.jpg?$p=e4e93ab&f=16x10&w=852&q=0.8)
Photo: AP
പാരിസ്: ഈ സീസണ്‍ അവസാനിക്കുന്നതോടെ അര്‍ജന്റീന സൂപ്പര്‍ താരം ലയണല്‍ മെസ്സി ഫ്രഞ്ച് ക്ലബ്ബ് പിഎസ്ജി വിടുമെന്ന റിപ്പോര്‍ട്ടുകള്‍ക്കിടെ താരത്തിന്റെ കാര്യത്തില്‍ ക്ലബ്ബിന്റെ യു ടേണ്‍. മെസ്സിയുമായി പിഎസ്ജി കരാര്‍ പുതുക്കില്ലെന്നും താരം മുന്‍ ക്ലബ്ബായ ബാഴ്‌സയിലേക്ക് തിരികെയെത്തിയേക്കുമെന്നുമുള്ള റിപ്പോര്‍ട്ടുകള്‍ക്കിടെ ഇപ്പോഴിതാ മെസ്സിയുമായുള്ള കരാര്‍ പുതുക്കാന്‍ പിഎസ്ജി തയ്യാറെടുക്കുകയാണെന്ന റിപ്പോര്‍ട്ടുകളും പുറത്തുവരുന്നു.
അടുത്തിടെ ക്ലബ്ബിന്റെ അനുമതിയില്ലാതെ സൗദി അറേബ്യയിലേക്ക് യാത്രചെയ്തതിന് മെസ്സിയെ പിഎസ്ജി രണ്ടാഴ്ചത്തേക്ക് സസ്‌പെന്‍ഡ് ചെയ്തിരുന്നു. ഈ വിഷയത്തില്‍ ക്ലബ്ബിനോടും താരങ്ങളോടും മെസ്സി ഖേദം പ്രകടിപ്പിച്ചെങ്കിലും താരവും ക്ലബ്ബും തമ്മിലുള്ള ബന്ധത്തില്‍ വിള്ളല്‍ വീണതായി റിപ്പോര്‍ട്ടുകളുണ്ടായിരുന്നു. ഇതോടെ മെസ്സി ഫ്രഞ്ച് ക്ലബ്ബ് വിടുമെന്ന കാര്യം ഏതാണ്ട് ഉറപ്പായിരുന്നു. ജൂണ്‍ വരെയാണ് മെസ്സിക്ക് ഫ്രഞ്ച് ക്ലബ്ബുമായി കരാറുള്ളത്. പിന്നാലെ മെസ്സിയുമായി ചര്‍ച്ചകള്‍ ആരംഭിച്ചതായി വ്യക്തമാക്കി സ്പാനിഷ് ക്ലബ്ബ് ബാഴ്‌സലോണയും രംഗത്തെത്തി.
ഇതിനു പിന്നാലെയാണ് ഇപ്പോള്‍ പിഎസ്ജി മെസ്സിയുമായുള്ള കരാര്‍ പുതുക്കാന്‍ തീരുമാനിച്ചതായി ബ്രിട്ടീഷ് മാധ്യമമായ ദ ടൈംസ് റിപ്പോര്‍ട്ട് ചെയ്തിരിക്കുന്നത്. മെസ്സിക്കായി മികച്ച ഓഫര്‍ തന്നെയാണ് ക്ലബ്ബ് മുന്നോട്ടുവെയ്ക്കുകയെന്നും റിപ്പോര്‍ട്ടില്‍ പറയുന്നു.
അടുത്തിടെ മെസ്സിയും ക്ലബ്ബിന്റെ ആരാധകരും തമ്മില്‍ അത്ര നല്ല ബന്ധത്തിലായിരുന്നില്ല. സൂപ്പര്‍ താരനിര ഉണ്ടായിട്ടും ലീഗ് വണ്ണില്‍ ക്ലബ്ബിന്റെ തുടര്‍തോല്‍വികള്‍ ആരാധകരെ ചൊടിപ്പിച്ചിരുന്നു. പലപ്പോഴും പിഎസ്ജി ആരാധകര്‍ മെസ്സിയെ കൂക്കിവിളിക്കുന്നതിനും സ്റ്റേഡിയം സാക്ഷിയായിട്ടുണ്ട്. ഇതിന് പിന്നാലെയായിരുന്നു അനുമതിയില്ലാതെ സൗദി അറേബ്യയിലേക്ക് യാത്രചെയ്തതിന് മെസ്സിക്ക് ഏര്‍പ്പെടുത്തിയ സസ്‌പെന്‍ഷന്‍. ഇത് ക്ലബ്ബും താരവും തമ്മിലുള്ള ബന്ധം വഷളാക്കിയതായും റിപ്പോര്‍ട്ടുകള്‍ വന്നിരുന്നു. എന്നാല്‍ ഇത്തരം കാര്യങ്ങളെയെല്ലാം തള്ളുന്നതാണ് ദ ടൈംസിന്റെ റിപ്പോര്‍ട്ട്.
അതേസമയം മെസ്സിയെ ക്യാമ്പ് നൗവിലെത്തിക്കാന്‍ സ്പാനിഷ് ക്ലബ്ബ് ബാഴ്‌സലോണ പരസ്യമായി തന്നെ രംഗത്തുണ്ട്. ക്ലബ്ബിന്റെ വൈസ് പ്രസിഡന്റ് റാഫേല്‍ യുസ്‌തെ ഇക്കാര്യം സ്ഥിരീകരിക്കുകയും ചെയ്തിരുന്നു. എന്നാല്‍ സ്പാനിഷ് ലീഗിന്റെ സാമ്പത്തിക നിയന്ത്രണങ്ങളും ക്ലബ്ബിന്റെ സാമ്പത്തിക പ്രതിസന്ധിയും ഇക്കാര്യത്തില്‍ ബാഴ്‌സയ്ക്ക് തിരിച്ചടിയാണ്.
അതേസമയം സീസണിനൊടുവില്‍ മെസ്സി, പിഎസ്ജി വിടുമെന്ന റിപ്പോര്‍ട്ടുകള്‍ വന്നതോടെ താരത്തിന് റെക്കോഡ് പ്രതിഫലം വാഗ്ദാനം ചെയ്ത് സൗദി ക്ലബ്ബ് അല്‍ ഹിലാലും രംഗത്തെത്തിയിരുന്നു. 3270 കോടി രൂപ വാര്‍ഷികപ്രതിഫലത്തിന്റെ വാഗ്ദാനമാണ് ക്ലബ്ബ് നല്‍കിയത്.
Content Highlights: psg are reportedly prepared to extend Lionel Messi contract
കൂടുതല്‍ കായിക വാര്‍ത്തകള്‍ക്കും ഫീച്ചറുകള്‍ക്കുമായി വാട്ട്‌സ്ആപ്പ് ഗ്രൂപ്പില്‍ ജോയിന്‍ ചെയ്യൂ... https://mbi.page.link/1pKR
Also Watch
RELATED STORIES
.jpg?$p=c686dae&f=1x1&w=100&q=0.8)
.jpg?$p=e4e93ab&f=1x1&w=100&q=0.8)
IN CASE YOU MISSED IT
.jpg?$p=1990e2a&f=1x1&w=100&q=0.8)
.jpg?$p=8312ca4&f=1x1&w=100&q=0.8)
.jpg?$p=e4e93ab&f=1x1&w=100&q=0.8)
.jpg?$p=8896326&q=0.8&f=16x11&w=104)
.jpg?$p=e1fda36&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..