07 June 2023, 02:49 PM IST

1 min read

Read later

അമേരിക്കന്‍ മലയാളി എന്ന നിലയില്‍ നിങ്ങള്‍ കേരളവുമായി ബന്ധപ്പെട്ട് എന്തെങ്കിലും ബുദ്ധിമുട്ട് അനുഭവിക്കുന്നുണ്ടോ? ഏതെങ്കിലും വിഷയത്തില്‍ നിങ്ങള്‍ കേരളത്തില്‍ വിഷമതകള്‍ അനുഭവിക്കുന്നുണ്ടോ? ദീര്‍ഘകാലമായിട്ടും പ്രശ്‌നങ്ങള്‍ പരിഹരിക്കാതെ പോകുന്നുണ്ടോ? എങ്കില്‍ ഇ-മെയിലില്‍ നിങ്ങളുടെ പ്രശ്‌നങ്ങളും പരാതികളും അയക്കുക.

ലോക കേരള സഭയുടെ അമേരിക്കന്‍ മേഖലാ സമ്മേളനത്തോടനുബന്ധിച്ച് മുഖ്യമന്ത്രിയുടെയും മന്ത്രിമാരുടെയും ചീഫ് സെക്രട്ടറി അടക്കമുള്ള ഉദ്യോഗസ്ഥരുടെയും മുന്നില്‍ ഈ പരാതികള്‍ എത്തിക്കും. പരാതികളില്‍ അടിയന്തര പരിഹാരം കാണണമെന്ന് അഭ്യര്‍ത്ഥിക്കുമെന്നും ലോക കേരള സഭ സംഘാടക സമിതി പ്രസിഡന്റ് മന്മഥന്‍ നായര്‍ പറഞ്ഞു. നിങ്ങളുടെ വിവരങ്ങള്‍ രഹസ്യമായി സൂക്ഷിക്കും. ഇങ്ങനെയൊരു സമ്മേളനത്തിലേക്ക് കേരള പ്രതിനിധികള്‍ എത്തുമ്പോള്‍ അവരോട് ഇത്തരം വിവരങ്ങള്‍ കൂടുതല്‍ സുതാര്യമായി എത്തിക്കുകയും പ്രശ്‌നങ്ങള്‍ക്ക് പരിഹാരം കണ്ടെത്തുകയും ചെയ്യാം. അമേരിക്കന്‍ മലയാളികളുടെ പൊതുവായ പ്രശ്‌നങ്ങളെപ്പറ്റി സംസ്ഥാനപ്രതിനിധികള്‍ക്ക് കൃത്യമായ ധാരണ ലഭിക്കുകയും ചെയ്യും. അതുകൊണ്ട് പരാതികളും പ്രശ്‌നങ്ങളും എഴുതി അറിയിക്കുന്നതിനോടൊപ്പം എന്തെങ്കിലും നിര്‍ദേശങ്ങളോ ഒരു പ്രദേശത്തെ സംബന്ധിച്ച വിഷയങ്ങളോ സമര്‍പ്പിക്കാനുണ്ടെങ്കില്‍ അവയും ഇ-മെയില്‍ ചെയ്യുക. പ്രശ്‌നങ്ങള്‍ പരിഹരിക്കാന്‍ മുന്‍കൈയെടുക്കുന്നവര്‍ അമേരിക്ക സന്ദര്‍ശിക്കുമ്പോള്‍ നിര്‍ദേശങ്ങള്‍ക്കും നിവേദനങ്ങള്‍ക്കും കൂടുതല്‍ ശ്രദ്ധ ലഭിക്കുകയും ഉടനടി പരിഹാരം ഉണ്ടാവുകയും ചെയ്യുമെന്നാണ് വിലയിരുത്തപ്പെടുന്നത്. ഇ-മെയിലുകള്‍ അയക്കേണ്ട വിലാസം- us.lksconference@gmail.com

വാര്‍ത്തയും ഫോട്ടോയും : അനുപമ മോഹന്‍