Photo: twitter.com|IndSuperLeague
മർഗാവ്: ഇന്ത്യന്‍ സൂപ്പര്‍ ലീഗില്‍ എ.ടി.കെ മോഹന്‍ ബഗാന്-ചെന്നൈയിന് എഫ്.സി മത്സരം സമനിലയില്‍. ഇരുടീമുകളും ഓരോ ഗോള്‍ വീതം നേടി. മോഹന്‍ ബഗാന് വേണ്ടി ലിസ്റ്റണ്‍ കൊളാസോയും ചെന്നൈയിന് വേണ്ടി വ്ളാഡിമിര് കോമാനും സ്‌കോര്‍ ചെയ്തു. രണ്ട് ഗോളുകളും ആദ്യ പകുതിയിലാണ് പിറന്നത്
ഈ സമനിലയോടെ ചെന്നൈയിന് പോയന്റ് പട്ടികയില്‍ മൂന്നാം സ്ഥാനത്തെത്തി. നാല് മത്സരങ്ങളില്‍ നിന്ന് എട്ട് പോയന്റാണ് ടീമിനുള്ളത്. അഞ്ച് മത്സരങ്ങളില്‍ നിന്ന് ഏഴ് പോയന്റുള്ള മോഹന്‍ ബഗാന് ആറാം സ്ഥാനത്ത് തുടരുന്നു
മത്സരത്തിന്റെ ആദ്യ മിനിറ്റ് തൊട്ട് ഇരുടീമുകളും ആക്രമിച്ച് കളിക്കാനാണ് ശ്രമിച്ചത്. ആറാം മിനിറ്റില്‍ മോഹന്‍ ബഗാന്റെ ലിസ്റ്റണ്‍ കൊളാസോയുടെ ലോങ്‌റേഞ്ചര്‍ ചെന്നൈ പോസ്റ്റിന് മുകളിലൂടെ പറന്നു. പിന്നാലെ 18-ാം മിനിറ്റില്‍ ലിസ്റ്റണ്‍ തന്നെ ടീമിനെ മുന്നിലെത്തിച്ചു.
റോയ് കൃഷ്ണ ബോക്‌സിനകത്തേക്ക് നല്‍കിയ മനോഹരമായ പാസ് സ്വീകരിച്ച ലിസ്റ്റണ്‍ തകര്‍പ്പന്‍ ഷോട്ടിലൂടെ പന്ത് വലയിലെത്തിച്ചു. ലിസ്റ്റണിന്റെ ഷോട്ട് ക്രോസ് ബാറിലിടിച്ച് വലയില്‍ കയറുകയായിരുന്നു. ഇതോടെ മത്സരത്തില്‍ മോഹന്‍ ബഗാന് നിര്‍ണായക ലീഡെടുത്തു.
21-ാം മിനിട്ടില്‍ ചെന്നൈ ലീഡെടുത്തെന്ന് തോന്നിച്ചെങ്കിലും അനിരുദ്ധ് ഥാപ്പയുടെ ഷോട്ട് ഗോള്‍കീപ്പര്‍ അമരീന്ദര്‍ തട്ടിയകറ്റി. പന്ത് കോമാന്‍ സ്വീകരിച്ചെങ്കിലും താരത്തിന്റെ ഷോട്ട് ഗോള്‍ലൈനില്‍ വെച്ച് ടിറി രക്ഷപ്പെടുത്തി. ഗോള്‍ വഴങ്ങിയ ശേഷം കൂടുതല്‍ ആക്രമണങ്ങള്‍ക്ക് ചെന്നൈ മുതിര്‍ന്നപ്പോള്‍ പ്രതിരോധത്തിലേക്ക് വലിയാനാണ് മോഹന്‍ ബഗാന് ശ്രമിച്ചത്.
ചെന്നൈയുടെ ആക്രമണങ്ങള്‍ക്ക് ആദ്യപകുതിയുടെ ഇന്‍ജുറി ടൈമില്‍ ഫലം കണ്ടു. മധ്യനിരതാരം വ്ളാഡിമിര് കോമാന്‍ ചെന്നൈയ്ക്ക് വേണ്ടി വലകുലുക്കി. ബോക്‌സിനകത്തേക്ക് വന്ന ത്രോബോള്‍ കൃത്യമായി ക്ലിയര്‍ ചെയ്യുന്നതില്‍ മോഹന്‍ ബഗാന് പ്രതിരോധം പരാജയപ്പെട്ടു. ലക്ഷ്യം തെറ്റിയ പന്ത് നേരെ കോമാന്റെ കാലിലേക്കാണ് വന്നത്. കോമാന്റെ തകര്‍പ്പന്‍ ഷോട്ട് ഗോള്‍കീപ്പര്‍ അമരീന്ദറെ മറികടന്ന് വലയില്‍ കയറി. ഇതോടെ മത്സരം സമനിലയിലായി. വൈകാതെ ആദ്യപകുതി അവസാനിച്ചു.
രണ്ടാം പകുതിയില്‍ മോഹന്‍ ബഗാന് വീണ്ടും ആക്രമിച്ച് കളിക്കാന്‍ ആരംഭിച്ചു. ചെന്നൈയിനും മികച്ച പോരാട്ടവുമായി കളം നിറഞ്ഞു. 58-ാം മിനിറ്റില്‍ ചെന്നൈയുടെ എഡ്വിന്‍ വാന്‍സ്‌പോളിന്റെ ലോങ്‌ഷോട്ട് ക്രോസ് ബാറിന് മുകളിലൂടെ പറന്നു.
66-ാം മിനിറ്റില്‍ അനിരുദ്ധ് ഥാപ്പയുടെ മനോഹരമായ പാസില്‍ വാന്‍സ്‌പോളിന് മികച്ച അവസരം ലഭിച്ചെങ്കിലും താരത്തിന്റെ ഷോട്ട് പോസ്റ്റിന് പുറത്തേക്ക് പോയി. പിന്നീട് കാര്യമായ അവസരങ്ങള്‍ സൃഷ്ടിക്കാന്‍ ഇരുടീമുകള്‍ക്കും സാധിച്ചില്ല. മത്സരം സമനിലയില്‍ കലാശിക്കുകയും ചെയ്തു.
Content Highlights: ATK Mohun Bagan vs Chennaiyin FC ISL 2021-2022 live updates
Also Watch
RELATED STORIES
.jpg?$p=c8a05f8&f=1x1&w=100&q=0.8)
Premium
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..