ലാന്‍കാഷെയര്‍: ബേണ്‍ലിയെ എതിരില്ലാത്ത മൂന്നു ഗോളുകള്‍ക്ക് തകര്‍ത്ത് ലിവര്‍പൂള്‍ ലീഗില്‍ ഒന്നാം സ്ഥാനം നിലനിര്‍ത്തി. ബേണ്‍ലിയുടെ മൈതാനത്തു നടന്ന മത്സരത്തില്‍ സാദിനോ മാനെയും റോബര്‍ട്ടോ ഫിര്‍മിനോയുമാണ് ലിവര്‍പൂളിനായി സ്‌കോര്‍ ചെയ്തത്. മറ്റൊന്ന് സെല്‍ഫ് ഗോളായിരുന്നു.
മത്സരത്തിന്റെ 33-ാം മിനിറ്റില്‍ ബേണ്‍ലിയുടെ ക്രിസ് വുഡിന്റെ സെല്‍ഫ് ഗോളില്‍ ലിവര്‍പൂള്‍ മുന്നിലെത്തി. ലിവര്‍പൂള്‍ താരം അലക്‌സാണ്ടര്‍ അര്‍നോള്‍ഡിന്റെ ക്രോസ് തടയാനുള്ള വുഡിന്റെ ശ്രമം പിഴയ്ക്കുകയായിരുന്നു.
37-ാം മിനിറ്റില്‍ മാനെയിലൂടെ ലിവര്‍പൂള്‍ ലീഡുയര്‍ത്തി. 80-ാം മിനിറ്റില്‍ ഫിര്‍മിനോ ലിവര്‍പൂളിന്റെ ഗോള്‍ പട്ടിക പൂര്‍ത്തിയാക്കി. നാലു മത്സരങ്ങളില്‍ നിന്ന് 12 പോയന്റുമായാണ് ലിവര്‍പൂള്‍ ലീഗില്‍ ഒന്നാമത് നില്‍ക്കുന്നത്. പ്രീമിയര്‍ ലീഗില്‍ അവസാന 13 മത്സരങ്ങളും തുടര്‍ച്ചയായി വിജയിച്ച് ക്ലോപ്പും സംഘവും ക്ലബ് റെക്കോര്‍ഡ് ഇടുകയും ചെയ്തു.
Content Highlights: Premier League Table toppers Liverpool maintain 100 percent record with comfortable win over Burnley
