മിലാന്‍: ചാമ്പ്യന്‍സ് ലീഗ് ഫുട്‌ബോളില്‍ സ്പാനിഷ് വമ്പന്‍മാരായ റയല്‍ മഡ്രിഡ് ബുധനാഴ്ച രാത്രി നിര്‍ണായക പോരാട്ടത്തിനിറങ്ങുന്നു. ഇറ്റാലിയന്‍ ശക്തികളായ ഇന്റര്‍ മിലാനാണ് എതിരാളി. മറ്റ് മത്സരങ്ങളില്‍ ലിവര്‍പൂള്‍ അറ്റ്‌ലാന്റയെയും ബയേണ്‍ മ്യൂണിക് റെഡ്ബുള്‍ സാല്‍സ്ബര്‍ഗിനെയും മാഞ്ചെസ്റ്റര്‍ സിറ്റി ഒളിമ്പ്യാക്കോസിനെയും നേരിടും.
ഗ്രൂപ്പ് ബിയില്‍ റയലിന് മൂന്ന് കളിയില്‍ നാല് പോയന്റുണ്ട്. ബുധനാഴ്ച ജയിച്ചാല്‍ നോക്കൗട്ടിലെത്തുന്നത് എളുപ്പമാകും. അഞ്ച് പോയന്റുമായി ജര്‍മന്‍ ക്ലബ്ബ് ബൊറൂസ്സിയ മൊണ്‍ചെന്‍ഗ്ലാഡ്ബാക്കാണ് ഗ്രൂപ്പില്‍ മുന്നില്‍. ഷാക്തര്‍ ഡൊണെറ്റ്‌സ്‌കിന് നാല് പോയന്റുണ്ട്. രണ്ട് പോയന്റുമായി ഇന്റര്‍മിലാന്‍ അവസാന സ്ഥാനത്താണ്. ഇറ്റാലിയന്‍ ക്ലബ്ബിന് ജയം അനിവാര്യമാണ്. എന്നാല്‍ സീരി എയില്‍ മികച്ച പ്രകടനമാണ് ടീം കാഴ്ചവെയ്ക്കുന്നത്. അതിന്റെ ആത്മവിശ്വാസത്തിലാണ് ലുക്കാക്കുവും സംഘവും ഇന്ന് റയലിനെതിരെ ഇറങ്ങുന്നത്.
മറ്റുമത്സരങ്ങളില്‍ അത്‌ലറ്റിക്കോ മഡ്രിഡ് ലോക്കോമോട്ടീവ് മോസ്‌കോയെയും അയാക്‌സ് മിഡ്റ്റിലന്‍ഡിനെയും പോര്‍ട്ടോ മാര്‍സെയ്‌ലിനെയും മൊണ്‍ചെന്‍ഗ്ലാഡ്ബാക്ക് ഷാക്തറിനെയും നേരിടും.
Content Highlights: Real Madrid will Face Inter Milan in Champions League today
