.jpg?$p=a0648db&f=16x10&w=852&q=0.8)
Photo: twitter.com/IndSuperLeague
ജംഷേദ്പുര്‍: ഇന്ത്യന്‍ സൂപ്പര്‍ ലീഗില്‍ കരുത്തരായ എ.ടി.കെ മോഹന്‍ ബഗാനെ സമനിലയില്‍ തളച്ച് ജംഷേദ്പുര്‍ എഫ്.സി. ഇരുടീമുകളും ഗോള്‍ രഹിത സമനിലയില്‍ പിരിഞ്ഞു. ഇരുടീമുകളും നിരവധി ഗോളവസരങ്ങളാണ് നഷ്ടപ്പെടുത്തിയത്.
ഈ സമനിലയോടെ മോഹന്‍ ബഗാന് പോയന്റ് പട്ടികയില്‍ കേരള ബ്ലാസ്റ്റേഴ്‌സിന് പിന്നില്‍ നാലാം സ്ഥാനത്ത് തുടരുന്നു. 17 മത്സരങ്ങളില്‍ നിന്ന് 28 പോയന്റാണ് ടീമിനുള്ളത്. ഇതോടെ മോഹന്‍ ബഗാന്റെ പ്ലേ ഓഫ് സാധ്യതകള്‍ സജീവമായി.
മറുവശത്ത് ജംഷേദ്പുര്‍ 10-ാം സ്ഥാനത്ത് തുടരുകയാണ്. ജംഷേദ്പുര്‍ നേരത്തേ തന്നെ പ്ലേ ഓഫ് കാണാതെ പുറത്തായിട്ടുണ്ട്. 18 മത്സരങ്ങളില്‍ നിന്ന് വെറും മൂന്ന് വിജയം മാത്രമുള്ള ജംഷേദ്പുരിന്റെ അക്കൗണ്ടില്‍ 13 പോയന്റ് മാത്രമാണുള്ളത്.
ഇരുടീമിലെയും ഗോള്‍കീപ്പര്‍മാര്‍ തമ്മിലുള്ള മത്സരത്തിനാണ് ജംഷേദ്പുരിലെ ടാറ്റ സ്‌പോര്‍ട്‌സ് കോംപ്ലക്‌സ് സ്റ്റേഡിയം വേദിയായത്. ജംഷേദ്പുരിന്റെ മലയാളി ഗോള്‍കീപ്പര്‍ രഹനേഷിന്റെയും മോഹന്‍ ബഗാന്റെ വിശാല്‍ കെയ്ത്തിന്റെയും മിന്നും സേവുകള്‍ ആരാധകരെ ഹരം കൊള്ളിച്ചു. ഗോളെന്നുറച്ച രണ്ട് അവസരങ്ങള്‍ ജംഷേദ്പുര്‍ അവസാന മിനിറ്റുകളില്‍ പാഴാക്കി. മോഹന്‍ബഗാന്റെ പേരുകേട്ട മുന്നേറ്റനിരയെ പിടിച്ചുകെട്ടാന്‍ ജംഷേദ്പുരിന് സാധിച്ചു.
17 മത്സരങ്ങള്‍ പൂര്‍ത്തിയാക്കിയ മോഹന്‍ ബഗാന് ശേഷിക്കുന്ന മത്സരങ്ങള്‍ കഠിനമാണ്. കരുത്തരായ ഹൈദരാബാദ്, കേരള ബ്ലാസ്‌റ്റേഴ്‌സ് എന്നിവരെയാണ് അടുത്ത രണ്ട് മത്സരങ്ങളില്‍ മോഹന്‍ ബഗാന് നേരിടേണ്ടത്. അവസാന ലീഗ് മത്സരത്തില്‍ ടീം ഈസ്റ്റ് ബംഗാളിനെ നേരിടും.
Content Highlights: jamshedpur vs mohun bagan isl match updates
Also Watch
RELATED STORIES
IN CASE YOU MISSED IT
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..