.jpg?$p=adc1a48&f=16x10&w=856&q=0.8)
ദേവികാ പ്രദീപും അച്ഛനും
കോഴിക്കോട്: ഇടുക്കിയില്‍നിന്നാണ് ദേവിക. കോടിക്കുളം ജി.എച്ച്.എസ്.എസില്‍ പ്ലസ്ടു വിദ്യാര്‍ഥി. ഭരതനാട്യം വേദിക്കുപിറകില്‍ അച്ഛന്‍ പ്രദീപ് ആരെയോ കാത്തെന്നപോലെ നില്‍ക്കുന്നു. മകള്‍ തൊട്ടടുത്ത് ഭരതനാട്യവേഷത്തില്‍ ഇരിക്കുന്നു. ഇനിയും രണ്ടു വേഷമിടാനുണ്ട് വരുംദിവസങ്ങളില്‍. ഒന്ന് ഏറ്റവും ഇഷ്ടപ്പെട്ട മോഹിനിയാട്ടത്തിന്റേത്. രണ്ടാമത്തേത് കുച്ചിപ്പുടിയുടേത്. രണ്ടും വരേണ്ടത് ബസിലാണ്. അതും കാത്താണ് അച്ഛന്‍ പ്രദീപ് നില്‍ക്കുന്നത്.
കൊടുങ്ങല്ലൂരിലെ ഒരു ഷോപ്പില്‍നിന്നാണ് ഭരതനാട്യത്തിന്റെയും കുച്ചിപ്പുടിയുടെയും ഉടയാടകള്‍ കിട്ടേണ്ടത്. ഭരതനാട്യത്തിനുള്ളത് കൈയോടെ വാങ്ങിപ്പോന്നു. ആദ്യദിവസംതന്നെ അരങ്ങിലെത്തി. എന്നാല്‍, വ്യാഴാഴ്ചത്തേക്കുള്ള ഉടയാടകള്‍ ഇനിയും ഒരുങ്ങിയിട്ടില്ല. തയ്യാറായിക്കഴിഞ്ഞാല്‍ അവിടെനിന്ന് ആരെങ്കിലും ബസില്‍ക്കയറ്റിവിടും എന്ന പ്രതീക്ഷയിലാണ് പ്രദീപ്. ഇല്ലെങ്കില്‍ ഭരതനാട്യംകഴിഞ്ഞ ഉടന്‍ പ്രദീപ് തന്നെ ഓടണം കൊടുങ്ങല്ലൂരിലേക്ക്. സാധനം കൈയിലാക്കി അപ്പോള്‍ത്തന്നെ തിരിച്ചും. എന്നിട്ടുവേണം മോഹിനിയാട്ടത്തിന്റെ കാര്യം നോക്കാന്‍. ബുധനാഴ്ച നടക്കുന്ന മോഹിനിയാട്ടവേഷം കണ്ണൂരില്‍നിന്നുവരണം. അതും ബസില്‍ത്തന്നെ. വൈകിയാല്‍...
പാഴ്‌സല്‍ കയറ്റിവിടുന്ന കാര്യമെല്ലാം കുട്ടിയുടെ ഗുരുക്കന്മാരാണ് നോക്കുന്നത്. ഒന്നും മുടങ്ങില്ലെന്ന പ്രതീക്ഷയിലാണ് പ്രദീപ്. എന്നാലും ബസ്സൊന്ന് വൈകിയാല്‍, കയറ്റിവിടുന്നത് മുടങ്ങിയാല്‍... ആശങ്കകളില്ലാതില്ല. എല്ലാം മുന്‍കൂട്ടി ഒരുക്കാന്‍ പറ്റിയ അവസ്ഥയിലല്ല കുടുംബം. ബാര്‍ബര്‍ ജോലിയാണ് പ്രദീപിന്. മൂന്നിനങ്ങളില്‍ കുട്ടി സ്റ്റേജില്‍ കയറുമ്പോള്‍ പോക്കറ്റില്‍ പിന്നെ ഒന്നുമുണ്ടാവില്ല. ചെലവുചുരുക്കലാണ് ആകെ വഴി. അതിനുള്ള നെട്ടോട്ടത്തിനിടയില്‍ ഉടയാടകള്‍ ഇപ്പോഴും പാതിവഴിയിലെത്തിക്കാനേ ആയിട്ടുള്ളൂ.
താമസച്ചെലവിന്റെ കാര്യത്തിലും ഒന്നുചുരുക്കി. സുഹൃത്തിന്റെ പെങ്ങളുടെ വീടുണ്ട് കോഴിക്കോട്ട്. അവിടെ തങ്ങി. അമ്മ രാജിയും ഒപ്പം വന്നിട്ടുണ്ട്. ചെറിയ ബുദ്ധിമുട്ടുകള്‍ക്കിടയിലും അവര്‍ പ്രതീക്ഷയോടെ സംസാരിച്ചു. എല്ലാം നന്നായി വരും... മോള് നന്നായി കളിക്കും, ഉടയാടകള്‍ ഉടനെത്തും. എത്താതിരിക്കില്ല...
Content Highlights: kerala school kalolsavam 2023 devika
Also Watch
RELATED STORIES
.jpg?$p=ea79d92&f=1x1&w=100&q=0.8)
IN CASE YOU MISSED IT
.jpg?$p=8a7b7b1&f=1x1&w=100&q=0.8)
.jpg?$p=aa62323&f=1x1&w=100&q=0.8)
.jpg?$p=d01cb20&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..