photo: UNI
* നീയാണ് എന്റെ യാത്ര തീരുന്നിടം
* നിന്നെക്കാണുംവരെ
ഞാന്‍ ജീവിച്ചിട്ടേയില്ല
ജനിച്ചിട്ടുപോലുമില്ല
നിന്നെക്കണ്ടശേഷമോ
നിന്നെ നഷ്ടപ്പെടുമെന്ന പേടിയില്‍
ഞാന്‍ മരിച്ചുകൊണ്ടിരിക്കുന്നു
* നിന്റെ നെറ്റിയില്‍ എന്റെ പ്രണയമിറ്റിച്ച ചോരയെ
നിന്റെ കണ്ണീരുപ്പിനെ
നിന്റെ നെഞ്ചിലെ തേങ്ങലുകളെ
മൊത്തി മൊത്തിക്കുടിക്കണമായിരുന്നു
പക്ഷെ, എന്ത് വീഞ്ഞാണ് നീയെന്റെ അധരങ്ങളില്‍ പകര്‍ന്നത്
ഒറ്റച്ചുംബനത്താല്‍ ഞാനിത്ര ഉന്‍മാദിയാകാന്‍
*രണ്ട് കുടകള്‍ക്ക് കീഴിലെ രണ്ട് മഴകളായ്
എത്ര നേരമാണ് നാം നിന്നത്
പെയ്ത് നിറഞ്ഞ് ഞാനും
പെയ്യാതെ , പെയ്ത് തീരാനറിയാതെ നീയും
* പ്രപഞ്ചത്തോളം നിശബ്ദത
നിനക്കത് അറിയാനാകില്ല
നീയില്ലാത്തപ്പോള്‍ മാത്രമാണ്
ഞാനതറിയുന്നത്
*ഇത്രയൊന്നുമല്ല എന്റെ പ്രണയം
നിനക്ക് ഉള്‍ക്കൊള്ളാന്‍ വേണ്ടി
എത്ര ചുരുക്കിയാണ് ഞാനത് പകര്‍ന്ന് തന്നത്
എന്നിട്ടും നിന്റെ കൈയിലൊതുങ്ങാതെ
മുഴുവനും തുളുമ്പിപ്പോയി....
*എന്നിട്ടും എന്നിട്ടും ഉണര്‍ന്നെഴുന്നേറ്റ് നോക്കുമ്പോള്‍
നീയില്ല
ആകെ കണ്ടത് , മുറ്റത്ത് നനഞ്ഞ് കിടക്കുന്ന
ഒരു തുണ്ട് വെയില്‍ മാത്രം
* കടലോളം കലി
കടലോളം കണ്ണീര്‍
കടലോളം പ്രണയം
നിന്റെ കൈക്കുമ്പിളില്‍ എങ്ങനെ ഒതുങ്ങാന്‍
* ഒരു വഴിയിലൂടെ ഒരുമിച്ച് നടന്നിട്ടും
ഇരുവഴി പിരിഞ്ഞുപോയി
നീ തെടിയത് ജീവിതവും
ഞാന്‍ തിരഞ്ഞത് പ്രണയവുമാകയാല്‍
* വേദന.. വേദന മാത്രമാണ് സത്യം
കൈകാലുകളില്‍ ഹൃദയത്തില്‍
ആത്മാവില്‍ വേദന മാത്രം
ഏത് ലഹരിയിലാണ് ഞാന്‍ അഭയമന്വേഷിക്കുക
ഏത് ലഹരിക്കാണ് നിന്റെ പ്രണയത്തേക്കാള്‍ വീര്യം
*അന്നത്തെ നിലാവ്
അന്നത്തെ പെയ്ത്ത്
നമ്മുടെ ആകാശത്തെ
അന്നത്തെ പ്രണയച്ചോപ്പ്
അന്നത്തെ നീ, ഞാന്‍
എല്ലാം അന്നത്തേതായിരുന്നു
ഞാന്‍ നടന്നുനോക്കി, യുഗങ്ങളോളം
വീണുപോയ ചിരികള്‍ തേടി
പിണങ്ങിയകലാത്ത പരിഭവങ്ങള്‍ അന്വേഷിച്ച്
പക്ഷെ നമ്മിലേക്ക്
എനിക്കറിയാമായിരുന്ന നിന്നിലേക്ക്
വഴികളേതുമില്ലായിരുന്നു
*വസന്തം പിന്നെയും വന്നു
പൂക്കള്‍ക്ക് അതേ സുഗന്ധമായിരുന്നില്ല
പിന്നെയും പെയ്തു മഴ
എന്നിലേക്കിറ്റിയില്ല ഒരു തുള്ളി പോലും
* മുറിവുകള്‍ക്കേയുള്ളു അടയാളങ്ങള്‍
സ്നേഹത്തിനതില്ല
അതുകൊണ്ടാണ് എത്ര തന്നാലുമത്
ഓര്‍മിക്കപ്പെടാത്തത്
* നീകേട്ട ഏറ്റവും സുന്ദര കവിത ഞാനെന്ന്
നിന്റെ ഏകാന്തതയില്‍ നീയറിഞ്ഞ സ്വാസ്ഥ്യമെന്ന്
നിന്റെ വഴികളില്‍ നിന്നെക്കാത്ത മാലാഖയെന്ന്
നിനക്കുറങ്ങാന്‍ എന്റെ നെഞ്ചിലെ മഞ്ഞിന്‍തലപ്പുകള്‍മതിയെന്ന്
അങ്ങനെ ഞാന്‍ കേട്ട ഏറ്റവും സുന്ദര നുണയായിരുന്നു നീ
Content Highlights: love letter, valentines day,love, valentines day 2023,love song
Also Watch
RELATED STORIES
.jpg?$p=9c2ba89&q=0.8&f=16x11&w=104)
.jpg?$p=b4643a5&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..