പുണെ: ദക്ഷിണാഫ്രിക്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ടീം ഇന്ത്യയെ നയിച്ച് കളത്തിലിറങ്ങിയതോടെ മുന്‍ ഇന്ത്യന്‍ ക്യാപ്റ്റന്‍ സൗരവ് ഗാംഗുലിയെ പിന്നിലാക്കി വിരാട് കോലി.

ക്യാപ്റ്റനായി വിരാട് കോലിയുടെ 50-ാം ടെസ്റ്റാണിത്. ഇന്ത്യയെ 50 ടെസ്റ്റ് മത്സരങ്ങളില്‍ നയിക്കുന്ന രണ്ടാമത്തെ ഇന്ത്യന്‍ ക്യാപ്റ്റനെന്ന ബഹുമതിയാണ് ഇതോടെ കോലിക്ക് സ്വന്തമായത്. 

2000 മുതല്‍ 2005 വരെ ഇന്ത്യയെ 49 ടെസ്റ്റുകളില്‍ നയിച്ച സൗരവ് ഗാംഗുലിയുടെ നേട്ടം കോലി മറികടന്നു. 2008 മുതല്‍ 2014 വരെ ഇന്ത്യയെ 60 ടെസ്റ്റുകളില്‍ നയിച്ച എം.എസ് ധോനിയാണ് ഇനി കോലിക്കു മുന്നിലുള്ളത്.

ഇതുവരെ കോലിയുടെ കീഴില്‍ 29 ടെസ്റ്റുകള്‍ വിജയിച്ച ഇന്ത്യ 10 എണ്ണത്തില്‍ തോറ്റു. 10 ടെസ്റ്റുകള്‍ സമനിലയില്‍ കലാശിച്ചു.

60 ടെസ്റ്റുകളില്‍ നിന്ന് ധോനിക്ക് 27 ജയങ്ങളാണുള്ളത്. 18 ടെസ്റ്റുകള്‍ തോറ്റപ്പോള്‍ 15 എണ്ണം സമനിലയിലായി. 49 മത്സരങ്ങളില്‍ ഇന്ത്യയെ നയിച്ച ഗാംഗുലിയുടെ പേരില്‍ 21 വിജയങ്ങളാണുള്ളത്. 13 മത്സരങ്ങള്‍ തോറ്റപ്പോള്‍ 15 എണ്ണം സമനിലയിലായി.

Content Highlights: Virat Kohli Surpasses Sourav Ganguly's Feat As Test Captain