ശബരിമലയുടെ ആദ്യ പൂജാരി കരിമലയരയനാണെന്നും 1902മുതലാണ് താഴമണ്‍ മഠംകാര്‍ ശബരിമലയുടെ പൂജാരിമാരായി വരുന്നതെന്നും ചരിത്രാന്വേഷകനും ഐക്യമലയര മഹാസഭ നേതാവുമായ പികെ സജീവ്. തങ്ങളുടെ കാരണവന്‍മാരെയെല്ലാം ജാതി പറഞ്ഞ് അവിടെനിന്ന് ഓടിച്ചതാണെന്നും അതിന്റെ പ്രതിനിധികളാണ് തങ്ങളെന്നും അദ്ദേഹം പറഞ്ഞു. മാതൃഭൂമി ന്യൂസിന്റെ 'ഞങ്ങള്‍ക്കും പറയാനുണ്ട്' എന്ന പ്രതിവാര പരിപാടിയില്‍ പങ്കെടുക്കുകയായിരുന്നു അദ്ദേഹം.
"ശബരിമലയുടെ ആദ്യത്തെ പൂജാരി കരിമലയരയനാണ്. രണ്ടാമത്തെ പൂജാരി താളനാനി അരയനാണ്. മൂന്നാമത്തെ പൂജാരി കോര്‍മന്‍ അരയനും.പിന്നീട് 1902 മുതലാണ് താഴമണ്‍ മഠംകാര്‍ ശബരിമല അയ്യന്റെ പൂജാരിമാരായി വരുന്നത്.
ശബരിമലയിലെ ഒന്നാമത്തെ പടി കമഴ്ത്തിവെച്ചിരിക്കുകയാണ് അതില്‍ കരിമലയരയന്‍ വക എന്ന് കൊത്തിവെച്ചിരിക്കുകയാണ്. ഞങ്ങളുടെ കാരണവന്‍മാരെയും മുത്തശ്ശന്‍മാരെയുമെല്ലാം ജാതി പറഞ്ഞ് അവിടെ നിന്ന് ഓടിച്ചിരിക്കുകയാണ്. അതിന്റെ പ്രതിനിധികളാണ് ഞങ്ങള്‍", പികെ സജീവ് പറഞ്ഞു
"നിലയ്ക്കല്‍ മഹാദേവ ക്ഷേത്രത്തിന്റെ സമീപത്തെ റബ്ബര്‍ തോട്ടത്തില്‍ രണ്ട് ചിത്രങ്ങള്‍ കിടക്കുന്നുണ്ട്. അത് 13ാം നൂറ്റാണ്ടിലെ ചിത്രങ്ങളാണ്. ഇതെല്ലാം നാഗരികതയുടെ ഭാഗമാണ്. ഈ മലകളിലെല്ലാം ഒരു വിഭാഗം ആളുകള്‍ ഉണ്ടായിരുന്നു. ഇവിടെ കല്ലറകളുമുണ്ട്. ആരാണീയാളുകളെ മലയില്‍ നിന്നിറക്കി വിട്ടത്. അധികാരമുള്ളയാളുകളാണ് അത് ചെയ്തത്." ആരാണീ ക്ഷേത്രം പിടിച്ചെടുത്തതെന്നും അദ്ദേഹം ചോദിച്ചു.
