പരാതികളും സംഘര്‍ഷങ്ങളും കുറഞ്ഞ് എല്ലാവര്‍ക്കും സിനിമ കാണാന്‍ അവസരം ലഭിച്ച മേള. കേരള രാജ്യാന്തര ചലച്ചിത്രമേള പാതിവഴി പിന്നിടുമ്പോള്‍ ഇങ്ങനെയായിരിക്കും പ്രതിനിധികള്‍ വിലയിരുത്തുക. തിരഞ്ഞെടുക്കാന്‍ ഒട്ടേറെ മികച്ച സിനിമകളുണ്ടെന്നത് കൂടിയാകുമ്പോള്‍ മേള ചലച്ചിത്രപ്രേമികള്‍ക്ക് നല്ല അനുഭവമാകുകയാണ്.     
ശാന്തരായി ക്യൂ നിന്ന് തിേയറ്ററിനകത്ത് കയറി സിനിമ കാണുന്ന ഡെലിഗേറ്റുകള്‍ ഇത്തവണ എല്ലാ തിേയറ്ററിലുമുള്ള കാഴ്ചയായിരുന്നു. തിക്കിത്തിരക്കി യുദ്ധം ചെയ്ത് തിേയറ്ററിനകത്ത് കടന്നുകൂടുന്നതായിരുന്നു മുന്‍വര്‍ഷങ്ങളിലെ അവസ്ഥ.     
നിശാഗന്ധിയും ടാഗോറും മേളയില്‍ ഉള്‍പ്പെടുത്തിയതോടെ രണ്ടായിരത്തിലേറെ സീറ്റുകളാണ് അധികമായി ലഭിച്ചത്. ഇതുതന്നെയാണ് എല്ലാവര്‍ക്കും സിനിമ കാണാന്‍ അവസരം ഉണ്ടാക്കിയത്. ആവശ്യത്തിന് സീറ്റുകളായതോടെ റിസര്‍വേഷന്‍ ചെയ്യാതെയും സിനിമ കാണാന്‍ സാധിക്കുന്നുണ്ട്. ഇതോടെ ഇക്കാര്യത്തില്‍ ഡെലിഗേറ്റുകളുടെ പരാതികള്‍ക്ക് ഇടമില്ലാതായി. സംഘാടനത്തെക്കുറിച്ചും ആര്‍ക്കും കാര്യമായ പരാതികളില്ല. ഞായറാഴ്ചയാണ് സിനിമ കാണാന്‍ കൂടുതല്‍ ആളുകളെത്തിയത്.    
കൈരളി തിേയറ്ററില്‍ നിന്ന് മേള ടാഗോറിലേക്കും നിശാഗന്ധിയിലേക്കും വളര്‍ന്നതാണ് മറ്റൊരു പ്രത്യേകത. മീഡിയ സെല്ലും മീറ്റ് ദ ഡയറക്ടറും ഉള്‍െപ്പടെയുള്ള പരിപാടികളും സിനിമാ സംഘടനകളുടെ കൗണ്ടറുകളും ഇക്കുറി പൂര്‍ണമായും ടാഗോറിലാണ്. ഇതോടെ കൈരളിയിലെ തിരക്ക് കുറഞ്ഞു. ഫെസ്റ്റിവല്‍ സമയത്തുള്ള ഗതാഗതക്കുരുക്കിനും സംഘര്‍ഷങ്ങള്‍ക്കും മുന്‍വര്‍ഷത്തേക്കാള്‍ കുറവുണ്ട്. മേള നാലുനാള്‍ പിന്നിട്ടപ്പോള്‍ സിനിമ മാത്രമാണ് മുന്നില്‍ നില്‍ക്കുന്നത്.    
ആസ്വാദകര്‍ക്ക് തിരഞ്ഞെടുക്കാന്‍ മത്സരവിഭാഗത്തിലുള്‍െപ്പടെ ഇത്തവണ മികച്ച ചിത്രങ്ങളുണ്ട്. അതിശയിപ്പിക്കുന്ന ചിത്രങ്ങളെക്കാളും ശരാശരി നിലവാരമുള്ള ചിത്രങ്ങള്‍ കൊണ്ട് സമ്പന്നമാണ് മേള. ധീപന്‍, ഡീഗ്രേഡ്, എംബ്രേസ് ഓഫ് ദ സര്‍പന്റ്, നാഹിദ്, വൂള്‍ഫ് ടോട്ടം, ദ ഐഡല്‍, പോപം, ദ അസാസിന്‍, ഫോഴ്‌സ് ഓഫ് ഡസ്റ്റിനി, മുസ്താങ്, ദ വയലിന്‍ പ്ലേയര്‍, ഒറ്റാല്‍, ചായം പൂശിയ വീട്, ഒഴിവുദിവസത്തെ കളി, ഫാത്തിമ, സ്റ്റോപ്പ്, മൂര്‍ തുടങ്ങിയ ചിത്രങ്ങളാണ് ആദ്യദിവസങ്ങളില്‍ ആസ്വാദക പ്രശംസ നേടിയത്.     മികച്ച അഭിപ്രായം ഉണ്ടാക്കിയ സിനിമകളുടെ രണ്ടാമത്തെ പ്രദര്‍ശനത്തിന്റെ റിസര്‍വേഷന്‍ ആരംഭിച്ച് മണിക്കൂറുകള്‍ക്കകം തീര്‍ന്നുപോകുന്നതും കാണാമായിരുന്നു. ത്രീഡി ചിത്രങ്ങളുടെ പ്രദര്‍ശനത്തിനും ഏറെ കാഴ്ചക്കാരെത്തി. ചൈനീസ് ചിത്രമായ വൂള്‍ഫ് ടോട്ടത്തിനായിരുന്നു ഈ ഗണത്തില്‍ കൂടുതല്‍ ആളുകള്‍ എത്തിയത്. പലസ്തീന്‍ ചിത്രം ഡീഗ്രേഡിനാണ് പിന്നീട് അതിശയിപ്പിക്കുന്ന തിരക്ക് കണ്ടത്. ഗോവ ചലച്ചിത്ര മേളയില്‍ മികച്ച അഭിപ്രായം ഉണ്ടാക്കിയ ചിത്രങ്ങള്‍ തിരഞ്ഞെടുത്തുകാണാന്‍ ഡെലിഗേറ്റുകള്‍ ശ്രദ്ധിച്ചു.     
ധീപന്‍, എംബ്രേസ് ഓഫ് ദ സര്‍പന്റ് തുടങ്ങിയ ചിത്രങ്ങള്‍ ഇത്തരത്തില്‍ ആദ്യപ്രദര്‍ശനത്തില്‍ തന്നെ ശ്രദ്ധിക്കപ്പെട്ടു. ബോപം, ജലാല്‍സ് സ്റ്റോറി, ഇമ്മോര്‍ട്ടല്‍, രാജ്കഹിനി, ചായം പൂശിയ വീട്, ഒറ്റാല്‍, ദ വയലിന്‍ പ്ലേയര്‍ എന്നീ ചിത്രങ്ങളാണ് മത്സരവിഭാഗത്തില്‍ ആദ്യദിവസങ്ങളില്‍ ശ്രദ്ധ നേടിയത്. വെള്ളിയാഴ്ച മേള അവസാനിക്കുന്നത് മുന്നില്‍ക്കണ്ട് അടുത്ത ദിവസങ്ങളില്‍ മികച്ച ചിത്രങ്ങള്‍ കണ്ടുതീര്‍ക്കാനുള്ള ഓട്ടത്തിലാണ് ഡെലിഗേറ്റുകള്‍.