22 March 2023, 09:14 PM IST

1 min read

Read later

Photo: Getty Images

ചെന്നൈ: അവിശ്വസനീയം എന്ന് ഒറ്റവാക്കില്‍ പറയാം. ലോക ഒന്നാം നമ്പര്‍ ട്വന്റി 20 ബാറ്ററായ ഇന്ത്യയുടെ വിശ്വസ്ത ബാറ്റര്‍ സൂര്യകുമാര്‍ യാദവിന് നാണക്കേടിന്റെ റെക്കോഡ്. ഓസ്‌ട്രേലിയയ്‌ക്കെതിരായ ഏകദിന പരമ്പരയില്‍ തുടര്‍ച്ചയായ മൂന്ന് മത്സരങ്ങളിലും താരം ഗോള്‍ഡന്‍ ഡക്കായി മടങ്ങി. നേരിട്ട ആദ്യപന്തില്‍ തന്നെ മൂന്ന് മത്സരങ്ങളിലും പുറത്തായ സൂര്യകുമാര്‍ ഇപ്പോള്‍ സമൂഹമാധ്യമങ്ങളില്‍ വൈറലാകുകയാണ്.

ഓസ്‌ട്രേലിയയ്‌ക്കെതിരായ മൂന്നാം ഏകദിനത്തില്‍ ഏഴാമനായി ക്രീസിലെത്തിയ സൂര്യകുമാര്‍ നേരിട്ട ആദ്യപന്തില്‍ തന്നെ പുറത്തായി. ആഷ്ടണ്‍ ആഗര്‍ സൂര്യകുമാറിനെ ക്ലീന്‍ ബൗള്‍ഡാക്കുകയായിരുന്നു. ആദ്യ രണ്ട് മത്സരങ്ങളില്‍ സൂര്യകുമാര്‍ ആദ്യ പന്തില്‍ തന്നെ മിച്ചല്‍ സ്റ്റാര്‍ക്കിന് വിക്കറ്റ് സമ്മാനിച്ചിരുന്നു അതും സമാനരീതിയില്‍ . ആദ്യ രണ്ട് മത്സരങ്ങളിലും സൂര്യകുമാര്‍ സ്റ്റാര്‍ക്കിന്റെ പന്തുകളില്‍ വിക്കറ്റിന് മുന്നില്‍ കുടുങ്ങുകയായിരുന്നു.

തുടര്‍ച്ചയായി മൂന്ന് ഏകദിന മത്സരങ്ങളില്‍ ഗോള്‍ഡന്‍ ഡക്കാകുന്ന ആദ്യ ഇന്ത്യന്‍ ബാറ്റര്‍ എന്ന നാണക്കേടിന്റെ റെക്കോഡും സൂര്യകുമാര്‍ ഏറ്റുവാങ്ങി. സൂര്യകുമാറിന്റെ ദയനീയ പ്രകടനത്തില്‍ അരിശംപൂണ്ട ആരാധകര്‍ താരത്തിനെതിരേ രംഗത്തെത്തിയിട്ടുണ്ട്.

നിരവധി ട്രോളുകളാണ് സൂര്യകുമാറിനെതിരേ വന്നിരിക്കുന്നത്. സൂര്യകുമാറിന് പകരം സഞ്ജു സാംസണെ കളിപ്പിക്കണമെന്ന ആവശ്യവും ശക്തമാണ്. എന്നാല്‍ സൂര്യകുമാറിനെ അനുകൂലിച്ചും പലരും പോസ്റ്റുകള്‍ ഷെയര്‍ ചെയ്യുന്നുണ്ട്. അദ്ദേഹം ശക്തമായി തിരിച്ചുവരുമെന്നാണ് ആരാധകരില്‍ പലരും പറയുന്നത്. ഈ ഫോം തുടര്‍ന്നാല്‍ വരാനിരിക്കുന്ന ലോകകപ്പില്‍ ടീമിലിടം നേടാന്‍ സൂര്യകുമാര്‍ നന്നായി വിയര്‍ക്കേണ്ടിവരും.