ഇന്ത്യയില്‍ ഇത് ഫുട്‌ബോള്‍ മാമാങ്കത്തിന്റെ കാലമാണ്. അണ്ടര്‍-17 ലോകകപ്പ് കഴിഞ്ഞാല്‍ പിന്നീട് ഐ.എസ്.എല്‍ ആരവത്തിലേക്കാണ് ഇന്ത്യയുണരുക. നവംബര്‍ 17നാണ് ഐ.എസ്.എല്‍ തുടങ്ങുന്നത്. ഇതിന് മുന്നോടിയായി സ്റ്റാര്‍ ഇന്ത്യ പ്രൊമോ വീഡിയോ പുറത്തിറങ്ങി.
ഫ്യൂച്ചര്‍ ഹേ ഫുട്‌ബോള്‍ എന്ന് പേരിട്ടിരിക്കുന്ന വീഡിയോയില്‍ മലയാളി താരം സി.കെ വിനീതും അനസ് എടത്തൊടികയും അഭിനേതാക്കളായി എത്തുന്നുണ്ട്. ഒപ്പം യൂജിന്‍ ലിങ്‌ദോ, ജെജെ ലാല്‍പെഖുല, സുനില്‍ ഛേത്രി എന്നിവരുമുണ്ട്. ഓരോ താരങ്ങളും ഫുട്‌ബോള്‍ കളിക്കാരായി വളര്‍ന്ന സാഹചര്യങ്ങളാണ് വീഡിയോയില്‍ ചിത്രീകരിച്ചിരിക്കുന്നത്.
ഓട്ടോറിക്ഷാ ഡ്രൈവറായിരുന്ന അനസ് ഫുട്‌ബോളിലേക്ക് വന്ന കഥയും പാടത്തും ചെളിയിലും കളിച്ച് താരമായി വളര്‍ന്ന വിനീതിന്റെ കഥയും വീഡിയോയില്‍ ഒരൊറ്റ ഷോട്ടിലൂടെ പറയുന്നുണ്ട്. രണ്ട് മിനിറ്റാണ് മനോഹരമായി ചിത്രീകരിച്ചിരിക്കുന്ന വീഡിയോയുടെ ദൈര്‍ഘ്യം.
കേരള ബ്ലാസ്‌റ്റേഴ്‌സിനായി വിനീത് ഗോളടിക്കുന്ന വീഡിയോയുടെ പശ്ചാത്തലത്തില്‍ ചെണ്ടമേളത്തിന്റെ ശബ്ദമാണ്. ഒപ്പം ഗാലറിയിലിരുന്ന് സച്ചിന്‍ ചെണ്ട കൊട്ടുന്നതും വീഡിയോയില്‍ കാണാം.
