ചെന്നൈ: നന്നായി അഭിനയിക്കാനറിയാമായിരുന്നിട്ടും സിനിമയില്‍ 'ഐറ്റം ഡാന്‍സര്‍' എന്ന ചെറുവട്ടത്തില്‍ ഒതുങ്ങേണ്ടിവന്ന നടിയാണ് തിങ്കളാഴ്ച അന്തരിച്ച ജ്യോതിലക്ഷ്മി.
എ. വിന്‍സെന്റ് സംവിധാനംചെയ്ത മുറപ്പെണ്ണിലും എം.ജി.ആര്‍. നായകനായ പെരിയിടത്ത് പെണ്ണിലും മികച്ച വേഷങ്ങളില്‍ അഭിനയിച്ചു. എന്നാല്‍, പിന്നീട് ഒതുങ്ങിക്കൂടേണ്ടിവന്നത് ഐറ്റം ഡാന്‍സുകളിലും ഗ്ലാമര്‍ വേഷങ്ങളിലുമായിരുന്നു. പ്രശസ്തിയിലുപരി സിനിമയെ ഉപജീവനമാര്‍ഗമായിക്കണ്ട ജ്യോതിലക്ഷ്മിക്കു മുന്നില്‍ ഐറ്റം ഡാന്‍സും മാദകരംഗങ്ങളും ഒരിക്കലും വിലങ്ങുതടിയുമായില്ല.
മലയാളം, തമിഴ്, തെലുങ്ക്, കന്നഡ, ഹിന്ദി ഉള്‍പ്പെടെ മുന്നൂറിലധികം ചിത്രങ്ങളില്‍ അഭിനയിച്ചപ്പോഴും പ്രേക്ഷകമനസ്സിലിടംപിടിച്ച വേഷങ്ങള്‍ കുറവായിരുന്നു. അതേസമയം ജ്യോതിലക്ഷ്മിയുടെ മാദകനൃത്തം കാണാന്‍വേണ്ടി ഒരു കാലഘട്ടം തിയേറ്ററുകളില്‍ നിറഞ്ഞു. ജ്യോതിലക്ഷ്മിയും സഹോദരി ജയമാലിനിയും അനുരാധയും പിന്നീട് സില്‍ക്ക് സ്മിതയുമായിരുന്നു തെന്നിന്ത്യന്‍ സിനിമയിലെ മാദകറാണികളായി അറിയപ്പെട്ടിരുന്നത്. 1970-കളുടെ അവസാനഘട്ടത്തിലും 1980-കളിലും തെന്നിന്ത്യന്‍ സിനിമയില്‍ ഐറ്റം ഡാന്‍സുകളുടെ ചാകരയായിരുന്നു.
ഇത്തരം ഐറ്റം ഡാന്‍സുകള്‍ ചിത്രത്തിന്റെ വിജയത്തിന് പ്രധാന ഘടകമായിരുന്നു അക്കാലത്ത്. അതുകൊണ്ടുതന്നെ ജ്യോതിലക്ഷ്മിയെപ്പോലുള്ള നടികള്‍ക്ക് എന്നും തിരക്കോടു തിരക്കായിരുന്നുവെന്നും പഴയകാല സിനിമാപ്രവര്‍ത്തകര്‍ ഓര്‍ക്കുന്നു. മുറപ്പെണ്ണില്‍ മികച്ചവേഷം ലഭിച്ചിട്ടും പിന്നീടങ്ങോട്ട് മലയാളസിനിമ ജ്യോതിലക്ഷ്മി എന്ന നടിയെ വേണ്ടത്ര ഉപയോഗപ്പെടുത്തിയിട്ടില്ല.
മലയാളസിനിമയാണ് അവര്‍ക്ക് മികച്ച വേഷം നല്‍കിയത്. എന്നാല്‍, മലയാളസിനിമതന്നെയാണ് അവരെ ഏറ്റവും മോശമായി
ഉപയോഗപ്പെടുത്തിയതും -ടി.നഗറിലെ വീട്ടില്‍വെച്ച് ജ്യോതിലക്ഷ്മിയുടെ ബന്ധു പറഞ്ഞു.
സിനിമയിലേക്ക് അവര്‍ ഒട്ടേറെപ്പേരെ കൈപിടിച്ചുകൊണ്ടുവന്നിട്ടുണ്ട്. എന്നാല്‍, പിന്നീട് പലരും അവരെ തഴഞ്ഞു. പക്ഷേ, ആരോടും ശത്രുതാമനോഭാവം പുലര്‍ത്താതെ അവര്‍ സ്വയം ഉള്‍വലിയുകയായിരുന്നു. മരിച്ചപ്പോള്‍ സിനിമയിലെ പല പ്രമുഖരും അന്ത്യാഞ്ജലിയര്‍പ്പിക്കാനെത്തിയതും ഈ സ്‌നേഹബന്ധംകൊണ്ടായിരുന്നുവെന്നും ബന്ധു പറഞ്ഞു. ജ്യോതിലക്ഷ്മിയുടെ മകള്‍ ജ്യോതിമീന സിനിമയില്‍ അഭിനയിക്കാനെത്തിയെങ്കിലും അവരെ കാത്തിരുന്നതും ഗ്ലാമര്‍ വേഷങ്ങളും ഐറ്റം ഡാന്‍സുകളുമായിരുന്നു.
നാലുമാസക്കാലമായി രക്താര്‍ബുദത്തെത്തുടര്‍ന്ന് ചികിത്സയിലായിരുന്നു ജ്യോതിലക്ഷ്മി. ഷൂട്ടിങ് കഴിഞ്ഞു വരുമ്പോള്‍ തളര്‍ച്ചയും ശരീരവേദനയുമായിരുന്നു തുടക്കമെന്നും മരണമടുത്തെന്ന് അവര്‍ പലപ്പോഴും പറയാറുണ്ടായിരുന്നുവെന്നും ബന്ധുക്കള്‍ പറഞ്ഞു.അഭിനേതാക്കളായ ഷീല, ശിവകുമാര്‍, കാര്‍ത്തി, അനുരാധ, ഷക്കീല, അംബിക, കോവൈ സരള, നാസര്‍ തുടങ്ങി സിനിമാരംഗത്തുനിന്ന് നിരവധിപേര്‍ ടി.നഗറിലെ വസതിയിലെത്തി ജ്യോതിലക്ഷ്മിക്ക് അന്ത്യാഞ്ജലിയര്‍പ്പിച്ചു.
