1855-ല്‍ ചൈനയിലെ യൂനാന്‍ പ്രവിശ്യയില്‍ ആരംഭിച്ച ബ്യൂബോണിക് പ്ലേഗ് പകര്‍ച്ചവ്യാധി ഇന്ത്യയിലെത്തിയപ്പോഴാണ് ബോംബെ പ്രസിഡന്‍സി ആശങ്കയിലായത്. പ്ലേഗ് ബാധയെ തടയാന്‍ പരിശ്രമിച്ച ബ്രിട്ടീഷ് ഉദ്യോഗസ്ഥര്‍ക്ക് ആത്മവിശ്വാസം പകരാനായി ഒരു കൊച്ചു നിയമം തയ്യാറാക്കി. ദി എപിഡമിക്ക് ഡിസീസ് ആക്ട് 1897, അഥവാ പകര്‍ച്ചവ്യാധി നിയന്ത്രണ നിയമം. 

കേവലം രണ്ട് പുറത്തില്‍ പകര്‍ച്ചവ്യാധികള്‍ പൊട്ടിപ്പുറപ്പെടുമ്പോള്‍ ഭരണകൂടം ഉദ്യോഗസ്ഥരിലൂടെ നിയന്ത്രണങ്ങള്‍ കര്‍ശനമായി നടപ്പാക്കി ജനതയുടെ ആരോഗ്യം എങ്ങനെ സംരക്ഷിക്കാമെന്ന് പറഞ്ഞു വച്ചു ആ നിയമം. അക്കാലത്ത് പ്ലേഗ് പ്രധാനമായും കപ്പലുകള്‍ വഴിയാണ് പടരുന്നതെന്ന്  ബ്രിട്ടീഷുകാര്‍ മനസ്സിലാക്കി. ബോംബെ തുറമുഖത്തടുത്ത കപ്പലുകളെല്ലാം കര്‍ശന പരിശോധനയ്ക്ക് വിധേയമാക്കിയെങ്കിലും പുണെയിലും സമീപ പ്രദേശങ്ങളിലും മരണം വിതച്ച ബ്ലാക്ക് ഡെത്ത് കൊളോണിയല്‍ കാലത്തെ ഇന്ത്യയെ ഒരുതരത്തില്‍ പുനര്‍നിര്‍വചിച്ചു.

അല്പം ചരിത്രത്തിലേക്കും ഈ നിയമത്തിന്റെ പശ്ചാത്തലത്തില്‍ സഞ്ചരിക്കുമ്പോള്‍ ഇന്ത്യന്‍ സ്വാതന്ത്ര്യസമരസേനാനികള്‍ക്ക് പ്രത്യേകിച്ച് ബോംബെ പ്രസിഡന്‍സിക്ക് കീഴില്‍ സംഘടിക്കാനും ബ്രിട്ടീഷുകാര്‍ക്കെതിരെ പോരാടാനും ഈ നിയമം ഒരുതരത്തില്‍ സാഹചര്യമൊരുക്കുകയായരുന്നു.

പൂനയിലെ പ്ലേഗ് ബാധയ്ക്ക് തടയിടാന്‍ പ്രത്യേക ഉദ്യോഗസ്ഥനെത്തി. പ്ലേഗ് കമ്മറ്റി ചെയര്‍മാന്‍ ഡബ്ല്യൂ.സി. റാന്‍ഡ്. പ്ലേഗിന്റെ കൈവിട്ട പോക്കില്‍ ലക്ഷകണക്കിന് പേര്‍ മരിക്കുന്നതും കണ്ട് ബംഗ്ലാവില്‍ തന്നെയിരുന്നു റാന്‍ഡ്. പൂനെയിലെ അന്‍പതു ശതമാനത്തോളം പേര്‍ നഗരം വിട്ടു പോയി. ഒടുവില്‍ ജനങ്ങളുടെ പ്രതിഷേധം ശക്തമായതോടെ തെരുവിലിറങ്ങാന്‍ നിര്‍ബന്ധിതനായി ആ ബ്രിട്ടീഷ് സിവില്‍ സര്‍വ്വീസ് ഓഫീസറും സംഘവും. 

corona virusപുതിയ നിയമത്തിനു കീഴില്‍ റാന്‍ഡ് കര്‍ശന നിര്‍ദ്ദേങ്ങള്‍ നല്‍കിയതുമായി ജനങ്ങള്‍ക്ക് പൊരുത്തപ്പെടാനായില്ല. പൊതു സ്ഥലങ്ങള്‍, ആശുപത്രികള്‍, വേര്‍തിരിക്കല്‍ ക്യാംപുകള്‍, അണുബാധയുണ്ടെന്ന് സംശയിക്കുന്ന സ്വകാര്യ വസ്തുക്കള്‍ അല്ലെങ്കില്‍ വാഹനങ്ങള്‍ കണ്ടു കെട്ടല്‍, നീക്കം ചെയ്യല്‍, നശിപ്പിക്കല്‍, നഗരത്തില്‍ നിന്നുള്ള ചലനത്തെ തടഞ്ഞുനിര്‍ത്തല്‍ തുടങ്ങിയവയെല്ലാം നിര്‍ബന്ധിതമായി നടത്തുകയായിരുന്നു റാന്‍ഡും മറ്റ് ഉദ്യോഗസ്ഥരും. 

പൂനെയിലെ ജനങ്ങള്‍ ഈ നടപടികള്‍ അടിച്ചമര്‍ത്തലായി കണക്കാക്കി. അരയ്ക്ക് മുകളില്‍ ഉടുതുണിമാറ്റി കക്ഷത്തിലെ കഴല നോക്കി പ്ലേഗ് കണ്ടു പിടിക്കാന്‍ എളുപ്പ മാര്‍ഗ്ഗം തേടിയ റാന്‍ഡിന്റെയും കൂട്ടരുടേയും നടപടിയിലുണ്ടായ മനോവിഷമം മൂലം പെണ്‍കൊടി ആത്മഹത്യ ചെയ്ത സംഭവം ജനവികാരം ബ്രിട്ടീഷ് ഉദ്യോഗസ്ഥര്‍ക്കെതിരാക്കി. ഛത്രപതി ശിവാജി മഹാരാജാവിന്റെ വരികള്‍ കടമെടുത്ത ബാലഗംഗാധര തിലകിന്റെ പ്രസംഗം പൂനയില്‍ നടന്നു. സ്വരാജിനായി കൊതിച്ച് എത്തി തിലകിന്റെ പ്രസംഗം കേട്ട യുവാക്കളില്‍ ചപേക്കര്‍ സഹോദരന്‍മാരുമുണ്ടായിരുന്നു.

1897 ജൂണ്‍ 22-ന് ചപേക്കര്‍ സഹോദരന്മാര്‍ ഡബ്ല്യൂ. സി. റാന്‍ഡിനെയും സൈനിക സഹായിയെയും വെടിവച്ചു കൊലപ്പെടുത്തി.
ബാലകൃഷ്ണ ഹരി, വാസുദേവ് ഹരി, ദാമോദര്‍ ഹരി എന്നീ മൂവരേയും പിന്നീട് ബ്രിട്ടീഷുകാര്‍ തൂക്കിലേറ്റി. ഇതിനിടെ ബാല ഗംഗാധര തിലകനെതിരെ ദേശദ്രോഹത്തിന് ആദ്യത്തെ കേസും. പറഞ്ഞു വന്നത് കൊളോണിയല്‍ ഇന്ത്യയിലെ രാഷ്ട്രീയത്തില്‍ പ്ലേഗും പകര്‍ച്ചവ്യാധി നിയമവും സ്വാധീനം ചെലുത്തിയതിനെപ്പറ്റിയാണ്.

ഇനി നിയമത്തിലേക്ക് കടക്കാം.. കോളറയും, മലേറിയയും, ഡെങ്കിപനിയും, പക്ഷി പനിയുമെല്ലാം വന്നപ്പോള്‍ ഇന്ത്യയിലെ വിവിധ സംസ്ഥാനങ്ങള്‍ വിവിധ കാലങ്ങളില്‍ കൊച്ചു ഭേദഗതികളോടെ പഴയ ബോംബെ പ്രസിഡന്‍സി ഉപയോഗിച്ച ഇതേ നിയമത്തെ അഭയം പ്രാപിച്ചു. തദ്ദേശസ്വയംഭരണ സ്ഥാപനങ്ങള്‍ക്കും ജില്ലാ ഭരണാധികാരികള്‍ക്കും പകര്‍ച്ച വ്യാധി പടരുന്ന സമയങ്ങളില്‍ വിശേഷ അധികാരം നല്‍കുന്ന ഈ നിയമം കൊറോണ പടര്‍ന്നു പിടിക്കുന്ന സാഹചര്യത്തില്‍ ഏറെ പ്രാധാന്യമര്‍ഹിക്കുന്നു. നിയമമനുസരിച്ച് പകര്‍ച്ചവ്യാധികള്‍ തടയുന്നതിന് പ്രത്യേക നിയന്ത്രണങ്ങളേര്‍പ്പെടുത്താന്‍ സംസ്ഥാന സര്‍ക്കാറുകള്‍ക്ക് അധികാരം ഉണ്ടായിരിക്കും. മഹാരാഷ്ട്രയില്‍ പ്രത്യേകിച്ച് ലോക്കല്‍ ട്രെയിന്‍ ഗതാഗതമുള്‍പ്പടെ നിയന്ത്രിക്കുന്നതും.
കേരളമുള്‍പ്പടെ വിവിധ സംസ്ഥാനങ്ങളില്‍ വിദ്യാലയങ്ങള്‍ക്കും സ്ഥാപനങ്ങള്‍ക്കും അവധി നല്‍കുന്നതും എല്ലാം ഈ അധികാരത്തിന്റെ കൂടി പിന്തുണയോടെയാണ്.

രാജ്യം ഒന്നടങ്കം കൊറോണയെ പ്രതിരോധിക്കുന്ന ഘട്ടത്തില്‍ സര്‍ക്കാര്‍ ഉദ്യോഗസ്ഥരുടെ നിര്‍ദ്ദേശങ്ങളനുസരിക്കാതിരിക്കുന്നതും നിയന്ത്രണങ്ങളെ അവഗണിക്കുന്നതും വിരുദ്ധമായി പ്രവര്‍ത്തിക്കുന്നതും ഇന്ത്യന്‍ ശിക്ഷാ നിയമത്തിലെ 188 ആം വകുപ്പിന് കീഴില്‍ ഗൗരവ സ്വഭാവത്തിന് അനുസരിച്ച് ഒരു മാസം മുതല്‍ പരമാവധി ആറു മാസം വരെ ശിക്ഷ ലഭിച്ചേക്കാവുന്നതോ
ഇരുനൂറ് മുതല്‍ പരമാവധി ആയിരം രൂപ വരെ പിഴ ഈടാക്കാവുന്നതോ ആയ ക്രിമിനല്‍ കുറ്റ ക്യത്യമാണെന്ന് എടുത്ത് പറയുകയാണ് നിയമത്തിലെ വകുപ്പ് 3.

corona virus

പകര്‍ച്ചവ്യാധിയെ തടയാന്‍ എടുക്കുന്ന നടപടികളുടെ പേരിലും ഉത്തമവിശ്വാസത്തില്‍ ചെയ്യുന്ന കാര്യങ്ങളെ ചൊല്ലിയും ഭാവിയില്‍ കേസുകള്‍ നിലനില്‍ക്കില്ലെന്ന വകുപ്പ് 4ലെ സംരക്ഷണം സര്‍ക്കാര്‍ ഉദ്യോഗസ്ഥര്‍ക്ക് ആത്മവിശ്വാസം പകരുന്നു. 1937ല്‍ പുതുക്കി ചേര്‍ത്ത വകുപ്പ് 2A കേന്ദ്രസര്‍ക്കാരിന്റെ അധികാരങ്ങളെ അടിവരയിടുന്നു. അപകടകരമായ രീതിയില്‍ പകര്‍ച്ച വ്യാധി പടര്‍ന്നു പിടിക്കുമ്പോള്‍ രാജ്യത്തെ തുറമുഖങ്ങളില്‍ നിന്ന് പുറപ്പെടുന്നതും അവിടേക്ക് വരുന്നതുമായ എല്ലാ കപ്പലുകളും പരിശോധിക്കുകയും വേണ്ട നിയന്ത്രണങ്ങള്‍ ഏര്‍പ്പെടുത്തുകയും ചെയ്യാം. ആവശ്യമെങ്കില്‍ പൊതുജനാരോഗ്യവും സുരക്ഷയും മുന്‍നിര്‍ത്തി പ്രസ്തുത കപ്പലിലെ യാത്രക്കാരുടെ സഞ്ചാരം താല്‍ക്കാലികമായി തടയുകയുമാകാം.

വിമാനങ്ങളുടെയും പ്രൈവറ്റ് ജെറ്റുകളുടേയും 2020ല്‍ കൊറോണയെ നേരിടുമ്പോള്‍ നിയമത്തിലെ ഭേദഗതിയോടെയല്ലെങ്കിലും കപ്പലും പായ് വഞ്ചിയും എന്നൊക്കെ വകുപ്പുകളില്‍ കുറിച്ചിട്ടയിടത്ത് ജലമാര്‍ഗ്ഗത്തിനൊപ്പം വായുമാര്‍ഗ്ഗ സഞ്ചാരങ്ങളേയും ഉള്‍പ്പെടുത്തി വ്യാഖ്യാനം വിപുലപ്പെടുത്താന്‍ കോടതിക്കു കഴിയും എന്നാണ് ഒരുവിഭാഗം നിയമവിദഗ്ദരുടെ നിരീക്ഷണം.

പകര്‍ച്ചവ്യാധി നിയന്ത്രണ നിയമത്തിനൊപ്പം ഇന്ത്യന്‍ ശിക്ഷാനിയമത്തിലെ തന്നെ 176, 177, 277 എന്നീ വകുപ്പുകളും അതത് തദ്ദേശസ്വയംഭരണസ്ഥാപനങ്ങളുടെ അല്ലെങ്കില്‍ നഗരസഭകളുടെ മുനിസിപ്പല്‍/കോര്‍പ്പറേഷന്‍ നിയമങ്ങള്‍ക്കനുസൃതമായി പ്രതിരോധ പ്രവര്‍ത്തനങ്ങള്‍ക്കിടെ ഉപയോഗപ്പെടുത്താവുന്നതാണ്. ഇതില്‍ വകുപ്പ് 176 അനുസരിച്ച് സര്‍ക്കാര്‍ ഉദ്യോഗസ്ഥര്‍ നടത്തുന്ന വിവരശേഖരണത്തിനും നോട്ടീസുകള്‍ക്കും കൃത്യമായി ഉത്തരം നല്‍കാനുള്ള വ്യക്തികളുടെ നിയമപരമായ ഉത്തരവാദിത്വത്തെ കുറിച്ച് പരാമര്‍ശിക്കുന്നു. ഇക്കാര്യത്തില്‍ വീഴ്ച വരുത്തിയാല്‍ ഉണ്ടായേക്കാവുന്ന പ്രത്യാഘാതത്തിന്റെ ഗൗരവമനുസരിച്ച് ഒരു മാസം മുതല്‍ പരമാവധി ആറു മാസം വരെ തടവോ 500 മുതല്‍ 1000  രൂപ വരെ പിഴയോ രണ്ടും ഒന്നിച്ചോ ലഭിക്കാവുന്നതാണ്. 

മനപ്പൂര്‍വം തെറ്റായ വിവരങ്ങള്‍ അധികൃതരെ ധരിപ്പിച്ചാല്‍ വകുപ്പ് 177 അനുസരിച്ച് സമാന ശിക്ഷ തന്നെ ലഭിക്കും രോഗബാധിതര്‍ മനപ്പൂര്‍വ്വം പൊതു ജലാശയങ്ങളിലോ ജലസംഭരണികളിലോ പകര്‍ച്ചവ്യാധി പടരാനിടയാക്കും വിധം പെരുമാറുന്ന സാഹചര്യം ഒഴിവാക്കാനും ഇന്ത്യന്‍ ശിക്ഷാ നിയമം ശ്രദ്ധിക്കുന്നുണ്ട്. കുറ്റക്കാര്‍ക്ക് 3 മാസം വരെ തടവോ 500 രൂപ പിഴയോ രണ്ടും കൂടിയോ ചുമത്തും.

കൂട്ടത്തില്‍ ആരോഗ്യ അടിയന്തരാവസ്ഥ പരിഗണിച്ചുള്ള അതത് ജില്ലാ കളക്ടര്‍മാരുടെ ക്രിമിനല്‍ നടപടി ചട്ടപ്രകാരമുള്ള 144ാം വകുപ്പ് നിരോധനാഞ്ജകളും ഫലപ്രദമായി ഉപയോഗിക്കാം.
തല്‍ക്കാലം കൊറോണ പ്രതിരോധ പ്രവര്‍ത്തനങ്ങള്‍ക്ക് ഊര്‍ജ്ജം പകരാനായി രാജ്യത്തെ നിയമരംഗം തയ്യാറെടുത്തു കഴിഞ്ഞെന്നും കോടതികള്‍ ഈ അവസരത്തില്‍ ദി എപിഡമിക്ക് ഡിസീസ് നിയമത്തിന്റെ വിപുലമായ വ്യാഖ്യാനത്തിലൂടെ പ്രതിസന്ധികള്‍ മറികടക്കുമെന്നും നമുക്ക് പ്രതീക്ഷിക്കാം.

content highlights; Epidemic diseases act. corona virus