'സൃഷ്ടി' -എട്ടാമത് അഖിലേന്ത്യാ എഞ്ചിനീയറിംഗ് പ്രോജക്ട് പ്രദർശനം സെന്റ്ഗിറ്റ്‌സിൽ

വിദ്യാഭ്യാസമേഖലയിലെ നൂറ്റാണ്ടുകളുടെ പൈതൃകമുള്ള അക്ഷരനഗരിയായ കോട്ടയത്തിനു വിളിപ്പാടകലെ പാത്താമുട്ടം എന്ന പ്രകൃതിരമണീയമായ ഗ്രാമീണാന്തരീക്ഷത്തിൽ സ്ഥിതിചെയ്യുന്ന സെന്റ്ഗിറ്റ്‌സ് ഗ്രൂപ്പ് ഓഫ് പ്രൊഫഷണൽ ഇൻസ്റ്റിറ്റിയൂഷൻസ് ഇന്ന് വിദ്യാഭ്യാസരംഗത്ത് അന്താരാഷ്ട്ര സഹകരണം ഉൾപ്പെടെ തിളക്കമാർന്ന നേട്ടങ്ങളുമായി മികവിന്റെ പടവുകൾ കയറുകയാണ്. വിദ്യാഭ്യാസരംഗത്തെ സൂക്ഷ്മാംശങ്ങളിൽ പോലും പുലർത്തുന്ന ഗുണനിലവാരമാണ് ഈ സ്ഥാപനങ്ങളുടെ വിജയത്തിന് പിന്നിലെ അടിസ്ഥാനപാഠം. തികച്ചും മത്സരാധിഷ്ഠിതമായ മേഖലയിൽ തങ്ങളുടേതായ ഇടം നേടുക മാത്രമല്ല ''ലേൺ ഗ്രോ എക്‌സൽ''എന്ന സ്ഥാപനത്തിൻറെ ആപ്തവാക്യം അന്വർഥമാക്കിക്കൊണ്ട് പുതിയ പന്ഥാവുകളിലൂടെ സഞ്ചരിക്കുകയാണ് സെന്റ്ഗിറ്റ്‌സ്.

സമൂഹത്തിലെ പാർശ്വവൽക്കരിക്കപ്പെട്ട വിഭാഗത്തിന്റെ ജീവിതം മെച്ചപ്പെട്ടതാക്കാൻ ഉതകുന്ന പുതിയ സാങ്കേതികവിദ്യകളും ആശയങ്ങളുമാണ് ഇത്തവണത്തെ സൃഷ്ടിയുടെ പ്രത്യേകത. തോട്ടിപ്പണിയെന്ന മനുഷ്യത്വ രഹിതമായ തൊഴിലിനെ പൂർണമായും നിർമാർജനം ചെയ്യാൻ രാജ്യത്തെ സഹായിച്ച മാൻഹോൾ റോബോട്ടുകൾ, ഗ്രാമപ്രദേശങ്ങളിലെ സ്ത്രീകളുടെ ആരോഗ്യസംരക്ഷണത്തിനായി വിലകുറഞ്ഞ ആർത്തവകാല നാപ്കിനുകൾ ഉണ്ടാക്കുന്ന യന്ത്രം തുടങ്ങിയവ പോലെ പാർശ്വവൽക്കരിക്കപ്പെട്ടവരെ സമൂഹത്തിന്റെ മുഖ്യധാരയിലേക്ക് നയിക്കുവാൻ പര്യാപ്തമായ സാങ്കേതിക കണ്ടുപിടുത്തങ്ങളായിരിക്കും മേളയുടെ മുഖ്യ ആകർഷണം. അപകടകരമായ തൊഴിലിടങ്ങളിലെ പുതിയ സാങ്കേതിക സുരക്ഷാസംവിധാനങ്ങൾ, അതിവേഗത്തിലുള്ള കമ്യുണിക്കേഷൻ & മൊബിലിറ്റി, ആരോഗ്യ-കാർഷിക മേഖലകളിലെ പുതുതലമുറ സാങ്കേതിക വിദ്യകൾ, ഭിന്നശേഷിക്കാർക്ക് സഹായകരമായ നൂതന സാങ്കേതിക ഉപകരണങ്ങൾ, ദാരിദ്ര്യ നിർമാർജനത്തിനായുള്ള ടെക്നോളജി സാധ്യതകൾ, ഡിജിറ്റൽ സാങ്കേതികവിദ്യകളുടെ സ്വാധീനം തുടങ്ങിയ പ്രധാന മേഖലകളിൽ ഊന്നിയുള്ള പ്രോജക്ടുകളാണ് പ്രദർശിപ്പിക്കപ്പെടുക. കൂടാതെ, ഐക്യരാഷ്ട്രസഭയുടെ 21-ാം നൂറ്റാണ്ടിലെ സുസ്ഥിര വികസന ലക്ഷ്യങ്ങളുമായി ബന്ധപ്പെട്ട ആശയങ്ങളും സൃഷ്ട്ടിയിൽ ഇടം പിടിക്കും.

സംസ്ഥാന സർക്കാരിനു കീഴിൽ പ്രവർത്തിക്കുന്ന, യുവസംരംഭകർക്ക് സാങ്കേതികവും സാമ്പത്തികവുമായ സഹായം നൽകുന്ന കേരള സ്റ്റാർട്ട് അപ് മിഷന്റെ (KSUM) സഹകരണത്തോടെയാണ് പ്രദർശനവും മത്സരവും നടക്കുക. ബഹുരാഷ്ട്ര ടെക്നോളജി കമ്പനികളായ ആൻസിസ് (ANSYS)- Entuple Technologies , മാത്ത് വർക്ക്സ് (MathWorks), കോൺസെപ്റ്റിയ കണക്ട് (Conceptia Konnect), റെസ്പൊ (Rezpo), നിയോ ടോക്യോ (NeoTokyo) സ്പീക്ക് ആപ്പ് (SpeakApp), മെഗാസൊലൂഷൻസ് (Mega Solutions) എന്നിവരാണ് സൃഷ്ടിയുടെ വ്യാവസായിക സഹകർത്താക്കൾ. കൂടാതെ, സെന്റ്ഗിറ്റ്‌സ് ഐ.ഇ.ഡി.സി, സെന്റ്ഗിറ്റ്‌സ് സെന്റർ ഫോർ ഇന്നൊവേഷൻ & എന്റർപ്രണർഷിപ് (SCIE) എന്നിവരുമായി സഹകരിച്ചാണ് 'സൃഷ്ടി' സംഘടിപ്പിക്കുന്നത്.

സിവിൽ, മെക്കാനിക്കൽ, ഇലക്ട്രിക്കൽ, ഇലക്ട്രോണിക്‌സ്, ഇൻസ്ട്രമെന്റേഷൻ, കംപ്യുട്ടർ സയൻസ്, കെമിക്കൽ, ഫുഡ് ടെക്‌നോളജി, ആർട്ടിഫിഷ്യൽ ഇന്റലിജൻസ്, കമ്പ്യൂട്ടർ ആപ്ലിക്കേഷൻസ്, അനലറ്റിക്കൽ, റോബോട്ടിക്സ് എന്നീ പന്ത്രണ്ട് വിഭാഗങ്ങളിലായി അഞ്ച് ലക്ഷം രൂപയോളം സമ്മാനത്തുകയുള്ള അവാർഡുകൾക്കായി പ്രോജക്ടുകൾ മത്സരിക്കും. പ്രദർശനത്തിലെ ഏറ്റവും മികച്ച പ്രോജക്ടിന് 'ബെസ്റ്റ് ഇന്നൊവേഷൻ അവാർഡ്' ആയി ഒരു ലക്ഷം രൂപയും, മികച്ച ഗൈഡിനു 5000 രൂപയും, ഓരോ വിഭാഗത്തിലെയും മികച്ച പ്രോജക്ടിന് 12,000 രൂപയും സമ്മാനമായി ലഭിക്കും. കൂടാതെ മികച്ച ജനപ്രിയ പ്രോജക്ടിനും മികച്ച സ്ഥാപനത്തിനും മികച്ച ബിസിനസ് പ്ലാനിനും പ്രത്യേകം പുരസ്‌കാരങ്ങൾ ഒരുക്കിയിരിക്കുന്നു.

പുതിയ സാങ്കേതികവിദ്യകളുടെ ദേശീയതലത്തിലുള്ള മികച്ച പ്രോജക്ടുകളുമായുള്ള മത്സരവും അനുഭവപരിചയവും കോളേജിലെ വിദ്യാർഥികളുടെ നൈപുണ്യവും ജോലി സാധ്യതയും വർധിപ്പിക്കും എന്നുള്ളതിന് കഴിഞ്ഞ ഒരു വർഷത്തെ മാത്രം ക്യാമ്പസിലെ 500-ലധികം ജോബ് പ്‌ളേസ്‌മെന്റുകൾ തന്നെ തെളിവ്. സൃഷ്ടി നൽകുന്ന കുതിപ്പിന്റെ ചിറകേറിയാണ് കേരള സ്റ്റാർട്ട് അപ് മിഷന്റെ ടെക്‌നോളജി ബിസിനസ് ഇൻകുബേറ്റർ പദവി സെയിന്റ്ഗിറ്റ്‌സ് നേടിയത്. മുൻവർഷങ്ങളിലേതുപോലെ ഇന്ത്യയിലെ പതിനഞ്ചിലധികം സംസ്ഥാനങ്ങളിലെ മുൻനിര സ്ഥാപനങ്ങളിലെ വിദ്യാർഥികളുടെ 1500-ൽ പരം ആധുനിക സാങ്കേതിക ആവിഷ്‌കാരങ്ങളിൽ നിന്നും തെരഞ്ഞെടുക്കപ്പെട്ട ആശയങ്ങൾ സൃഷ്ടിയിൽ പ്രദർശിപ്പിക്കപ്പെടും. കൂടാതെ സെന്റ്ഗിറ്റ്‌സിലെ വിവിധ എഞ്ചിനീയറിംഗ് ഡിപ്പാർട്ട്‌മെന്റുകൾ ഒരുക്കുന്ന പ്രോജക്ടുകളും പ്രദർശനത്തിൽ ഇടം പിടിക്കും. പൊതുജനങ്ങൾക്കും വിദ്യാർഥികൾക്കും സൗജന്യമായി രണ്ടു ദിവസത്തെ പ്രദർശനം വീക്ഷിക്കാവുന്നതാണ്.

സൃഷ്ടിയുടെ ഭാഗമായി മുൻവർഷം ആരംഭിച്ച സ്‌കൂൾ വിദ്യാർത്ഥികൾക്കായുള്ള, 'സമീക്ഷ' പോസ്റ്റർ പ്രെസൻറ്റേഷൻ മത്സരവും ഏപ്രിൽ 26ന് നടക്കും. 'സാങ്കേതികവിദ്യ പാർശ്വവൽക്കരിക്കപ്പെട്ടവർക്കായ്' എന്നുള്ള വിഷയത്തെ അധികരിച്ചുള്ള നൂതന ആശയങ്ങളാണ് വിദ്യാർത്ഥികൾ പോസ്റ്റർ രൂപത്തിൽ അവതരിപ്പിക്കേണ്ടത്. ഇന്ത്യയിലെ നിരവധി സംസ്ഥാനങ്ങളിൽനിന്നും ഏറ്റവും മികച്ച സാങ്കേതിക പ്രോജക്ടുകൾ അവതരിപ്പിക്കപ്പെടുന്ന മേളയിൽ, തങ്ങളുടെ ആശയങ്ങൾ അവതരിപ്പിക്കുക വഴി വിദ്യാർത്ഥികൾക്ക് മുന്നിൽ ആധുനിക വൈജ്ഞാനിക മേഖലകളിൽ പുതിയ വാതായനങ്ങൾ തുറക്കപ്പെടുകയാണ്.

രജിസ്‌ട്രേഷനു വേണ്ടി സന്ദർശിക്കുക - srishti.saintgits.org