Photo Courtesy: CPL t20 official website
പോർട്ട് ഓഫ് സ്പെയിൻ: വെറ്ററൻ താരം കീറോൺ പൊള്ളാർഡിന്റെ വെടിക്കെട്ട് ബാറ്റിങ്ങിൽ ട്രിൻബാഗോ നൈറ്റ് റൈഡേഴ്സിന് അവിശ്വസനീയ ജയം. കരീബിയൻ പ്രീമിയർ ലീഗിൽ ബാർബഡോസ് ട്രൈഡന്റ്സിനെ രണ്ടു വിക്കറ്റും ഒരു പന്തും ശേഷിക്കെ ട്രിൻബാഗോ മറികടന്നു. 28 പന്തിൽ ഒമ്പത് സിക്സിന്റേയും രണ്ടു ഫോറിന്റേയും സഹായത്തോടെ 72 റൺസാണ് പൊള്ളാർഡ് അടിച്ചെടുത്തത്.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ബാർബഡോസ് 20 ഓവറിൽ ഏഴു വിക്കറ്റുകൾ നഷ്ടപ്പെടുത്തി നേടിയത് 148 റൺസ്. 47 റൺസെടുത്ത ജോൺസൺ ചാൾസും 42 റൺസ് അടിച്ച കെയിൽ മേയേഴ്സുമാണ് ബാർബഡോസിനായി തിളങ്ങിയത്.
എന്നാൽ മറുപടി ബാറ്റിങ്ങിനിറങ്ങിയ ട്രിൻബാഗോയ്ക്ക് തുടക്കം മുതൽ പിഴച്ചു. ആറു റൺസ് സ്കോർ ബോർഡിലെത്തിയപ്പോൾ ആദ്യ വിക്കറ്റ് നഷ്ടമായ ട്രിൻബാഗോ 12.4 ഓവറിൽ അഞ്ചു വിക്കറ്റിന് 62 റൺസ് എന്ന നിലയിൽ തകർന്നു. അവിടെ നിന്നാണ് പൊളളാർഡ് ടീമിനെ വിജയത്തിലേക്ക് കൈപ്പിടിച്ചുയർത്തിയത്.
നേരിട്ട ആദ്യ പന്ത് തന്നെ ബൗണ്ടറിയിലെത്തിച്ച പൊളളാർഡ് ഒരു വശത്ത് വിക്കറ്റുകൾ വീണപ്പോഴും പിടിച്ചുനിന്നു. 17-ാം ഓവറിൽ പൊള്ളാർഡിന്റെ നാല് സിക്സ് അടക്കം ട്രിൻബാഗോ നേടിയത് 25 റൺസാണ്. 22 പന്തുകൾ നേരിട്ട് താരം അർധ സെഞ്ചുറി പൂർത്തിയാക്കി.
18-ാം ഓവറിൽ 10 റൺസും 19-ാം ഓവറിൽ 16 റൺസും നേടി ട്രിൻബാഗോ വിജയത്തിന് തൊട്ടടുത്തെത്തി. ഇതോടെ അവസാന ഓവറിൽ വിജയിക്കാൻ വേണ്ടത് 15 റൺസ് എന്ന അവസ്ഥയിലായി. ആദ്യ പന്തിൽ സിക്സ് അടിച്ച പൊള്ളാർഡ് രണ്ടാം പന്തിൽ ഡബിളെടുക്കാൻ ഓടുന്നതിനിടെ റൺഔട്ടായി. ഇതോടെ നാല് പന്തിൽ വിജയിക്കാൻ എട്ടു റൺസ് എന്നായി ലക്ഷ്യം.
മൂന്നാം പന്തിൽ ജെയ്‌ഡൻ സീൽസ് സിംഗിളെടുത്തു. ലക്ഷ്യം മൂന്നു പന്തിൽ ഏഴു റൺസായി. നാലാം പന്ത് സിക്സിലേക്ക് പറത്തിയ ഖാരി പിയർ അഞ്ചാം പന്തിൽ സിംഗിളെടുത്ത് ട്രിൻബാഗോയെ വിജയതീരത്തെത്തിച്ചു.
Content Highlights: Kieron Pollard, CPL 2020
Also Watch
RELATED STORIES
IN CASE YOU MISSED IT
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..