തിരുവനന്തപുരം: മുഖ്യമന്ത്രി തള്ളിപ്പറഞ്ഞസ്ഥിതിക്ക് ധനമന്ത്രിസ്ഥാനത്തുതുടരാൻ തോമസ് ഐസക്കിന് അർഹത നഷ്ടപ്പെട്ടിരിക്കയാണെന്നും അല്പമെങ്കിലും ഉളുപ്പ് അവശേഷിക്കുന്നുണ്ടെങ്കിൽ ഉടൻ രാജിവെക്കണമെന്നും പ്രതിപക്ഷ നേതാവ് രമേശ് ചെന്നിത്തല.
തോമസ് ഐസക്കിനെ അദ്ദേഹത്തിന്റെ പാർട്ടിയും കൈവിട്ടിരിക്കയാണ്. മുഖ്യമന്ത്രിയും പാർട്ടിയും കൈവിട്ടനിലയ്ക്ക് അദ്ദേഹത്തിനെങ്ങനെ മന്ത്രിസഭയിൽ തുടരാനാവും?
വിജിലൻസിനെതിരേ വാളോങ്ങിനിന്ന തോമസ് ഐസക്കിനെ മുഖമടച്ച് പ്രഹരിക്കുന്നതരത്തിലാണ് മുഖ്യമന്ത്രി മറുപടി നൽകിയത്. പരസ്യമായി മുഖ്യമന്ത്രി തന്റെ മന്ത്രിസഭയിലെ ഒരംഗത്തെ തള്ളിപ്പറഞ്ഞിരിക്കയാണ്. അതിനർഥം ആ മന്ത്രിയിൽ മുഖ്യമന്ത്രിക്കുള്ള വിശ്വാസം നഷ്ടപ്പെട്ടിരിക്കയാണെന്നാണ്.
കെ.എസ്.എഫ്.ഇ. റെയ്ഡിൽ ‘ആർക്കാണ്‌ വട്ട്‌’ എന്ന പഴയ ചോദ്യത്തിൽ തോമസ് ഐസക് ഇപ്പോഴും ഉറച്ചുനിൽക്കുന്നുണ്ടോ എന്നും ചെന്നിത്തല ചോദിച്ചു.
