ചരിത്രവിജയവുമായി ജയലളിത
ആര്‍.കെ.നഗര്‍ ഉപതിരഞ്ഞെടുപ്പില്‍ ജയലളിത നേടിയ വിജയം പാര്‍ട്ടി ഉത്സവമായി കൊണ്ടാടി. പടക്കം പൊട്ടിച്ചും ലഡുവിതരണം ചെയ്തും പ്രവര്‍ത്തകര്‍ തെരുവില്‍ നൃത്തം ചവിട്ടുകയായിരുന്നു. ചെന്നൈയില്‍ നിന്നുള്ള ആഘോഷകാഴ്ച്ചകളിലൂടെ. മാതൃഭൂമി ഫോട്ടോഗ്രാഫര് വി.രമേഷ് പകര്‍ത്തിയ ചിത്രങ്ങളിലൂടെ...
July 1, 2015, 03:30 AM
IST
1/11
റെക്കോഡ് ഭൂരിപക്ഷത്തോടെ തമിഴ്‌നാട് മുഖ്യമന്ത്രി ജയലളിത നിയമസഭയിലേക്ക്. ആര്‍.കെ. നഗര്‍ ഉപതിരഞ്ഞെടുപ്പില്‍ 1,50,722 വോട്ടുകളുടെ വ്യത്യാസത്തിനാണ് ജയലളിത തൊട്ടടുത്ത എതിര്‍സ്ഥാനാര്‍ഥിയായ സി.പി.ഐ.യിലെ സി.മഹേന്ദ്രനെ തോല്പ്പിച്ചത്.
2/11
മഹേന്ദ്രന് 9,710 വോട്ടുലഭിച്ചപ്പോള് ജയലളിതയ്ക്ക് 1,60,432 വോട്ടുകിട്ടി. സ്വതന്ത്രസ്ഥാനാര്‍ഥി രാമസ്വാമിക്ക് 4,590 വോട്ടും 'നോട്ട'(ആര്‍ക്കും വോട്ടില്ല)യ്ക്ക് 2,376 വോട്ടും കിട്ടി.
3/11
തമിഴ്‌നാട് നിയമസഭാ തിരഞ്ഞെടുപ്പുകളിലെ എക്കാലത്തെയുംവലിയ ഭൂരിപക്ഷമാണ് ജയലളിത നേടിയിരിക്കുന്നത്. 16 തപാല്വോട്ടുകളില് എല്ലാം ജയലളിതയ്ക്കു ലഭിച്ചു. ജയലളിതയുടെ ഒറ്റ എതിര്സ്ഥാനാര്ഥിക്കുപോലും കെട്ടിവെച്ച കാശ് തിരിച്ചുകിട്ടില്ല.
4/11
ചരിത്രവിജയത്തിന് ജയലളിത ആര്‍.കെ. നഗറിലെ വോട്ടര്മാരോട് നന്ദിപറഞ്ഞു. മൊത്തം രേഖപ്പെടുത്തിയ 1,81,420 വോട്ടുകളില് 88.43 ശതമാനം വോട്ടും തനിക്കുലഭിച്ചതായി ജയലളിത ചൂണ്ടിക്കാട്ടി. മണ്ഡലത്തിലെ ജനങ്ങളുടെ അഭിലാഷങ്ങള്‍ നിറവേറ്റുന്നതിന് അവിശ്രമം പ്രവര്‍ത്തിക്കുമെന്നും ജയലളിത പറഞ്ഞു.
5/11
അനധികൃതസ്വത്തുസമ്പാദനക്കേസില്‍ ബെംഗളൂരുവിലെ പ്രത്യേക കോടതി ശിക്ഷിച്ചതോടെ എം.എല്‍.എ.സ്ഥാനം നഷ്ടപ്പെട്ട ജയലളിത ഇതേകേസില്‍ കര്‍ണാടക ഹൈക്കോടതി കുറ്റവിമുക്തയാക്കിയ സാഹചര്യത്തിലാണ് ആര്‍.കെ. നഗറില്‍ മത്സരിച്ചത്.
6/11
2011-ല്‍ ഇവിടെനിന്നു ജയിച്ച പി.വെട്രിവേല്‍ ജയലളിതയ്ക്കുവേണ്ടി എം.എല്‍.എ.സ്ഥാനം രാജിവെയ്ക്കുകയായിരുന്നു. ആര്‍.കെ. നഗര്‍ ഉപതിരഞ്ഞെടുപ്പില്‍ വിജയപരാജയങ്ങളല്ല, ജയലളിതയുടെ ഭൂരിപക്ഷംമാത്രമാണ് രാഷ്ട്രീയനിരീക്ഷകര്‍ ഉറ്റുനോക്കിയിരുന്നത്. ഡി.എം.കെ.യും ഡി.എം.ഡി.കെ.യുമടക്കമുള്ള മുഖ്യപ്രതിപക്ഷകക്ഷികള്‍ കളമൊഴിഞ്ഞുനിന്ന തിരഞ്ഞെടുപ്പില്‍ തങ്ങള്‍ ലക്ഷ്യംവെയ്ക്കുന്നത് പ്രതീകാത്മകമത്സരമാണെന്ന് ഇടതുപക്ഷം വ്യക്തമാക്കിയിരുന്നു.
7/11
കരുത്തരായ എതിരാളികളില്ലാതിരുന്നിട്ടും ഒരു പരീക്ഷണത്തിന് എ.ഐ.എ.ഡി.എം.കെ. ഒരുങ്ങിയില്ലെന്നതാണു വസ്തുത. ആള്‍ബലത്തിലും പണക്കൊഴുപ്പിലും ഒരുകുറവും പാര്‍ട്ടി ഇവിടെ വരുത്തിയില്ല. സംസ്ഥാന ധനമന്ത്രി ഒ.പനീര്‍ശെല്‍വത്തിന്റെ നേതൃത്വത്തില്‍ സകലമന്ത്രിമാരും മണ്ഡലത്തില്‍ തമ്പടിച്ചാണ് തിരഞ്ഞെടുപ്പുപ്രചാരണം നടത്തിയത്. ഒരുവോട്ടിന് ഭരണകക്ഷി രണ്ടായിരംരൂപവരെ നല്‍കിയെന്നാണ് സി.പി.ഐ. സ്ഥാനാര്‍ഥി സി.മഹേന്ദ്രന് ആരോപിച്ചത്.
8/11
തമിഴ്‌നാട്ടില്‍ ജയലളിതയെപ്പോലെ മറ്റൊരു നേതാവില്ലെന്ന വസ്തുതയിലേക്കും ആര്‍.കെ. നഗറിലെ വിജയം വിരല്‍ചൂണ്ടുന്നുണ്ട്. വെറും രണ്ടരമണിക്കൂര്‍മാത്രമാണ് ജയലളിത മണ്ഡലത്തില്‍ പ്രചാരണംനടത്തിയത്.
9/11
ജൂണ്‍ 29-ന് വൈകീട്ട് ഏഴുമണിയോടെ മണ്ഡലത്തിലെത്തിയ ജയലളിത രണ്ടരമണിക്കൂര്‍നേരത്തെ റോഡ്ഷോയ്ക്കുശേഷം മടങ്ങുകയായിരുന്നു. ഒരിടത്തുപോലും ജയലളിത തന്റെ ടെമ്പോ ട്രാവലറില്‍നിന്നു പുറത്തിറങ്ങിയതേയില്ല.
10/11
രണ്ടിടത്തുമാത്രമാണ് അവര്‍ പ്രസംഗിച്ചതും.
11/11
ഇക്കഴിഞ്ഞ ലോക്സഭാ തിരഞ്ഞെടുപ്പിലേതുപോലെതന്നെ 2016-ലെ നിയമസഭാതിരഞ്ഞെടുപ്പില്‍ ഒരുപാര്‍ട്ടിയുമായും സഖ്യമുണ്ടാക്കാതെ തനിച്ചുമത്സരിച്ച് തമിഴകത്ത് ഭരണത്തുടര്‍ച്ചയുണ്ടാക്കുകയെന്ന അജന്‍ഡയായിരിക്കും ജയലളിത നടപ്പാക്കാന്‍ ശ്രമിക്കുക എന്ന സൂചനയും ആര്‍.കെ. നഗര്‍ ഫലം നല്‍കുന്നുണ്ട്.
