വ്യത്യസ്ത വാദമുഖങ്ങളാൽ നിറഞ്ഞ് സംവാദവേദി

പെരിന്തൽമണ്ണ: കാലികപ്രസക്തമായ ചോദ്യത്തിന്റെ ചുവടുപിടിച്ചായിരുന്നു പെരിന്തൽമണ്ണ പി.ടി.എം. ഗവ. കോളേജിലെ സംവാദവേദിയിൽ ആവേശം നിറച്ചത്. കോളേജ് ഹോസ്റ്റലുകൾക്ക് സമയപരിധി ആവശ്യമോ എന്നതായിരുന്നു ‘സ്പീക്ക് ഫോർ ഇന്ത്യ’ സംവാദപരിപാടിയിലെ വിഷയം. ഫെഡറൽബാങ്ക് മാതൃഭൂമിയുമായി കൈകോർത്ത് സംഘടിപ്പിക്കുന്ന ഇന്ത്യയിലെ ഏറ്റവും വലിയ സംവാദപരിപാടിയായ 'ഫെഡറൽ ബാങ്ക് സ്പീക്ക് ഫോർ ഇന്ത്യ' കേരള എഡിഷൻ ഏഴാംപതിപ്പിലെ നാലാം ബ്ലോക്ക് തല മത്സരമാണ് തിങ്കളാഴ്ച പെരിന്തൽമണ്ണയിൽ നടത്തിയത്. നാലാം വർഷവും തുടർച്ചയായി സംവാദപരിപാടിയിൽ പങ്കെടുക്കുന്ന എം.ഇ.എസ്. കെ.വി.എം. കോളേജിലെ വിദ്യാർഥി കാവ്യയാണ് സംവാദവിഷയത്തിൽ ആദ്യം സംസാരിച്ചത്. വിദ്യാലയത്തിൽ വരുന്നത് പഠിക്കാനാണെന്നും അതിന് കൃത്യനിഷ്ഠയോടെ മുന്നോട്ടുപോകുന്നതിന് ഹോസ്റ്റലുകളിലെ സമയനിയന്ത്രണം ആവശ്യമാണെന്നുമായിരുന്നു കാവ്യയുടെ പക്ഷം. ഇതിനെ അനുകൂലിച്ചായിരുന്നു തുടർന്നെത്തിയ പെരിന്തൽമണ്ണ പി.ടി.എം. ഗവ. കോളേജിലെ ശ്രുതിയും പറഞ്ഞുവെച്ചത്. കുട്ടികളുടെ താമസ സൗകര്യത്തിനൊപ്പം അവരുടെ ശാരീരികവും മാനസികവുമായ കാര്യങ്ങൾ ഉറപ്പുവരുത്തുകയാണ് ലക്ഷ്യം. സമയനിഷ്ഠ ഇല്ലാതെവന്നാൽ വൈകിയെത്തുന്ന കുട്ടികൾ ലഹരിയടക്കമുള്ള മാഫിയകളുടെ പിടിയിലേക്ക് വീഴാൻ സാധ്യതയേറെയാണെന്നും പറഞ്ഞു. ഇതിന് മറുവാദവുമായി കെ.ആർ. ശ്രീനാരായണ കോളേജ് വിദ്യാർഥി അതുൽ എത്തി. ഹോസ്റ്റലുകൾ താമസിക്കുന്നവർക്ക് അവർ ചെയ്യാനുദ്ദേശിക്കുന്ന കാര്യങ്ങൾ രാത്രിയോ പകലോ എന്നില്ലാതെ ചെയ്യാൻ കഴിയുകയെന്നത് വ്യക്തിസ്വാതന്ത്ര്യത്തിന്റെ ഭാഗമാണ്. തിന്മനിറഞ്ഞ കാര്യങ്ങൾ കൂടുതലും നടക്കുന്നത് രാത്രിയിലാണെങ്കിൽ അതിനെതിരേയാണ് പ്രതികരിക്കേണ്ടതെന്നും അതുൽ പറഞ്ഞു. കോളേജ് ഹോസ്റ്റലിൽ സമയനിയന്ത്രണം ആവശ്യമാണെന്നും സ്വതന്ത്ര ചിന്തകൾക്ക് നിയന്ത്രണമില്ലെങ്കിൽ എന്തുസംഭവിക്കുമെന്ന് എല്ലാവർക്കുമറിയാമെന്നുമായിരുന്നു അൽജാമിഅ ആർട്സ് കോളേജിലെ ഷൈമ ബിൻത് ഉദാഹരണസഹിതം പറഞ്ഞത്. ഹോസ്റ്റലുകൾ എല്ലാവരെയും ഒരു കുടുംബമായി കാണാൻ പ്രാപ്തമാക്കുന്നതിനൊപ്പം നല്ല ജീവിതത്തെ ചിട്ടപ്പെടുത്താനും സഹായിക്കുന്നുണ്ടെന്നും അവിടെ സമയനിയന്ത്രണം ആവശ്യമാണെന്നും പെരിന്തൽമണ്ണ പി.ടി.എം. ഗവ. കോളേജിലെ വിദ്യാർഥിനി നൗഫ് പറഞ്ഞു. പകൽസമയങ്ങളെ അംഗീകരിക്കാൻ കഴിയുന്ന പെൺകുട്ടികൾക്ക് രാത്രിയെയാണോ ഭയപ്പെടേണ്ടതെന്നായിരുന്നു റിതു സുൽത്താനയുടെ ചോദ്യം.