വര്‍ക്ക്‌ഷോപ്പില്‍ നിന്ന് ഇന്ത്യൻ ഫുട്ബോളിന്റെ നെറുകയിലേക്ക്, Santosh Trophy Player Dhanaraj Life story

ടിജോ ജോസ്

30 December 2019, 02:00 AM IST

കുട്ടിക്കാലത്ത് വീട്ടുമുറ്റത്തും സമീപത്തെ പാടങ്ങളിലും പന്ത് തട്ടിനടന്നിരുന്ന ധനരാജിന് പത്താം തരത്തിനുശേഷം അഷ്ടിക്ക് വക തേടേണ്ട സ്ഥിതിയായി. ഇതിനായി കല്പാത്തിയിലെ ഓട്ടോമൊബൈൽ വർക്ക്ഷോപ്പിൽ മെക്കാനിക് ഹെൽപ്പർ ജോലിക്ക് എത്തിയെങ്കിലും ഫുട്ബോളിനോടുള്ള ദാഹമടങ്ങിയില്ല.

പെരിന്തൽമണ്ണയിൽ സെവൻസ് മത്സരത്തിനിടെ അന്തരിച്ച ആർ. ധനരാജൻ എന്ന ധൻരാജിനെ ജീവിതസാഹചര്യങ്ങളോടുള്ള വെല്ലുവിളിയാണ് ദേശീയ ഫുട്ബോളിന്റെ നെറുകയിലെത്തിച്ചത്. കുട്ടിക്കാലത്ത് വീട്ടുമുറ്റത്തും സമീപത്തെ പാടങ്ങളിലും പന്ത് തട്ടിനടന്നിരുന്ന ധനരാജിന് പത്താം തരത്തിനുശേഷം അഷ്ടിക്ക് വക തേടേണ്ട സ്ഥിതിയായി. ഇതിനായി കല്പാത്തിയിലെ ഓട്ടോമൊബൈൽ വർക്ക്ഷോപ്പിൽ മെക്കാനിക് ഹെൽപ്പർ ജോലിക്ക് എത്തിയെങ്കിലും ഫുട്ബോളിനോടുള്ള ദാഹമടങ്ങിയില്ല.

കിട്ടുന്ന സമയങ്ങളിലെല്ലാം പ്രാദേശിക ടൂർണമെന്റുകളിൽ ധൻരാജ് സജീവസാന്നിധ്യമായി. എതിരാളികളുടെ ചാട്ടുളിപോലുള്ള ആക്രമണങ്ങളെ ഏത് പൊസിഷനിലും തടയാനുള്ള ശേഷിയായിരുന്നു ധൻരാജിന്റെ കരുത്തെന്ന് സഹകളിക്കാർ പറയുന്നു. ഇതാവാം രാജ്യത്തെ പ്രമുഖ ടീമുകളിൽ വിശ്വസ്തനായ വിങ്ബാക്കായി മാറാൻ വഴിയൊരുക്കിയതും.

‌ഫുട്ബോൾ പരിശീലകൻ സുധാകരനടക്കമുള്ളവരുടെ നേതൃത്വത്തിൽ ഒരുകാലത്ത് പാലക്കാട് സജീവമായിരുന്ന മുകുന്ദൻ മെമ്മോറിയൽ ഫുട്ബോൾ ക്ലബ്ബിലെ അണ്ടർ 14 താരമായാണ് പ്രൊഫഷണൽ ഫുട്ബോളിലെ ധൻരാജിന്റെ അരങ്ങേറ്റം.

2010-ല്‍ പശ്ചിമ ബംഗാള്‍ സന്തോഷ് ട്രോഫി നേടിയപ്പോള്‍ ടീമിലെ മലയാളി താരങ്ങളായ ഡെന്‍സണ്‍ ദേവദാസും ധനരാജും ട്രോഫിയുമായി ഫോട്ടോ: ടികെ പ്രദീപ് കുമാര്‍

സി.എം.എഫ്.സി.യെ ഫുട്ബോളിൽ ‘എ’ ഡിവിഷൻ സ്ഥാനത്തേക്ക് ഉയർത്തുന്നതിലും ധൻരാജിന്റെ സംഭാവനകൾ വലുതാണ്. മൂന്നുവർഷം പ്രാദേശിക ക്ലബ്ബുകളിൽ കളിച്ചശേഷം പ്രമുഖപരിശീലകൻ ചാത്തുണ്ണിയുടെ നേതൃത്വത്തിലുള്ള വിവ കേരളയുടെ താരമായി. ടീം വൈകാതെ ഒന്നാം ഡിവിഷൻ ലീഗിലെത്തി. സംസ്ഥാന ലീഗ് ചാമ്പ്യന്മാരുമായി. മൂന്ന് വർഷം ചിരാഗ് യുണൈറ്റഡ് ക്ലബ്ബിനുവേണ്ടി കളിച്ചത് ദേശീയതലത്തിലെ പ്രമുഖ ക്ലബ്ബുകളിലേക്കുള്ള ചവിട്ടുപടിയായി. തുടർന്ന്‌ രണ്ട് വർഷം കൊൽക്കത്ത ക്ലബ്ബ് മോഹൻ ബഗാനുവേണ്ടി ജേഴ്സിയണിഞ്ഞു.

2013-14 ലീഗ് സീസണിൽ മുഹമ്മദൻസ് സ്പോർട്ടിങ് ക്ലബ്ബ് ക്യാപ്റ്റനുമായി. പിന്നീട് ടോപ് ഡിവിഷൻ ലീഗിലുമെത്തി. 2014 ജൂലായ് മുതൽ ഈസ്റ്റ് ബംഗാളിന് വേണ്ടിയും കളത്തിലിറങ്ങി.

സന്തോഷ് ട്രോഫിയിൽ കേരളത്തിനുവേണ്ടി കൊച്ചിയിൽ നടന്ന ടൂർണമെന്റിൽ കുപ്പായമണിഞ്ഞ ധനരാജിന് പശ്ചിമബംഗാളിനുവേണ്ടിയും കളത്തിലിറങ്ങാൻ അവസരം കിട്ടി. കോയമ്പത്തൂരിൽ നടന്ന ടൂർണമെന്റിലായിരുന്നു ഇത്.

സെവൻസ് ടൂർണമെന്റുകളിൽ ശ്രദ്ധ കേന്ദ്രീകരിച്ചിരുന്ന ധൻരാജ് മലമ്പുഴ ആസ്ഥാനമായി പ്രവർത്തിക്കുന്ന ടാലന്റ് ഫുട്ബോൾ ക്ലബ്ബിന്റെ പരിശീലകനായിരിക്കെയാണ് മരണം.

മികച്ച കളിക്കിടയിലും ജോലി അന്യമായിരുന്ന ധൻരാജിന് അടുത്തിടെ നിയമനം നൽകാൻ സർക്കാർ തീരുമാനമെടുത്തിരുന്നു. അതിനിടെയാണ് പെരിന്തൽമണ്ണയിലെ കളിക്കിടെ ധൻരാജിന് ജീവൻ വെടിയേണ്ടിവന്നത്.

Content Highlights: Santosh Trophy Player Dhanaraj Life story