കൊച്ചി: എറണാകുളത്ത് മാളിൽനിന്ന് കൈത്തോക്കും വെടിയുണ്ടകളും കണ്ടെത്തിയ സംഭവത്തിൽ തോക്ക് ഉപേക്ഷിച്ചയാളെ കണ്ടെത്താനാകാതെ പോലീസ്. തോക്ക് ഉപേക്ഷിച്ചതായി സംശയിച്ചിരുന്ന 86 വയസ്സുകാരനെ കണ്ടെത്തി ചോദ്യം ചെയ്തെങ്കിലും ഇയാളല്ല തോക്ക് ഉപേക്ഷിച്ചതെന്ന നിഗമനത്തിലാണ് പോലീസ്. തോക്ക് കണ്ടെടുത്ത മേഖലയിൽ അവസാന മണിക്കൂറിൽ ഉണ്ടായിരുന്നവരെ പോലീസ് തിരിച്ചറിഞ്ഞിട്ടുണ്ട്. ഇത്തരത്തിൽ കണ്ടെത്തിയ നാലു പേരെ പോലീസ് ചോദ്യം ചെയ്തു. ഇവരുടെ ശനിയാഴ്ചത്തെ നീക്കങ്ങൾ പോലീസ് അന്വേഷിച്ചു വരികയാണ്.

തോക്ക് ഉപയോഗ ശൂന്യമാണെന്ന് പരിശോധനയിൽ വ്യക്തമായിട്ടുണ്ട്. ഇതിനാൽത്തന്നെ ഇത് ഭീതി പരത്താനുള്ള ശ്രമം മാത്രമാണെന്നാണ് പോലീസ് കരുതുന്നത്. കൈത്തോക്കിനോടൊപ്പമുണ്ടായിരുന്ന കുറിപ്പിൽ സാമുദായിക, രാഷ്ട്രീയ നേതാക്കളുടെ പേരുണ്ടായിരുന്നു. എന്നാൽ, പരസ്പര വിരുദ്ധമായ കാര്യങ്ങളാണ് ഇതിലുള്ളത് എന്ന് പോലീസ് പറയുന്നു.

ശനിയാഴ്ച ഉച്ചയ്ക്ക് 12-നാണ് ഷോപ്പിങ് മാളിൽനിന്ന് പിസ്റ്റൾ കണ്ടെത്തിയത്. ട്രോളി പാർക്കിങ് ഏരിയയിൽ ട്രോളിയിൽ തുണിസഞ്ചിയിൽ പൊതിഞ്ഞ നിലയിലായിരുന്നു തോക്കും അഞ്ച് വെടിയുണ്ടകളും കുറിപ്പും.

മാളിലെ സി.സി.ടി.വി. പരിശോധിച്ച പോലീസ് ഒരു വയോധികൻ ട്രോളി പാർക്ക് ചെയ്ത് പോകുന്നത് കണ്ടു. ഇതിനാൽത്തന്നെ വയോധികൻ ഉപേക്ഷിച്ചതാകും തോക്കെന്ന് കരുതി വയോധികൻ പോയ വാഹനം കേന്ദ്രീകരിച്ച് അന്വേഷണം നടത്തി. ഇദ്ദേഹത്തെ ആലുവയിലെ വീട്ടിലെത്തി ചോദ്യം ചെയ്തു. എന്നാൽ, തെളിവുകൾ ഒന്നും ലഭിച്ചില്ല. വനം വകുപ്പിൽനിന്ന് വിരമിച്ച ഉദ്യോഗസ്ഥനാണ് 86 വയസ്സുകാരൻ. ഇദ്ദേഹത്തിന് ക്രിമിനൽ പശ്ചാത്തലം ഒന്നുമില്ലെന്ന് പോലീസ് കണ്ടെത്തി.

മാളിൽ ശനിയാഴ്ച എത്തിയവരുടെ എല്ലാവരുടെയും വിവരങ്ങൾ പോലീസ് ശേഖരിച്ചിട്ടുണ്ട്.