Photo: AFP
ബെംഗളൂരു: ഇന്ത്യന്‍ പ്രീമിയര്‍ ലീഗില്‍ നിന്ന് റോയല്‍ ചലഞ്ചേഴ്‌സ് ബാംഗ്ലൂര്‍ പുറത്തായതിന്റെ സങ്കടത്തിലാണ് ആരാധകര്‍. സൂപ്പര്‍താരം വിരാട് കോലി സെഞ്ചുറി നേടിയിട്ടും ബാംഗ്ലൂരിന് വിജയം നേടാനായില്ല. ബൗളര്‍മാരാണ് ഇത്തവണയും ബാംഗ്ലൂരിനെ ചതിച്ചത്. കൂറ്റന്‍ സ്‌കോറുണ്ടായിട്ടും അത് പ്രതിരോധിക്കാന്‍ ബാംഗ്ലൂര്‍ ബൗളര്‍മാര്‍ക്ക് കഴിഞ്ഞില്ല.
ബാംഗ്ലൂര്‍ ഉയര്‍ത്തിയ 198 റണ്‍സ് വിജയലക്ഷ്യം ഗുജറാത്ത് 19.1 ഓവറില്‍ നാല് വിക്കറ്റ് നഷ്ടത്തില്‍ മറികടന്നു. ശുഭ്മാന്‍ ഗില്ലിന്റെ സെഞ്ചുറിയാണ് ടീമിന് തുണയായത്. ഇതോടെ ബാംഗ്ലൂര്‍ പ്ലേ ഓഫ് കാണാതെ പുറത്തായി. ജയിച്ചിരുന്നെങ്കില്‍ ബാംഗ്ലൂരിന് അവസാന നാലിലെത്താമായിരുന്നു. മത്സരത്തിനുശേഷം വിരാട് കോലിയെയും റോയല്‍ ചലഞ്ചേഴ്‌സ് ബാംഗ്ലൂരിനെയും കളിയാക്കിക്കൊണ്ട് ഇന്‍സ്റ്റഗ്രാം സ്‌റ്റോറി പങ്കുവെച്ചിരിക്കുകയാണ് ലഖ്‌നൗ സൂപ്പര്‍ ജയന്റ്‌സിന്റെ അഫ്ഗാന്‍ താരം നവീന്‍ ഉള്‍ ഹഖ്.
ഒരാള്‍ പൊട്ടിച്ചിരിക്കുന്ന വീഡിയോയാണ് സ്‌റ്റോറിയായി നവീന്‍ ഉള്‍ ഹഖ് പങ്കുവെച്ചിരിക്കുന്നത്. ലീഗ് മത്സരത്തില്‍ ബാംഗ്ലൂരും ലഖ്‌നൗവും ഏറ്റുമുട്ടിയപ്പോള്‍ നവീനും കോലിയും തമ്മില്‍ ഉരസിയിരുന്നു. ഇരുവരുടെയും വാക്കേറ്റം സമൂഹമാധ്യമങ്ങളില്‍ വൈറലായിരുന്നു. അന്നുതൊട്ട് കോലിയ്‌ക്കെതിരേ നവീന്‍ ചില പോസ്റ്റുകള്‍ സമൂഹമാധ്യമങ്ങളിലൂടെ പങ്കുവെച്ചിരുന്നു. എന്നാല്‍ നവീന്‍ ഉള്‍ ഹഖിന്റെ ഈ പോസ്റ്റിനെതിരേ ആരാധകര്‍ ശക്തമായി രംഗത്തെത്തിയിട്ടുണ്ട്.
നവീന്‍ പരിധി ലംഘിക്കുന്നുവെന്നും കളിയാക്കല്‍ കൂടിപ്പോയെന്നും ആരാധകരില്‍ പലരും സമൂഹമാധ്യമങ്ങളിലൂടെ കുറിച്ചു. ഇങ്ങനെ തുടര്‍ന്നാല്‍ ഇത് നവീന്റെ അവസാന ഐ.പി.എല്‍ സീസണായിരിക്കുമെന്നും പലരും കുറിച്ചു. നവീന്‍ ഉള്‍ ഹഖിനെതിരേ ആരാധകര്‍ ഒന്നടങ്കം തിരിഞ്ഞിട്ടുണ്ട്. ചിലര്‍ നവീനിനെ അനുകൂലിച്ചും രംഗത്തെത്തിയിട്ടുണ്ട്. ലഖ്‌നൗ സൂപ്പര്‍ ജയന്റ്‌സ് മൂന്നാം സ്ഥാനക്കാരായാണ് പ്ലേ ഓഫിലേക്ക് കടന്നിരിക്കുന്നത്. എലിമിനേറ്ററില്‍ മുംബൈ ഇന്ത്യന്‍സാണ് ലഖ്‌നൗവിന്റെ എതിരാളികള്‍.
Content Highlights: Naveen-ul-Haq's Insta Story After RCB's Elimination Leaves Virat Kohli Fans Fuming
Also Watch
RELATED STORIES
IN CASE YOU MISSED IT
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..