Photo: twitter.com/IndSuperLeague
ഭുവനേശ്വര്‍: ഇന്ത്യന്‍ സൂപ്പര്‍ ലീഗില്‍ പ്ലേ ഓഫ് പ്രതീക്ഷകള്‍ സജീവമാക്കി ഒഡിഷ എഫ്.സി. നിര്‍ണായക മത്സരത്തില്‍ നിലവിലെ ചാമ്പ്യന്മാരായ ഹൈദരാബാദിനെ അട്ടിമറിച്ചുകൊണ്ട് ഒഡിഷ കരുത്തുകാട്ടി. ഒന്നിനെതിരേ മൂന്ന് ഗോളുകള്‍ക്കാണ് ഒഡിഷയുടെ വിജയം.
ഒഡിഷയ്ക്ക് വേണ്ടി ഐസക്ക് വന്‍ലാല്‍റുവാത്‌ഫെലയും സൂപ്പര്‍ താരം ഡീഗോ മൗറീഷ്യോയും ഗോളടിച്ചപ്പോള്‍ നിം ഡോര്‍ജി തമാങ്ങിന്റെ സെല്‍ഫ് ഗോളും തുണയായി. ഹൈദരാബാദിനായി ഗോളടിച്ചതും തമാങ്ങാണ്. ഗോളടിച്ചും സെല്‍ഫ് ഗോള്‍ വഴങ്ങിയും തമാങ് ഹൈദരാബാദിന്റെ നായകനും വില്ലനുമായി മാറി.
ഈ വിജയത്തോടെ ഒഡിഷ 18 മത്സരങ്ങളില്‍ നിന്ന് 27 പോയന്റുമായി ആറാം സ്ഥാനത്തെത്തി. ഇനി രണ്ട് മത്സരങ്ങളാണ് ലീഗ് ഘട്ടത്തില്‍ ഒഡിഷയ്ക്ക് അവശേഷിയ്ക്കുന്നത്. ഈ രണ്ട് മത്സരങ്ങളിലും ഒഡിഷയ്ക്ക് വിജയം അത്യാവശ്യമാണ്. മറുവശത്ത് പ്ലേ ഓഫ് ഏകദേശം ഉറപ്പിച്ച ഹൈദരാബാദിന് വലിയ തിരിച്ചടിയായി ഈ തോല്‍വി.
17 മത്സരങ്ങളില്‍ നിന്ന് 36 പോയന്റാണ് ഹൈദരാബാദിനുള്ളത്. ജയിച്ചിരുന്നെങ്കില്‍ ഒന്നാം സ്ഥാനക്കാരായ മുംബൈയുടമായുള്ള വ്യത്യാസം നാല് പോയന്റാക്കി കുറയ്ക്കാന്‍ ഹൈദരാബാദിന് സാധിക്കുമായിരുന്നു. നിലവില്‍ മുംബൈയ്ക്ക് 43 പോയന്റുണ്ട്.
33-ാം മിനിറ്റില്‍ തകര്‍പ്പന്‍ ലോങ്‌റേഞ്ചറിലൂടെ ഐസക്ക് ഒഡിഷയ്ക്ക് ലീഡ് സമ്മാനിച്ചു. എന്നാല്‍ ആദ്യപകുതി അവസാനിക്കാനിരിത്തെ 45-ാം മിനിറ്റില്‍ തമാങ് ഹൈദരാബാദിനായി വലകുലുക്കി. 72-ാം മിനിറ്റിലാണ് വിജയഗോള്‍ പിറന്നത്. നന്ദകുമാര്‍ ശേഖറിന്റെ ലോങ് റേഞ്ചര്‍ ക്ലിയര്‍ ചെയ്യാന്‍ ശ്രമിച്ച തമാങ്ങിന്റെ കാലില്‍ തട്ടി പന്ത് വലയില്‍ കയറുകയായിരുന്നു. സമനില ഗോള്‍ നേടാനായി ഹൈദരാബാദ് നന്നായി പരിശ്രമിച്ചെങ്കിലും നടന്നില്ല. ഒടുവില്‍ മത്സരമവസാനിക്കാന്‍ സെക്കന്‍ഡുകള്‍ മാത്രം ബാക്കിനില്‍ക്കെ ഡീഗോ മൗറീഷ്യോ ഒഡിഷയ്ക്ക് വേണ്ടി വലകുലുക്കി. ഇതോടെ ഒഡിഷ വിജയമുറപ്പിച്ചു.
Content Highlights: odisha fc vs hyderabad fc isl 2022-2023 match updates
Also Watch
RELATED STORIES
IN CASE YOU MISSED IT
Premium
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..