കൊച്ചി: കോവിഡ്-19 വൈറസിനെതിരായ പോരാട്ടത്തിന് വാർഷിക ലാഭത്തിന്റെ 0.25 ശതമാനം സംഭാവന നൽകുമെന്ന് സ്റ്റേറ്റ് ബാങ്ക് ഓഫ് ഇന്ത്യ. ബാങ്കിന്റെ സി.എസ്.ആർ. ഫണ്ടിൽ നിന്നാണ് ഈ തുക നൽകുക. കോവിഡ് 19-നെതിരായ പോരാട്ടത്തിന് സി.എസ്.ആർ. തുക ഉപയോഗിക്കുന്നതിന് നേരത്തെ തന്നെ കേന്ദ്ര കമ്പനികാര്യ മന്ത്രാലയം അനുമതി നൽകിയിരുന്നു.
രാജ്യത്തെ ആരോഗ്യമേഖലയിൽ പ്രവർത്തിക്കുന്ന പ്രൊഫഷണലുകളുമായി സഹകരിച്ച്, നിരാലംബരായ ആളുകൾക്ക് സഹായമെത്തിക്കുമെന്ന് എസ്.ബി.ഐ. ചെയർമാൻ രജനീഷ്‌കുമാർ പറഞ്ഞു.
ആരോഗ്യസംരക്ഷണവും ശുചിത്വവും ദുരന്തനിവാരണവും ഉൾപ്പെടെയുള്ളവ പ്രോത്സാഹിപ്പിക്കുന്ന നടപടികളിലും ശ്രദ്ധ കേന്ദ്രീകരിക്കും. രാഷ്ട്രം ഒരുമിച്ചുനിൽക്കേണ്ട സമയമാണിതെന്നും അദ്ദേഹം കൂട്ടിച്ചേർത്തു.
