min read

Read later

മുംബൈ: വെസ്റ്റിൻഡീസ് മുൻ ക്യാപ്റ്റൻ ഡാരെൻ സമിയുടെ വംശീയാധിക്ഷേപത്തെ കുറിച്ചുള്ള വെളിപ്പെടുത്തൽ ക്രിക്കറ്റ് ലോകത്ത് ഏറെ ചർച്ചയായിരുന്നു. ഐ.പി.എൽ കളിക്കുന്നതിനിടയിലാണ് താൻ വംശീയാധിക്ഷേപത്തിന് ഇരയായതെന്ന് സമി വ്യക്തമാക്കിയിരുന്നു. ഇതോടെ മാന്യൻമാരുടെ കളിയായ ക്രിക്കറ്റും ഇക്കാര്യത്തിൽ ഫുട്ബോളിൽ നിന്ന് വിഭിന്നമല്ലെന്ന് തെളിഞ്ഞു.

ഇതിന് പിന്നാലെ ഇന്ത്യയുടെ മുൻതാരം ഇർഫാൻ പഠാനും തന്റെ നിലപാട് വ്യക്തമാക്കി രംഗത്തെത്തിയിരുന്നു. നിറത്തിന്റെ പേരിൽ മാത്രമല്ല, വിശ്വാസത്തിന്റെ പേരിലുള്ള വിവേചനവും വംശീയാധിക്ഷേപമായി കണക്കാക്കണമെന്നായിരുന്നു പഠാന്റെ ട്വീറ്റ്. ഈ വിശ്വാസത്തിന്റെ പേരിൽ മാത്രം വീട് വാങ്ങാൻ പോലും പറ്റാത്ത അവസ്ഥ സമൂഹത്തിലുണ്ടെന്നും ഇർഫാൻ പഠാൻ ട്വീറ്റ് ചെയ്തിരുന്നു.

ഇതിന് പിന്നാലെ താരത്തെ പിന്തുണച്ചും തള്ളിപ്പറഞ്ഞും നിരവധി പേർ രംഗത്തെത്തി. എന്നാൽ ഇതിനെല്ലാം മറുപടി നൽകിയിരിക്കുകയാണ് പഠാൻ. തന്റെ അഭിപ്രായം ഇന്ത്യക്കാരന്റേതാണെന്നും ഇന്ത്യക്കാരന് വേണ്ടിയാണെന്നും പഠാൻ ട്വീറ്റ് ചെയ്തു.

'എന്റെ അഭിപ്രായങ്ങളെല്ലാം എക്കാലവും ഇന്ത്യക്കാരനെന്ന നിലയിലാണ്. അത് ഇന്ത്യക്ക് വേണ്ടിയുമാണ്. അത് അവസാനിപ്പിക്കാൻ ഞാൻ ഒരിക്കലും ഉദ്ദേശിക്കുന്നില്ല'.-പഠാൻ പുതിയ ട്വീറ്റിൽ പറയുന്നു.

Content Highlights: Irfan Pathan post on racism

കൂടുതല്‍ കായിക വാര്‍ത്തകള്‍ക്കും ഫീച്ചറുകള്‍ക്കുമായി വാട്ട്‌സ്ആപ്പ് ഗ്രൂപ്പില്‍ ജോയിന്‍ ചെയ്യൂ... https://mbi.page.link/1pKR