കോലിയുടെ പോരാട്ടം വിഫലമായി, ഇന്ത്യയെ 12 റണ്‍സിന് കീഴടക്കി ഓസ്‌ട്രേലിയ


187 റണ്‍സ് വിജയലക്ഷ്യത്തിലേക്ക് ബാറ്റേന്തിയ ഇന്ത്യയ്ക്ക് നിശ്ചിത ഓവറില്‍ എഴുവിക്കറ്റ് നഷ്ടത്തില്‍ 174 റണ്‍സെടുക്കാനേ കഴിഞ്ഞുള്ളൂ

മാത്യു വെയ്ഡ് | Photo: twitter.com|ICC

സിഡ്‌നി: ഓസ്‌ട്രേലിയയ്‌ക്കെതിരായ മൂന്നാം ട്വന്റി 20 മത്സരത്തില്‍ ഇന്ത്യയ്ക്ക് 12 റണ്‍സിന്റെ തോല്‍വി. 187 റണ്‍സ് വിജയലക്ഷ്യത്തിലേക്ക് ബാറ്റേന്തിയ ഇന്ത്യയ്ക്ക് നിശ്ചിത ഓവറില്‍ എഴുവിക്കറ്റ് നഷ്ടത്തില്‍ 174 റണ്‍സെടുക്കാനേ കഴിഞ്ഞുള്ളൂ. 85 റണ്‍സെടുത്ത നായകന്‍ കോലി മാത്രമാണ് ഇന്ത്യയ്ക്ക് വേണ്ടി മികച്ച പ്രകടനം പുറത്തെടുത്തത്. ആദ്യം ബാറ്റ് ചെയ്ത ഓസ്‌ട്രേലിയ മാത്യു വെയ്ഡിന്റെയും മാക്‌സവെല്ലിന്റെയും ബാറ്റിങ് കരുത്തിലാണ് 186 റണ്‍സെടുത്തത്. തോറ്റെങ്കിലും ആദ്യ രണ്ടുമത്സരങ്ങളും ജയിച്ച ഇന്ത്യ നേരത്തേ പരമ്പര സ്വന്തമാക്കിയിരുന്നു. ഓസിസ് ഈ വിജയത്തോടെ മാനം രക്ഷിക്കുകയും ചെയ്തു.

187 റണ്‍സ് വിജയലക്ഷ്യവുമായി ഇറങ്ങിയ ഇന്ത്യയ്ക്ക് ആദ്യ ഓവറില്‍ തന്നെ ആദ്യ വിക്കറ്റ് നഷ്ടമായി. രണ്ടാം പന്തില്‍ രാഹുലിനെ പൂജ്യനായി മടക്കി മാക്‌സ്വെല്ലാണ് ഇന്ത്യയുടെ ആദ്യ വിക്കറ്റ് നേടിയത്. പിന്നാലെ ക്രീസിലെത്തിയ ക്യാപ്റ്റന്‍ കോലിയും ധവാനും ചേര്‍ന്ന് ഇന്ത്യയെ വലിയ തകര്‍ച്ചയില്‍ നിന്നും രക്ഷിച്ചു. ഇരുവരും ചേര്‍ന്ന് 5.4 ഓവറില്‍ സ്‌കോര്‍ 50 കടത്തി. പവര്‍പ്ലേയില്‍ 55 റണ്‍സാണ് കോലിയും ധവാനും ചേര്‍ന്ന് നേടിയത്.

എന്നാല്‍ ഒന്‍പതാം ഓവറിലെ അഞ്ചാം പന്തില്‍ ധവാനെ പുറത്താക്കി സ്വെപ്‌സണ്‍ കളി ഓസിസിന് അനുകൂലമാക്കി. 21 പന്തില്‍ നിന്നും 28 റണ്‍സെടുത്താണ് ധവാന്‍ മടങ്ങിയത്. ധവാന് പിന്നാലെ മലയാളി താരം സഞ്ജു സാംസണ്‍ ക്രീസിലെത്തി. സഞ്ജുവിനെ കൂട്ടുപിടിച്ച് കോലി സ്‌കോര്‍ ഉയര്‍ത്തി. താരം അര്‍ധസെഞ്ചുറിയും നേടി. എന്നാല്‍ സഞ്ജുവിന് മികച്ച പ്രകടനം പുറത്തെടുക്കാനായില്ല. 13-ാം ഓവറിലെ മൂന്നാം പന്തില്‍ സഞ്ജുവിനെ പുറത്താക്കി സ്വെപ്‌സണ്‍ അതേ ഓവറിലെ അവസാന പന്തില്‍ ശ്രേയസ് അയ്യരെയും പൂജ്യനാക്കി പറഞ്ഞുവിട്ടു. ഇതോടെ ഇന്ത്യ തകര്‍ന്നു.

എന്നാല്‍ ഒരറ്റത്ത് പിടിച്ചുനിന്ന നായകന്‍ കോലി സ്‌കോര്‍ബോര്‍ഡ് ചലിപ്പിച്ചു. ശ്രേയസ്സിനുശേഷം ക്രീസിലെത്തിയത് ഹാര്‍ദിക് പാണ്ഡ്യയാണ്. ഇരുവരും ചേര്‍ന്ന് തകര്‍ത്തടിക്കാന്‍ തുടങ്ങിയതോടെ ഇന്ത്യന്‍ ക്യാമ്പില്‍ പ്രതീക്ഷയുണര്‍ന്നു. അവസാന മൂന്നോവറുകളില്‍ ഇന്ത്യയ്ക്ക് ജയിക്കാന്‍ 43 റണ്‍സ് വേണമായിരുന്നു. എന്നാല്‍ 18-ാം ഓവറിലെ ആദ്യ പന്തില്‍ തന്നെ ഹാര്‍ദിക്കിനെ പുറത്താക്കി സാംപ ഇന്ത്യയ്ക്ക് തിരിച്ചടി നല്‍കി. 13 പന്തുകളില്‍ നിന്നും 20 റണ്‍സാണ് താരം നേടിയത്.

പിന്നീട് ക്രീസിലെത്തിയത് വാഷിങ്ടണ്‍ സുന്ദറാണ്. അവസാന രണ്ടോവറുകളില്‍ ഇന്ത്യയ്ക്ക് വിജയിക്കാന്‍ 36 റണ്‍സ് എന്ന നിലയിലായി. എന്നാല്‍ 19-ാം ഓവറിലെ ആദ്യ പന്തില്‍ തന്നെ ഇന്ത്യയുടെ അവസാന പ്രതീക്ഷയായ കോലിയെ മടക്കി ടൈ കളി ഓസിസിന് അനുകൂലമാക്കി. 61 പന്തില്‍ നിന്നും 85 റണ്‍സെടുത്താണ് നായകന്‍ മടങ്ങിയത്.അവസാന ഓവറുകളില്‍ ശാര്‍ദുല്‍ ഠാക്കൂര്‍ വെടിക്കെട്ട് ബാറ്റിങ് പുറത്തെടുത്തെങ്കിലും അദ്ദേഹത്തിന് ഇന്ത്യയെ വിജയത്തിലെത്തിക്കാനായില്ല.

ഓസിസിനായി സ്പിന്നര്‍ മിച്ചല്‍ സ്വെപ്‌സണ്‍ നാലോവറില്‍ വെറും 23 റണ്‍സ് മാത്രം വഴങ്ങി മൂന്നുവിക്കറ്റ് എടുത്തപ്പോള്‍ മാക്‌സ്വെല്‍, ടൈ, സാംപ, അബോട്ട് എന്നിവര്‍ ഓരോ വിക്കറ്റ് വീതം നേടി.

ടോസ് നഷ്ടപ്പെട്ട് ആദ്യം ബാറ്റ് ചെയ്ത ഓസ്‌ട്രേലിയ നിശ്ചിത ഓവറില്‍ 5 വിക്കറ്റ് നഷ്ടത്തില്‍ 186 റൺസാണ് എടുത്തത്. 53 പന്തില്‍ നിന്നും 80 റണ്‍സെടുത്ത വിക്കറ്റ് കീപ്പര്‍ ബാറ്റ്‌സ്മാന്‍ മാത്യു വെയ്ഡിന്റെ ബാറ്റിങ് മികവിലാണ് ഓസിസ് ഈ കൂറ്റന്‍ സ്‌കോര്‍ പടുത്തുയര്‍ത്തിയത്. 36 പന്തുകളില്‍ നിന്നും 54 റണ്‍സെടുത്ത് വെടിക്കെട്ട് പ്രകടനം കാഴ്ചവെച്ച ഗ്ലെന്‍ മാക്‌സ്​വെല്ലും ഓസിസ് സ്‌കോറിങ്ങിന് വേഗവും കരുത്തും സമ്മാനിച്ചു.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഓസ്‌ട്രേലിയയ്ക്ക് രണ്ടാം ഓവറില്‍ തന്നെ ആദ്യ വിക്കറ്റ് നഷ്ടമായി. നായകന്‍ ആരോണ്‍ ഫിഞ്ചിനെ പൂജ്യനാക്കി മടക്കി വാഷിങ്ടണ്‍ സുന്ദറാണ് ഇന്ത്യയ്ക്ക് വേണ്ടി ആദ്യ വിക്കറ്റ് നേടിയത്. ഫിഞ്ചിന് പകരം സ്റ്റീവ് സ്മിത്ത് മാത്യു വെയ്ഡിന് കൂട്ടായെത്തി.

സ്മിത്തിനെ സാക്ഷിയാക്കി വെയ്ഡ് തകര്‍ത്തടിക്കാന്‍ തുടങ്ങിയതോടെ ഓസിസ് സ്‌കോര്‍ബോര്‍ഡ് കുതിച്ചു. സ്മിത്ത് വെയ്ഡിന് മികച്ച പിന്തുണ നല്‍കി. ഇരുവരും ചേര്‍ന്ന് അര്‍ധസെഞ്ചുറി കൂട്ടുകെട്ട് പടുത്തുയര്‍ത്തുകയും ചെയ്തു.

എന്നാല്‍ സ്‌കോര്‍ 79-ല്‍ നില്‍ക്കെ സ്റ്റീവ് സ്മിത്തിനെ പുറത്താക്കി സുന്ദര്‍ വീണ്ടും കളി ഇന്ത്യയ്ക്ക് അനുകൂലമാക്കി. 23 പന്തുകളില്‍ നിന്നും 24 റണ്‍സെടുത്ത സ്മിത്തിനെ സുന്ദര്‍ ക്ലീന്‍ ബൗള്‍ഡാക്കുകയായിരുന്നു. സ്മിത്തിന് പകരമായി വെടിക്കെട്ട് താരം ഗ്ലെന്‍ മാക്‌സ്​വെല്ലും ക്രീസിലെത്തി. വൈകാതെ മാത്യു വെയ്ഡ് അര്‍ധസെഞ്ചുറി സ്വന്തമാക്കി. തുടര്‍ച്ചയായി രണ്ടാം മത്സരത്തിലാണ് അദ്ദേഹം അര്‍ധസെഞ്ചുറി നേടുന്നത്.

മാക്‌സ്ടവെല്ലിനെ കൂട്ടുപിടിച്ച് വെയ്ഡ് 11.5 ഓവറില്‍ ടീം സ്‌കോര്‍ 100 കടത്തി. എന്നാല്‍ 112-ല് നില്‍ക്കെ മാക്‌സ്വെല്ലിനെ ചാഹല്‍ പുറത്താക്കിയെങ്കിലും അമ്പയര്‍ നോബോള്‍ വിധിച്ചു. കിട്ടിയ അവസരം മാക്‌സ്​വെല്ലും നന്നായി ഉപയോഗിച്ചു. തകര്‍പ്പന്‍ അടികളുമായി മാക്‌സ്വെല്ലും വെയ്ഡും ചേര്‍ന്ന് സ്‌കോര്‍ബോര്‍ഡ് ചലിപ്പിച്ചു. ഇരുവരും ചേര്‍ന്ന് അര്‍ധസെഞ്ചുറി കൂട്ടുകെട്ടും പടുത്തുയര്‍ത്തി.

17-ാം ഓവറില്‍ മാക്‌സ്​വെല്ലിനെ പുറത്താക്കാനുള്ള അവസരം ദീപക് ചാഹര്‍ നഷ്ടപ്പെടുത്തി. പിന്നാലെ ഒരു പടുകൂറ്റന്‍ സിക്‌സും നേടി മാക്‌സ്വെല്‍ സ്‌കോര്‍ 150 കടത്തി. പിന്നാലെ താരം അര്‍ധസെഞ്ചുറിയും നേടി.

സ്‌കോര്‍169-ല്‍ നില്‍ക്കെ മാത്യു വെയ്ഡിനെ വിക്കറ്റിന് മുന്നില്‍ കുടുക്കി ഠാക്കൂര്‍ ഓസിസിന്റെ മൂന്നാം വിക്കറ്റ് വീഴ്ത്തി. പിന്നാലെ മാക്‌സ്വെല്ലിനെ ക്ലീന്‍ ബൗള്‍ഡാക്കി നടരാജന്‍ കളി ഇന്ത്യയ്ക്ക് അനുകൂലമാക്കി.

ഇന്ത്യയ്ക്ക് വേണ്ടി വാഷിങ്ടണ്‍ സുന്ദര്‍ രണ്ടുവിക്കറ്റ് വീഴ്ത്തിയപ്പോള്‍ ശാര്‍ദുല്‍ ഠാക്കൂര്‍, നടരാജന്‍ എന്നിവര്‍ ഓരോ വിക്കറ്റ് വീതം സ്വന്തമാക്കി.

Content Highlights: India Vs Australia third Twenty 20 match at Sydney Cricket Ground


Also Watch

Add Comment
Related Topics

Get daily updates from Mathrubhumi.com

Youtube
Telegram

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



 

IN CASE YOU MISSED IT
wedding

2 min

വധു ഒഴികെ ആരും ക്യാമറ കണ്ടില്ല; ആ ക്ലിക്കിന് കിട്ടിയത് രണ്ടു ലക്ഷം രൂപ സമ്മാനം

Sep 25, 2022


Police

1 min

വീട്ടിൽനിന്ന്‌ രഹസ്യ ഗോവണി, ബംഗ്ലാവില്‍ ആര്‍ഭാടജീവിതം; മുപ്പതിലധികം കവർച്ചക്കേസുകളിലെ പ്രതി കുടുങ്ങി

Sep 25, 2022


രണ്ടരവർഷത്തെ കാത്തിരിപ്പ്; പിണക്കം മറന്ന് മടങ്ങിയെത്തിയ ഓമനപ്പൂച്ചയെ വാരിപ്പുണർന്ന് ഉടമകൾ

Sep 25, 2022

Most Commented