'മൂന്നു ഫോര്‍മാറ്റിലും കളിക്കാന്‍ തയ്യാറാണ്'; ടെസ്റ്റ് മതിയാക്കുന്നുവെന്ന വാര്‍ത്തക്കെതിരേ ഭുവി, Bhuvneshwar Kumar Test Cricket

15 May 2021, 08:28 PM IST

ഭുവനേശ്വര്‍ ടെസ്റ്റ് ക്രിക്കറ്റില്‍ നിന്ന് വിരമിക്കുകയാണെന്നും ഇനി നിശ്ചിത ഓവര്‍ ക്രിക്കറ്റ് മാത്രമായിരിക്കും കളിക്കുക എന്നും വാര്‍ത്തകള്‍ വന്നത്

ഭുവനേശ്വർ കുമാർ | Photo: bcci

ന്യൂഡല്‍ഹി: ടെസ്റ്റ് ക്രിക്കറ്റില്‍ കളിക്കാന്‍ താത്പര്യപ്പെടുന്നില്ലെന്ന വാര്‍ത്തകള്‍ തള്ളി ഇന്ത്യന്‍ ക്രിക്കറ്റ് താരം ഭുവനേശ്വര്‍ കുമാര്‍. ഇംഗ്ലണ്ട് പര്യടനത്തിനുള്ള ടീമില്‍ ഭുവനേശ്വറിന് ഇടം ലഭിച്ചിരുന്നില്ല. ഇതോടെയാണ് ഭുവനേശ്വര്‍ ടെസ്റ്റ് ക്രിക്കറ്റില്‍ നിന്ന് വിരമിക്കുകയാണെന്നും ഇനി നിശ്ചിത ഓവര്‍ ക്രിക്കറ്റ് മാത്രമായിരിക്കും കളിക്കുക എന്നും വാര്‍ത്തകള്‍ വന്നത്. ഇതിന് പിന്നാലെ തന്റെ ഔദ്യോഗിക ട്വിറ്റര്‍ അക്കൗണ്ടിലൂടെ രൂക്ഷമായ പ്രതികരണവുമായി രംഗത്തെത്തുകയായിരുന്നു ഭുവനേശ്വര്‍ കുമാര്‍.

മനസ്സിലുള്ളത് എഴുതിപ്പിടിപ്പിക്കരുതെന്നും ക്രിക്കറ്റിലെ മൂന്നു ഫോര്‍മാറ്റിലും കളിക്കാന്‍ താന്‍ തയ്യാറാണെന്നും ഭുവനേശ്വര്‍ ട്വീറ്റില്‍ വ്യക്തമാക്കി. 'ഞാന്‍ ടെസ്റ്റ് ക്രിക്കറ്റ് കളിക്കില്ലെന്ന തരത്തില്‍ റിപ്പോര്‍ട്ടുകള്‍ പുറത്തുവന്നിരുന്നു. അതിന് വ്യക്തത വരുത്തേണ്ടതുണ്ട്. ക്രിക്കറ്റിലെ മൂന്നു ഫോര്‍മാറ്റിലും കളിക്കാന്‍ ഞാന്‍ തയ്യാറാണ്. നിങ്ങളുടെ അനുമാനത്തിന് അനുസരിച്ച് വാര്‍ത്തയുണ്ടാക്കരുത് എന്നാണ് എനിക്ക് നിങ്ങളോട് പറയാനുള്ളത്.' ഭുവനേശ്വര്‍ ട്വീറ്റില്‍ പറയുന്നു.

2014ലാണ് ഭുവനേശ്വര്‍ ആദ്യമായി ഇംഗ്ലണ്ട് പര്യടനം നടത്തിയത്. അന്ന് അഞ്ച് മത്സരങ്ങളില്‍ നിന്ന് 19 വിക്കറ്റ് വീഴ്ത്തി. ലോര്‍ഡസില്‍ ആറു വിക്കറ്റ് വീഴ്ത്തി ഇന്ത്യയുടെ വിജയത്തില്‍ നിര്‍ണായക സാന്നിധ്യമായി. മൂന്നു അര്‍ധ സെഞ്ചുറി ഉള്‍പ്പെടെ 247 റണ്‍സും അടിച്ചെടുത്തു. പിന്നീട് 2018-ലെ പര്യടനം പരിക്കുമൂലം നഷ്ടമായി. അതിനുശേഷം ഭുവനേശ്വര്‍ ടെസ്റ്റ് കളിച്ചിട്ടില്ല.

Content Highlights: Bhuvneshwar Kumar Test Cricket