മേള തിരിച്ചെത്തിയ ആവേശത്തിൽ ഡെലിഗേറ്റുകൾ; സജീവമായി ആദ്യദിനം, IFFK 2022, iffk 2022 venue, iffk 2022 dates, iffk 2022 reservation

സ്വന്തം ലേഖകൻ

18 March 2022, 07:44 PM IST

ടാഗോറിലും കൈരളി-ശ്രീയിലും കലാഭനിലും ആദ്യ ഷോ തുടങ്ങും മുമ്പുതന്നെ ഡെലിഗേറ്റുകളുടെ നീണ്ടനിരയാണ് രൂപപ്പെട്ടത്.

ചലച്ചിത്രമേളയിൽ പങ്കെടുക്കാനെത്തിയ ഡെലിഗേറ്റുകൾ| Photo: Praveen Das M

തിരുവനന്തപുരം: രണ്ടു വർഷത്തിനു ശേഷം കേരള രാജ്യാന്തര ചലച്ചിത്രമേള പൂർണതോതിൽ തിരിച്ചെത്തിയ ആവേശത്തിൽ ഡെലിഗേറ്റുകൾ. മേളയുടെ ആദ്യദിനം തന്നെ പ്രേക്ഷകപങ്കാളിത്തം കൊണ്ട് ശ്രദ്ധേയമായി.

പരിമിതമായ തിയറ്ററുകളിൽ മാത്രം പ്രദർശനം നടക്കുന്ന ആദ്യദിനം വലിയ ജനത്തിരക്കുണ്ടാവാറില്ല. എന്നാൽ, വ്യാഴാഴ്ച നടന്ന പ്രദർശനങ്ങൾ നിറഞ്ഞ സദസ്സിലാണ് പ്രദർശിപ്പിച്ചത്. ടാഗോറിലും കൈരളി-ശ്രീയിലും കലാഭനിലും ആദ്യ ഷോ തുടങ്ങും മുമ്പുതന്നെ ഡെലിഗേറ്റുകളുടെ നീണ്ടനിരയാണ് രൂപപ്പെട്ടത്. ഉദ്ഘാടനചിത്രം ഉൾപ്പെടെ 13 ചിത്രങ്ങളുടെ പ്രദർശനമാണ് ഇന്നുണ്ടായിരുന്നത്.

**ചലച്ചിത്രമേളയ്ക്കെത്തിയ ഡെലിഗേറ്റുകൾ | ഫോട്ടോ: പ്രവീൺദാസ്. എം ‌\ മാതൃഭൂമി**

ലോകസിനിമാ വിഭാഗത്തിൽ പ്രദർശിപ്പിച്ച ദ എംപ്ലോയർ ആന്റ് എംപ്ലോയീ, ദ കിങ് ഓഫ് ഓൾ ദ വേൾഡ്, ലാമ്പ്, ഗ്രേറ്റ് ഫ്രീഡം തുടങ്ങിയ ചിത്രങ്ങൾക്ക് മികച്ച പ്രേക്ഷക പ്രതികരണമാണ് ലഭിച്ചത്. ഇന്ത്യൻ സിനിമ ടുഡേ വിഭാഗത്തിൽ അ‌ർവിന്ദ് പ്രതാപിന്റെ ലൈഫ് ഈസ് സഫറിങ് ഡെത്ത് ഈസ് സാൽവേഷൻ പ്രദർശിപ്പിച്ചു.

ആദ്യദിനമായതിനാൽ വ്യാഴാഴ്ചത്തെ പ്രദർശനങ്ങൾക്ക് റിസർവേഷൻ ഉണ്ടായിരുന്നില്ല. രണ്ടാംദിനമായ വെള്ളിയാഴ്ചത്തെ പ്രദർശനങ്ങൾക്കുള്ള റിസർവേഷൻ രാവിലെ എട്ടു മണിക്ക് ആരംഭിച്ച് ഒരു മണിക്കൂറിനുള്ളിൽ തന്നെ പത്തിലേറെ ചിത്രങ്ങളുടെ റിസർവേഷൻ പൂർത്തിയായി.