Photo: PTI
മാഞ്ചെസ്റ്റര്‍: ചാമ്പ്യന്‍സ് ലീഗില്‍ ആര്‍ബി ലെയ്പ്‌സിഗിനെതിരായ മത്സരത്തില്‍ അഞ്ചുഗോളടിച്ച് ആരാധകരെ അമ്പരപ്പിച്ച് മാഞ്ചെസ്റ്റര്‍ സിറ്റിയുടെ ഗോളടിയന്ത്രം എര്‍ലിങ് ഹാളണ്ട്. ചാമ്പ്യന്‍സ് ലീഗ് രണ്ടാം പാദ പ്രീ ക്വാര്‍ട്ടറിലാണ് ഹാളണ്ട് അഞ്ചുഗോളടിച്ചത്. മത്സരത്തില്‍ സിറ്റി 7-0 ന് വിജയിച്ചു. ഇരുപാദങ്ങളിലുമായി 8-1 ന് വിജയം നേടിക്കൊണ്ട് ടീം ക്വാര്‍ട്ടര്‍ ഫൈനലില്‍ പ്രവേശിച്ചു.
ചാമ്പ്യന്‍സ് ലീഗില്‍ ഒരു മത്സരത്തില്‍ അഞ്ചുഗോളടിക്കുന്ന ആദ്യ മാഞ്ചെസ്റ്റര്‍ സിറ്റി താരമാണ് ഹാളണ്ട്. ചാമ്പ്യന്‍സ് ലീഗില്‍ ഒരു മത്സരത്തില്‍ അഞ്ചുഗോളടിക്കുന്ന അഞ്ചാമത്തെ താരവുമാണ് ഹാളണ്ട്. ഇതിനുമുന്‍പ് മിഹൈല്‍സ് മിഹോലാപ്‌സ്, ലയണല്‍ മെസ്സി, ഡേവിഡ് ലഫാട, ലൂയിസ് അഡ്രിയാനോ എന്നിവരാണ് ഈ നേട്ടം സ്വന്തമാക്കിയവര്‍.
ഇതിനുപുറമേ മറ്റ് ചില റെക്കോഡുകള്‍ കൂടി ഹാളണ്ട് സ്വന്തമാക്കി. ചാമ്പ്യന്‍സ് ലീഗില്‍ ഇതുവരെ വെറും 25 മത്സരങ്ങളില്‍ നിന്ന് 33 ഗോളുകളാണ് താരം അടിച്ചുകൂട്ടിയത്. ചാമ്പ്യന്‍സ് ലീഗില്‍ അതിവേഗത്തില്‍ 30 ഗോളുകള്‍ നേടുന്ന താരം എന്ന റെക്കോഡും ഹാളണ്ട് സ്വന്തമാക്കി. ചാമ്പ്യന്‍സ് ലീഗില്‍ അതിവേഗത്തില്‍ 30 ഗോള്‍ നേടുന്ന ഏറ്റവും പ്രായം കുറഞ്ഞ താരം കൂടിയാണ് ഹാളണ്ട്. 22 വയസ്സും 236 ദിവസവും മാത്രമാണ് താരത്തിന്റെ പ്രായം. ചാമ്പ്യന്‍സ് ലീഗില്‍ അതിവേഗത്തില്‍ 10 ഗോളുകളും 20 ഗോളുകളും നേടിയ താരത്തിനുള്ള റെക്കോഡും ഹാളണ്ടിന്റെ പേരിലാണ്.
മറ്റൊരു മത്സരത്തില്‍ പോര്‍ട്ടോയെ സമനിലയില്‍ തളച്ച് ഇന്റര്‍മിലാനും ക്വാര്‍ട്ടറിലേക്ക് മുന്നേറി. ആദ്യപാദ മത്സരത്തില്‍ ഇന്റര്‍ എതിരില്ലാത്ത ഒരു ഗോളിന് വിജയിച്ചിരുന്നു. രണ്ടാം പാദ മത്സരം ഗോള്‍രഹിത സമനിലയില്‍ കലാശിച്ചു. ഇന്ന് നടക്കുന്ന രണ്ട് പ്രീക്വാര്‍ട്ടര്‍ മത്സരങ്ങള്‍ കൂടി കഴിഞ്ഞാല്‍ ചാമ്പ്യന്‍സ് ലീഗ് ക്വാര്‍ട്ടര്‍ ലൈനപ്പാകും. ഇന്ന് നടക്കുന്ന മത്സരങ്ങളില്‍ നാപ്പോളി എയ്ന്‍ട്രാക്ട് ഫ്രാങ്ക്ഫര്‍ട്ടിനെയും റയല്‍ മഡ്രിഡ് ലിവര്‍പൂളിനെയും നേരിടും.
Content Highlights: erling haaland scores five goals in champions league pre quarter match
Also Watch
RELATED STORIES
IN CASE YOU MISSED IT
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..