06 September 2022, 05:16 PM IST

1 min read

Read later

Photo: twitter.com/ChennaiIPL

ചെന്നൈ: ഐപിഎല്‍ അടക്കം ക്രിക്കറ്റിന്റെ എല്ലാ ഫോര്‍മാറ്റില്‍ നിന്നും വിരമിക്കല്‍ പ്രഖ്യാപിച്ച സുരേഷ് റെയ്‌നയ്ക്ക് ആശംസയറിയിച്ച് ചെന്നൈ സൂപ്പര്‍ കിങ്‌സ്. ഐപിഎല്ലില്‍ സിഎസ്‌കെയുടെ പ്രധാന താരമായിരുന്ന റെയ്‌ന 2008 മുതല്‍ 2021 വരെ അവര്‍ക്കായി കളിച്ചിരുന്നു. ചെന്നൈയുടെ നാല് ഐപിഎല്‍ കിരീട നേട്ടങ്ങളിലും പങ്കാളിയായിരുന്നു റെയ്‌ന.

'കീര്‍ത്തി ചരിത്രത്തില്‍ കൊത്തിവെച്ചപ്പോള്‍ അവിടെയുണ്ടായിരുന്നയാള്‍. അത് സാധ്യമാക്കിയവന്‍! എല്ലാത്തിനും നന്ദി, ചിന്ന തല' - റെയ്‌നയുടെ ചിത്രം പങ്കുവെച്ച് ചെന്നൈ കുറിച്ചു.

റെയ്‌നയുടെ വിരമിക്കല്‍ കുറിപ്പിനു താഴെയും ചെന്നൈ സൂപ്പര്‍ കിങ്‌സ് കമന്റ് ചെയ്തിട്ടുണ്ട്. ചിന്നത്തല ഞങ്ങള്‍ ഓരോരുത്തര്‍ക്കും ആരായിരുന്നു എന്നത് ഒരിക്കലും മറക്കില്ല എന്നാണ് റെയ്നയുടെ ട്വീറ്റിന് താഴെ സിഎസ്‌കെ കുറിച്ചത്.

ചെന്നൈക്കായി 176 മത്സരങ്ങളില്‍ നിന്ന് 4687 റണ്‍സ് നേടിയ റെയ്‌നയാണ് നിലവില്‍ അവര്‍ക്കായി ഏറ്റവുമധികം റണ്‍സ് നേടിയ താരം. മാത്രമല്ല ചെന്നൈക്കായി ഏറ്റവുമധികം 50-ന് മുകളിലുള്ള സ്‌കോര്‍ (34) നേടിയ താരവും ഐപിഎല്‍ നോക്കൗട്ടില്‍ ഏറ്റവും കൂടുതല്‍ റണ്‍സ് (714) നേടിയ താരവും ഐപിഎല്‍ ഫൈനലുകളില്‍ ഏറ്റവും കൂടുതല്‍ റണ്‍സ് (249) നേടിയ താരവുമെല്ലാം റെയ്‌നയാണ്.

ഇതിനിടെ വ്യക്തിപരമായ കാരണങ്ങളെ തുടര്‍ന്ന് 2020 ഐപിഎല്ലില്‍ കളിക്കാതെ റെയ്‌ന നാട്ടിലേക്ക് മടങ്ങിയിരുന്നു. ആ സീസണില്‍ ചരിത്രത്തില്‍ ആദ്യമായി ചെന്നൈ സൂപ്പര്‍ കിങ്‌സ് പ്ലേ ഓഫ് കാണാതെ പുറത്തായി. പിന്നീട് 2022-ലെ മെഗാ താരലേലത്തിനു മുമ്പ് റെയ്‌നയെ ചെന്നൈ, ടീമില്‍ നിന്ന് ഒഴിവാക്കുകയും ചെയ്തിരുന്നു.