21 June 2020, 08:45 PM IST

1 min read

Read later

ന്യൂഡൽഹി: ഇന്ത്യയുടെ ക്യാപ്റ്റൻമാരെ താരതമ്യം ചെയ്യുമ്പോൾ സൗരവ് ഗാംഗുലി, എം.എസ് ധോനി, വിരാട് കോലി എന്നിവരുടെ പേരുകളാണ് ഉയർന്നു കേൾക്കാറുള്ളതെന്നും രാഹുൽ ദ്രാവിഡിനെ പലരും മറന്നുപോകുകയാണ് ചെയ്യാറുള്ളതെന്നും ഇന്ത്യയുടെ മുൻ ഓപ്പണർ ഗൗതം ഗംഭീർ. ക്യാപ്റ്റനെന്ന നിലയിൽ ദ്രാവിഡിനെ പലപ്പോഴും വിലകുറച്ചാണ് കാണുന്നതെന്നും ഗംഭീർ വ്യക്തമാക്കുന്നു.

104 മത്സരങ്ങളിൽ ദ്രാവിഡിന് കീഴിൽ കളിക്കാനിറങ്ങിയ ഇന്ത്യ 50 മത്സരങ്ങളിൽ വിജയിച്ചു. ഇന്ത്യയുടെ ക്യാപ്റ്റൻമാരിൽ മികച്ച അഞ്ചാമത്തെ വിജയശതമാനമാണ് ദ്രാവിഡിന്റെ പേരിലുള്ളത്. 2007 ഏകദിന ലോകകപ്പിൽ ദ്രാവിഡിന്റെ ക്യാപ്റ്റൻസിയിൽ ഇന്ത്യ ഗ്രൂപ്പ് ഘട്ടത്തിൽ തന്നെ പുറത്തായി.

'സൗരവ് ഗാംഗുലിക്ക് കീഴിലാണ് ഞാൻ ഏകദിനത്തിൽ അരങ്ങേറ്റം കുറിച്ചത്. ടെസ്റ്റ് അരങ്ങേറ്റം രാഹുൽ ദ്രാവിഡിന് കീഴിലായിരുന്നു. അദ്ദേഹത്തിന്റെ ക്യാപ്റ്റൻസിക്ക് ക്രെഡിറ്റ് നൽകാത്തത് നിർഭാഗ്യകരമാണ്. നമ്മൾ സംസാരിക്കുന്നത് കോലി, ധോനി, ഗാംഗുലി എന്നിവരെ കുറിച്ചാണ്. ദ്രാവിഡിനെ കുറിച്ച് ഒന്നും പറയാറില്ല.' ഗംഭീർ വ്യക്തമാക്കുന്നു.

ദ്രാവിഡിന്റെ ക്യാപ്റ്റൻസിയിൽ ഇന്ത്യ നേടിയ നേട്ടങ്ങളെ കുറിച്ചും ഗംഭീർ സംസാരിച്ചു. 2006-ൽ വെസ്റ്റിൻഡീസിനെതിരേയും 2007-ൽ ഇംഗ്ലണ്ടിനെതിരേയും ഇന്ത്യ ടെസ്റ്റ് പരമ്പര സ്വന്തമാക്കിയത് ദ്രാവിഡിന് കീഴിലായിരുന്നു.

content highlights: Rahul Dravid is probably the most underrated cricketer and leader says Gautam Gambhir

കൂടുതല്‍ കായിക വാര്‍ത്തകള്‍ക്കും ഫീച്ചറുകള്‍ക്കുമായി വാട്ട്‌സ്ആപ്പ് ഗ്രൂപ്പില്‍ ജോയിന്‍ ചെയ്യൂ... https://mbi.page.link/1pKR